Ang Hunahuna sa Bibliya

Paghatag sa mga Bata sa Gikinahanglan Nilang Atensiyon

ANG Anak ba sa Diyos adunay panahon alang sa mga bata? Ang pipila niya ka mga tinun-an naghunahuna nga wala siyay panahon alang kanila. Usa ka higayon niana, gipugngan nila ang gagmayng mga bata sa pagduol kang Jesus. Siya misanong pinaagi sa pag-ingon: “Pasagdi ang mga bata nga moduol kanako; ayaw sila pagpugngi.” Dayon mahigugmaon niyang gitagad ang usa ka pundok sa mga bata ug nakig-estorya kanila. (Marcos 10:13-16) Sa ingon gipakita ni Jesus nga siya andam sa paghatag sa iyang atensiyon sa mga bata. Sa unsang paagi masundog sa mga ginikanan karon ang iyang panig-ingnan? Kini maoy pinaagi sa pagbansay sa ilang mga anak sa hustong paagi ug paggugol ug panahon uban kanila.

Siyempre, gipaningkamotan gayod sa responsableng mga ginikanan ang pag-atiman sa ilang mga anak ug gilikayan ang pagmaltratar kanila. Ikaingon pa gani nga “kinaiyanhon” na alang sa mga ginikanan ang pagpakitag pagtamod ug konsiderasyon sa ilang mga anak. Ugaling lang, ang Bibliya nagpasidaan nga daghan unya sa atong panahon ang wala nay “kinaiyanhong pagbati.” (2 Timoteo 3:1-3) Ug kadtong nagpakita nag mahigugmaong pagtagad sa ilang mga anak aduna gihapoy makat-onan bahin sa pagkahimong mas responsableng mga ginikanan. Busa, ang mosunod nga mga prinsipyo sa Bibliya maoy maayong mga pahinumdom alang sa mga ginikanan nga gustong mohatag sa kinamaayohan alang sa ilang mga anak.

Pagbansay sa mga Bata sa Paagi nga Dili Makapalagot Kanila

Si Dr. Robert Coles, usa ka inilang magtutudlo ug tigdukiduki nga sikyatrista, kas-a miingon: “Ang mga bata anam-anam nga makaamgo bahin sa moralidad. Nagtuo ako nga ang Diyos maoy nagbutang niining maong kaamgohan diha kanila, nga sila mangita gayod ug moral nga giya.” Kinsay motagbaw sa ilang dakong tinguha alang sa moral nga giya?

Sa Efeso 6:​4, ang Kasulatan nag-awhag: “Kamong mga amahan, ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.” Namatikdan ba nimo nga ang teksto espesipikong nagtugyan diha sa amahan sa responsabilidad nga isilsil sa iyang mga anak ang gugma sa Diyos ug lalom nga pagpabili sa Iyang mga sukdanan? Sa dihang giingnan ni apostol Pablo ang mga bata sa Efeso kapitulo 6, bersikulo 1 sa ‘pagsugot sa ilang mga ginikanan,’ pareho niyang gitumong dinhi ang amahan ug inahan. *

Siyempre, kon wala ang amahan, nan ang inahan maoy moabaga niining maong responsabilidad. Daghang nag-inusarang mga inahan ang malamposong nagmatuto sa ilang mga anak diha sa disiplina ug pagdumala-sa-kaisipan ni Jehova nga Diyos. Apan, kon ang inahan maminyo, ang Kristohanong bana ang angayng manguna. Ang inahan kinahanglang andam nga mosunod sa iyang pagpanguna sa pagbansay ug pagdisiplina sa ilang mga anak.

Unsaon man nimo pagdisiplina o pagbansay ang imong mga anak sa paagi nga dili ‘makapalagot’ kanila? Dili kay usa ra ang pormula sa paghimo niini, ilabina kay ang matag bata magkalahi. Apan angayng palandongon pag-ayo sa mga ginikanan ang ilang paagi sa pagdisiplina, nga kanunayng magpakitag gugma ug pagtamod sa ilang mga anak. Makaiikag nga kining maong tambag nga dili palagoton ang inyong mga anak gisubli diha sa Kasulatan sa Colosas 3:21. Didto, ang mga amahan gipahimangnoan na usab: “Ayaw palagota ang inyong mga anak, aron sila dili masubo.”

Ang ubang mga ginikanan mosinggit ngadto sa ilang mga anak. Kini seguradong makapalagot sa ilang mga bata. Apan ang Bibliya nag-awhag: “Isalikway ninyo ang tanang mapangdaot nga kayugot  ug kasuko ug kapungot ug sininggitay ug mapasipalahong sinultihan.” (Efeso 4:31) Ang Bibliya nag-ingon usab nga “ang ulipon sa Ginoo dili kinahanglang makig-away, kondili kinahanglang magmalumo sa tanan.”​—2 Timoteo 2:24.

Hatagi Silag Panahon

Mahatag usab nimo ang atensiyon nga gikinahanglan sa imong mga anak kon andam kang mosakripisyo sa imong mga tinguha ug kahayahay alang sa kaayohan sa imong mga anak. Ang Bibliya nag-ingon: “Kining mga pulonga nga akong gisugo kanimo niining adlawa kinahanglan nga maanaa sa imong kasingkasing; ug isilsil mo kini sa imong anak ug magsulti ka mahitungod niini sa maglingkod ikaw sa imong balay ug sa maglakaw ikaw sa dalan ug sa imong paghigda ug sa imong pagbangon.”​—Deuteronomio 6:​6, 7.

Tungod sa daghan kaayong pinansiyal nga mga obligasyon, pipila ra sa mga ginikanan karon ang makaarang sa pagpakig-uban sa ilang mga anak sa tibuok adlaw. Apan, gipasiugda sa Deuteronomio nga ang mga ginikanan “kinahanglan” nga mangitag panahon sa pagpakig-uban sa ilang mga bata. Gikinahanglan ang maayong pag-organisar ug pagsakripisyo aron mahimo kini. Bisan pa niana, gikinahanglan sa mga bata ang maong atensiyon.

Tagda ang resulta sa usa ka pagtuon maylabot sa kapig 12,000 ka tin-edyer. Mao kiniy nakab-ot nga konklusyon sa mga tigdukiduki: “Ang suod kaayo nga relasyon sa usa ka tin-edyer ngadto sa iyang ginikanan maoy iyang kinamaayohang garantiya sa kahimsog ug kinalig-onang depensa batok sa makadaot nga mga panggawi.” Oo, ang mga bata mangita gayod ug atensiyon gikan sa ilang mga ginikanan. Kas-a, gipangutana sa usa ka inahan ang iyang mga anak, “Kon puwede ninyong maangkon ang bisan unsang gusto ninyo, unsay gusto kaayo ninyong mabatonan?” Ang upat ka bata mitubag, “Daghang panahon uban ni Mama ug Papa.”

Busa, paneguroon sa responsable nga mga ginikanan ang pagtagbaw sa mga panginahanglan sa ilang mga anak, lakip na ang gikinahanglan nilang espirituwal nga edukasyon ug suod nga pagpakighigala uban sa ilang mga ginikanan. Tabangan usab nila ang ilang mga anak nga modako ingong may-katakos, matinahoron, ug matinud-anon nga mga hamtong nga nagapakitag kaayo sa ilang isigkatawo ug nagahimaya sa ilang Maglalalang. (1 Samuel 2:26) Oo, sa dihang bansayon ug disiplinahon sa mga ginikanan ang ilang mga anak sa diyosnon nga paagi, gipakita nila nga sila responsableng mga ginikanan.

[Footnote]

[Hulagway sa panid 13]

Ang pagsinggit makapayugot sa bata

[Hulagway sa panid 13]

Paggugol ug panahon uban sa imong mga anak