Gikan sa Among mga Magbabasa

Paglaom Usa lamang kini ka mubong sulat sa pagpahayag sa among sinserong pagpasalamat sa serye nga “Paglaom​—Asa Nimo Makaplagan Kini?” (Abril 22, 2004) Gibasa namo kini ingong pamilya, ug pagkahuman namog basa, kahilakon mi. Maanindot kaayong tan-awon ang bulak diha sa hulagway.

H. H. & L. H., Tinipong Bansa

Namatay ang akong inahan usa ka semana una nako nadawat kining gulaa, ug nahupay gayod ako sa mga pulong “Ang mga patay anaa sa labing luwas nga kahimtang nga arang hunahunaon, samag usa ka masuso nga gipanalipdan sulod sa tagoangkan sa inahan.” Naguol gihapon ako sa pagkamatay sa akong inahan, apan nalipay ako nga siya luwas diha sa panumdoman ni Jehova.

V. L., Tinipong Bansa

Tigbasa akog Pagmata! sulod na sa mga 50 ka tuig, ug kanunay akong mahingangha nga kamo makasulat bahin sa usa ka ulohan nga kanunay na ninyong gihisgotan ug makahunahuna gihapon kamo ug bag-ong paagi sa pagpresentar niana. Ang impormasyon nga inyong gipresentar bahin sa pagbuntog sa negatibong tinamdan takos gayong palandongon.

T. H., Tinipong Bansa

Aduna akoy sakit nga ikamatay. Gipaningkamotan nakong magmapositibo kanunay, apan karon nahigmata ako nga mibating nawad-ag paglaom. Busa gisublisubli nakog basa ang mga artikulo. Gipakita sa mga artikulo ang halawom nga pagsabot, ug nahupayan akog dako tungod niana.

B. J., Britanya

Ang akong bana nakigbisog sa kanser. Gibati nako ang hilabihang kapit-os sa pag-atiman sa among mga anak. Gawas pa, nawad-an akog trabaho. Apan ang seksiyon nga “Mga Pasikaranan sa Paglaom” nakapalig-on kanako. Buot nakong ipaambit kining artikuloha ngadto sa daghang tawo kutob sa mahimo.

Y. N., Japan

Dali ra akong matarantar kon dunay daotang butang nga mahitabo nako. Kining mga artikuloha maoy tubag sa akong pag-ampo! Espesipiko kaayo ang mga paagi sa pagbuntog sa negatibong tinamdan nga sa dihang motungha ang negatibong mga panghunahuna, tagsatagsa nakong mapadapat ang maong mga paagi. Gibutang nako kining seryeha duol sa akong higdaanan ug gibasa kini kada adlaw.

S. T., Japan

Nanghindik nga mga Langgam Kanunay akong makakita ug nanghindik nga mga langgam dinhi sa akong gipuy-an. Kay ako nang nabasa ang artikulo nga “Nagpatahom Lang ba Sila?” (Abril 22, 2004), nakasabot na ako sa daghang kaayohan nga madawat sa mga langgam tungod sa ilang pagpanghindik. Buot ko kamong pasalamatan sa inyong matulon-anong pagpresentar sa impormasyon bahin sa talagsaong mga linalang sa Diyos.

F. K., Nigeria

Malingaw kaayo kong mobasag mga artikulo bahin sa mga tanom, hayop, ug mga langgam. Nakat-onan nako gikan niining artikuloha nga para sa mga langgam, ang kahinlo mahimong magkahulogag kinabuhi ug kamatayon. Wala gayod ko maghunahuna bahin niini kaniadto.

K. G., Rusya

Mga Naytklab Salamat sa artikulong “Mga Batan-on Nangutana . . . Sa Unsang Paagi Isipon Nako ang mga Naytklab sa mga Batan-on?” (Abril 22, 2004) Mouyon ako nga ang maong mga klab dili para sa mga Kristohanon. Nagmahay ako nga wala nako mailhi si Jehova sa sayosayong bahin sa akong kinabuhi sa dihang tig-adtoan pa ako sa maong mga klab.

L., Indonesia

Sa tinuod lang, nakaadto ko sa mga dapit nga dili unta angay nakong adtoan. Ganahan kong mosayaw, ug kanunay akong mohimog mga pasangil. Pagkasunod adlaw mobati akong sad-an. Ingon niana ang akong pagbati dili tungod kay nakabuhat akog daotan; kondili tungod sa gibuhat sa uban sa akong palibot! Giyagyag niining artikuloha ang kamatuoran bahin sa mga diskohan​—nga daghan niini peligroso ug imoral.

D. K., Australia