Gikan sa Among mga Magbabasa

Gihasi Diha sa Trabahoan Natandog kaayo ako sa serye nga “Gihasi Diha sa Trabahoan​—Unsay Imong Mahimo?” (Mayo 8, 2004) Naagoman nako mismo ang tanang butang nga gihubit sa artikulo. Nag-antos ako ug relihiyosong pagpihig sa ospital diin ako nagtrabaho, ug nakaapektar kini sa akong emosyonal ug espirituwal nga kahimsog. Makapalipay ang pagkahibalo nga dili lang diay ako ang nakaagom niining ngil-ad kaayo nga kasinatian.

J. C., Puerto Rico

Gihasi ako sulod sa daghang katuigan ug hapit ako nalisoan ug pangisip. Akong buhaton ang tanan nakong maarangan sa pagpadapat sa inyong mga sugyot.

C. H., Tinipong Bansa

Salamat sa pagtabang ninyo kanamong mga biktima sa paghasi ug sa pag-agak kanamo nga masuod sa atong maluluy-ong Diyos, kinsa nasayod sa among lisod nga kahimtang.

L. W., Tinipong Bansa

Ang among lokal nga kongregasyon sa mga Saksi ni Jehova nagtanyag niining maong gula sa mga negosyohanan ug nagdasig sa mga tag-iya sa pagtipig niining artikuloha. Daghan ang nagpasalamat niining maong impormasyon.

V. S., Tinipong Bansa

Kinahanglan akong mopahawa sa akong trabaho tungod kay pirme akong makadungog ug sakit nga sinultian. Palihog padayona ang pagpatik ug mga artikulo nga nagtudlo kanamo kon unsaon pagsagubang sa mga problema.

T. Y., Japan

Gitanyag nako ang maong magasin sa akong doktor, nga nag-ingon, “Basin moabot ang adlaw nga aduna kay pasyente nga sakitan ug kutokuto tungod sa pagpanghasi.” Siya miingon, “Dili kay basin ra. Aduna gayod akoy ingon niana nga pasyente karon!” Misaad siya sa pagbasa sa mga artikulo.

E. S., Alemanya

Sanglit wala akoy kaugalingong puy-anan, ako napugos sa pagpuyo uban sa akong igsoong babaye ug sa pag-antos sa iyang sakit nga mga sinultian. Nakapaguol gayod kini kanako. Apan, kining maong gula sa Pagmata! maoy alang gayod kanako! Gihupay gayod ako ni Jehova.

S. A., Rusya

Mamumuno nga mga Tanom Salamat sa artikulo nga “Pagbantay​—Mamumuno nga mga Tanom!” (Mayo 8, 2004) Ako nangolekta ug nag-atiman ug mga tanom nga mokaon ug mga insekto sulod na sa kapig 12 ka tuig. Ang artikulo tukma sa siyensiya ug simple nga pagkasulat.

T. K., Alemanya

Ako nag-edad ug 11 anyos, ug ang akong magtutudlo naghatag kanamog asaynment sa pagsulat bahin sa Venus flytrap. Nianang semanaha mismo, migula kining artikuloha​—tukma gayod sa panahon!

R. S., Rusya

Nag-atiman ako kaniadto ug mga tanom nga mokaon ug mga insekto ug nalingaw ako sa pagbasa sa artikulo. Apan, wala kaayo nako maangayi ang inyong ulohan. Tinuod nga kining mga tanoma peligroso alang sa ubang mga insekto, apan kini usab hinlo, galmonon nga mga tanom. Nameligro pa ganing mapuo ang ubang espisye.

H. K., Japan

Ang “Pagmata!” nagtubag: Salamat sa pahinumdom. Bisan tuod ang among ulohan gituyo sa pagdani sa pagtagad sa mga magbabasa, ang artikulo mismo nagtudlo sa mga magbabasa sa pagtahod ug pag-atiman niining mga tanoma.

Pagtuo Nasulayan Giganahan ako sa artikulo nga “Ang Pagtuo sa Usa ka Pamilya Nasulayan.” (Mayo 8, 2004) Nag-edad ako ug diyes anyos ug natakboyan sa sakit nga Crohn. Nagbalikbalik ako sa ospital sa miaging tingtugnaw hangtod nga nahibaloan ra gayod kon unsay akong sakit. Kining artikuloha nakatabang gayod kanako nga mahimong mas masaligon ug mas makasarang sa pag-atubang sa akong sakit. Naghinamhinam na ako nga mopuyo sa Paraiso, diin dili na kita makaagom pa niining mga problemaha.

M. H., Tinipong Bansa