Ang Hunahuna sa Bibliya

Ang Diyos ba Anaa sa Tanang Dapit?

ANG Diyos haom nga tawgong makagagahom-sa-tanan ug nahibalo-sa-tanan. Apan, sa dihang hubiton pa gayod ang pagkadako sa Diyos, ang uban moingon nga ang Diyos anaa sa tanang dapit.

Ang unang duha ka kahubitan tin-awng gipamatud-an sa mga pagtulon-an sa Kasulatan. (Genesis 17:1; Hebreohanon 4:13; Pinadayag 11:17) Sa pagkatinuod, ang Diyos makagagahom-sa-tanan ug siya nahibalo-sa-tanan sa pagkaagi nga walay butang nga matago kaniya. Apan ang Diyos ba anaa sa tanang dapit, o siya ba usa ka persona nga adunay espesipikong dapit nga puloy-anan?

Hain man ang Diyos?

Diha sa ubay-ubayng mga bersikulo sa Bibliya, ang “mga langit” gihisgotan ingong “pihong dapit nga puloy-anan” sa Diyos. (1 Hari 8:​39, 43, 49; 2 Cronicas 6:​33, 39) Hinunoa, ang usa ka asoy sa Bibliya naghubit sa kadako ni Jehova nga Diyos pinaagi sa mosunod nga mga pulong: “Ang Diyos mopuyo ba gayod uban sa katawhan dinhi sa yuta? Tan-awa! Ang langit, oo, ang langit sa mga langit, dili makaigo kanimo.”​—2 Cronicas 6:18.

“Ang Diyos maoy Espiritu,” nag-ingon ang Bibliya. (Juan 4:24) Busa, siya nagpuyo sa espirituhanong dapit nga bulag sa pisikal nga uniberso. Sa dihang ang Bibliya maghisgot sa “mga langit” ingong puloy-anan sa Diyos, kini nagtumong sa binayaw nga dapit nga iyang gipuy-an nga lahi sa pisikal nga dapit nga atong gipuy-an. Labaw sa tanan, ang Bibliya nagtudlo nga ang puloy-anan sa Diyos, sa pagkatinuod, lahi gayod sa pisikal nga uniberso apan sa samang higayon adunay espesipikong dapit.​—Job 2:1-2.

Ang Diyos Usa ka Persona

Si Jesus naghisgot bahin sa dapit nga puloy-anan ni Jehova sa dihang siya miingon ngadto sa iyang mga tinun-an: “Sa balay sa akong Amahan adunay daghang puloy-anan. . . . Ako moadto aron sa pag-andam ug dapit alang kaninyo.” (Juan 14:2) Diin man miadto si Jesus? Sa wala madugay, siya “misulod . . . ngadto sa langit mismo, aron moatubang sa persona sa Diyos alang kanato.” (Hebreohanon 9:24) Kini nga asoy nagtudlo kanato ug duha ka hinungdanong mga kamatuoran bahin kang Jehova nga Diyos. Una, siya adunay literal nga dapit nga puloy-anan, ug ikaduha, siya usa ka persona, dili lamang usa ka dili-mahubit  nga puwersa nga nagpuyo sa tanang dapit.

Mao kanay hinungdan kon nganong gitudloan ni Jesus ang iyang mga sumusunod sa pag-ampo niining paagiha: “Amahan namo nga anaa sa mga langit,” nga nagtumong sa ilang mga pag-ampo ngadto sa usa ka persona, si Jehova, kinsa anaa sa usa ka dapit, nga mao, ang espirituwal nga mga langit. (Mateo 6:9; 12:50) Kining pagtulon-ana nahiuyon sa paagi nga gitudloan ang katawhan sa Diyos sa pag-ampo sulod na sa kapin sa 1,500 ka tuig. Ang labing karaang mga sinulat nga inspirado sa Diyos naundan sa mosunod nga pag-ampo: “Dungaw gikan sa imong balaang puloy-anan, ang kalangitan, ug panalangini ang imong katawhan.”​—Deuteronomio 26:15.

Ang Balaang Espiritu sa Diyos Makaabot sa Tanang Tawo ug Dapit

Bisan tuod ang Bibliya kanunayng naghisgot sa Diyos ingong adunay espesipikong dapit nga puloy-anan, kini subsob nga naghisgot sa iyang balaang espiritu ingong anaa sa tanang dapit. “Asa man ako paingon gikan sa imong espiritu, ug asa man ako mokalagiw gikan sa imong atubangan?” misukna ang salmistang si David. (Salmo 139:7) Ang uban naglibog nianang mga pulonga ug mohinapos tingali nga ang Diyos anaa sa tanang dapit. Apan, sa dihang tagdon nato ang konteksto niini ug ang ubang mga teksto, tin-aw nga ang balaang espiritu ni Jehova​—o aktibong puwersa—​mahimong paabton gikan sa iyang pihong nahimutangan ngadto sa bisan asang dapit sa pisikal nga uniberso.

Sama sa kamot sa usa ka amahan nga gituy-od aron sa paghupay ug pagpaluyo sa iyang mga anak, ang kamot ni Jehova​—o ang balaang espiritu​—makaabot bisan asang dapita sa espirituwal nga dominyo o sa pisikal nga uniberso aron sa pagpalampos sa katuyoan ni Jehova. Busa, ang salmista nakaingon: “Kon kuhaon ko ang mga pako sa kaadlawon, aron makapuyo ako sa kinalay-ang dagat, didto, usab, agakon ako sa imong kamot ug ang imong tuong kamot magagunit kanako.”​—Salmo 139:​9, 10.

Ikaw Mahimong Higala sa Diyos

Sa mapaubsanon ug mahigugmaong paagi gitugotan ni Jehova nga Diyos nga siya ug ang iyang dapit nga puloy-anan hubiton sa tawhanong mga termino nga tukmang nagpaila kon kinsa siya ug kon asa siya nagpuyo. Tungod niini ug sa uban pang mga paagi, morag siya “nagapaubos aron sa pagtan-aw sa langit ug sa yuta.” (Salmo 113:6) Bisan pa niana, ang kinaiyahan sa Diyos dili gayod bug-os nga masabtan sa tawo.

Si Jehova dili gayod bug-os mahubit sa tawhanong mga termino tungod kay siya halangdon, dako, ug kahibulongan kaayo. Busa bisan tuod ang Kasulatan naghisgot bahin sa iyang langitnong pinuy-anan ingong usa ka dapit nga may espesipikong lokasyon, dili gayod bug-os masabtan sa mga tawo ang maong espirituwal nga dominyo.​—Salmo 139:6.

Bisan pa niana, makalilipay nga kita dunay igong pagsabot bahin sa tinuod nga kinaiyahan ni Jehova, nga nahibalo nga siya dili usa ka dili-mahubit, walay-pagbati nga puwersa nga anaa sa tanang butang sa uniberso. Hinunoa, siya usa ka persona nga may espesipikong dapit nga puloy-anan ug usa ka tino kaayong personalidad nga mailhan pinaagi sa gugma ug kamaluloton. Ang maong kahibalo nagbukas sa kinadak-ang kahigayonan nga mahunahunaan ni bisan kinsang tawo​—ang kahigayonan nga makabaton ug tibuok-kinabuhi, personal nga pakighigalaay uban sa Labing Gamhanang Soberano sa uniberso.​—Santiago 4:8.