“Walay-Pulos” nga DNA?
“Walay-Pulos” nga DNA?
GITUN-AN sa daghang tigpanukiduki ang biolohiya, henetika, ug susamang mga natad sumala sa panglantaw sa teoriya sa ebolusyon. Kasagaran, kini nga panghunahuna mitultol kanila ngadto sa sayop nga mga konklusyon. Pananglitan, giklasipikar sa unang mga Darwinista ang pipila ka organo, sama sa apendiks, pituitary gland, ug mga tonsil, ingong mga salin sa ebolusyon tungod kay kining mga organoha morag wala may mapuslanong obra. Apan sa kadugayan nadiskobrehan ang hinungdanong papel niining mga organoha. Busa, kinahanglang isalikway sa mga ebolusyonista ang una nilang mga panghunahuna.
Nahitabo ang susamang kaugmaran di pa dugay diha sa natad sa henetika. Ang unang mga panukiduki nagsugyot nga mga 98 porsiyento sa DNA diha sa mga tawo ug sa uban pang mga organismo ang walay obra. Busa, daghan nga naimpluwensiyahan sa teoriya sa ebolusyon nagtuo nga ang DNA maoy “walay-pulos nga salin sa ebolusyon”—usa ka panghunahuna nga gidawat dayon.
Ugaling lang, ang pagtuo nga gipasukad sa Darwinismo napamatud-an gihapong sayop. Di pa dugay, nadiskobrehan sa mga siyentipiko nga ang “walay-pulos” nga DNA adunay mahinungdanong papel diha sa lawas pinaagi sa pagpatunghag linaing mga matang sa RNA (ribonucleic acid) nga hinungdanon sa kinabuhi. Si John S. Mattick, direktor sa Institute for Molecular Bioscience sa University of Queensland sa Australia, nagtuo nga ang pagdawat dayon sa teoriya bahin sa “walay-pulos” nga DNA maoy “usa ka kasagarang pananglitan kon sa unsang paagi ang batasan sa pagsunod sa naestablisar nang opinyon makadaot sa walay-pagpihig nga pag-analisar sa mga kamatuoran, ug niining kasoha sulod na sa 25 ka tuig.” Siya midugang nga kining maong kapakyasan “mahinumdoman gayod ingong usa sa kinadak-ang mga sayop sa kasaysayan sa molekular nga biolohiya.”
Dili ba mas maalamong isipon ang DNA ingong adunay intelihenteng Tigdisenyo? Ang mga tawo nga nagtuo niana nahibalo nga sa ngadtongadto kasagarang mabutyag ra ang mga katarongan sa lisod-sabton nga mga bahin sa mga buhat sa Diyos. Ug imbes makapaluya kanila, ang maong mga kaplag makapahingangha pa gayod kanila.—Proverbio 1:7; Ecclesiastes 3:11.
[Picture Credit Lines sa panid 21]
DNA: Photo: www.comstock.com; researcher: Agricultural Research Service, USDA