Ang Langob sa mga Diyolin

TINAMPO SA MAGSUSULAT SA PAGMATA! SA MEXICO

NAGTINDOG diha sa milyonmilyong “mga diyolin” o “mga perlas” nga nagtabon sa salog sa langob nga samag alpombra, ang Amerikanong speleologist, o eksplorador ug langob, natukmod sa pagpahayag, “Diyos ko, salamat sa paghatag mo kanako ug kinabuhi aron makakita niining katingalahang butang!” Siya miadto sa Langob sa mga Diyolin, usa ka sistema sa mga langob sa habagatan-silangang Mexico nga may sukod nga 529 metros ang gitas-on ug 17 metros ang giladmon. Sa sulod, makakita kag talagsaong mga porma sa mga bato. Sanglit nakadungog na kami bahin niining langoba, gusto namong makita kini.

Kining langoba nahimutang sa usa ka pribadong ranso, busa nakapribilehiyo mi nga mahimamat ang asawa sa tag-iya. Sa among pag-agi sa gawang paingon sa dapit nga nahimutangan sa mga diyolin, nakakita mig mga 200 milyones ka calcite ball, o mga perlas sa langob. Kini nagtabon sa salog sa gibag-ong 12 sentimetros ug moabot sa gilay-ong mga 50 metros. Dili gyod nimo mapugngan ang imong kaugalingon sa paghakop sa mga perlas ug tugotang mangahulog gikan sa imong mga kamot ang kinagamyang mga perlas, nga ingon ka gagmay sa monggos. Ang kinadak-an sama ka dako sa gamayng kahil. Kon imong kahigon ang mga diyolin aron makita ang solido nga salog, imong makita nga kini adunay mga perlas nga hapsay kaayong pagkahal-op.

Sa unsang paagi naporma ang mga perlas sa langob? Ang tubig kusog nga motulo ngadto sa mga lim-aw. Tungod sa maong pagtulo mangahulog ang mga calcite gikan sa ibabaw ug kilid nga bahin sa langob, nga moputos sa usa ka tipik sa ubang mga butang, sama sa balas, mga tipik sa bukog, o bisan mga straw sa softdrink. Pinaagi niini, sa dihang anam-anam kining madugangan ug calcite, maporma ang usa ka perlas.

Bisan tuod nahibaloan na sa mga taga-dinhi kining langoba sulod sa daghang katuigan, bag-o pa lang nakaduaw dinhi ang mga espesyalista gikan sa laing nasod, nga nadani sa kadaghan sa mga perlas niini. Sa pagkakaron, gipahigayon na ang mga paningkamot sa pagpanukiduki ug pagpreserbar ning maong talagsaong langob.

Ang mga dapit sama sa Langob sa mga Diyolin magpahinumdom kanato sa mga pulong sa Salmo 111:2: “Ang mga buhat ni Jehova dagko, nga gipangita sa tanan nga nagkalipay kanila.”