Pagkaplag sa Tinubdan sa Tanang Enerhiya

ANG adlaw mao ang pangunang tinubdan sa enerhiya sa yuta. Daghang siyentipiko nagtuo nga ang karbon ug aseite maoy salin sa nadugta nga mga kahoy ug tanom nga nabuhi kanhi gumikan sa enerhiya sa adlaw. * Ang tubig nga moagos ngadto sa hydroelectric nga mga dam unang masuhop gikan sa kadagatan pinaagi sa kainit sa adlaw ug mapadpad ibabaw sa yuta ingong mga panganod. Ang kainit sa adlaw mao usay magduso sa hangin nga nagpatuyok sa gipadagan-ug-hangin nga mga generitor. Bisan pa niana, gibanabana nga katunga lang sa ikausa ka bilyon ka bahin sa enerhiya sa adlaw ang makaabot sa yuta.

Bisag gamhanan kaayo, ang bituon nga gitawag nato ug adlaw maoy usa lang sa bilyonbilyong tinubdan sa enerhiya diha sa uniberso nga sama niana ka gamhanan. Kinsa ang pangunang tinubdan niining tanang gahom? Naghisgot bahin sa mga bituon, ang magsusulat sa Bibliya nga si Isaias miingon: “Iyahat ang inyong mga mata sa itaas ug tan-awa. Kinsay naglalang niining mga butanga? Mao ang Usa nga nagpatungha sa ilang panon nga hilabihan ka daghan, siya nagtawag kanilang tanan pinaagi sa ngalan. Gumikan sa kadagaya sa dinamikong kusog, kay siya usab mabaskog sa gahom, walay usa kanila ang nawala.”​—Isaias 40:26.

Sa dihang mamalandong kita sa dakong gahom sa mga bituon, basin mahupngan kita sa kahingangha​—apan labi na gayod sa dihang maghunahuna kita bahin sa Maglalalang. Hinunoa, ang Bibliya nag-awhag kanato: “Duol sa Diyos, ug siya moduol kaninyo.” (Santiago 4:8) Oo, ang Maglalalang sa yuta ug sa dagayang kahinguhaan sa enerhiya niini, ang usa nga naghatag kanato ug kinabuhi, mahimong makaplagan niadtong mangita kaniya.​—Genesis 2:7; Salmo 36:9.

Sa dihang makita nila nga ang yuta ug ang mga kahinguhaan niini gidaot ug wala giapod-apod sa makataronganong paagi, ang ubang mga tawo basin maglisod pagtuo nga ang Diyos interesado sa yuta ug sa mga tawo nga nagpuyo dinhi. Bisan pa niana, ang Bibliya nagpasalig kanato nga mausab ra kini sa dili madugay, nga nagsaad ug dagkong kausaban sa paagi sa pag-apod-apod sa mga kahinguhaan sa yuta ug sa paagi mismo sa pagmando sa yuta. (Daniel 2:44; Mateo 6:​9, 10) Pinaagi sa pagtukod ug usa ka langitnong kagamhanan nga momando sa tibuok yuta ubos sa pagpanguna sa iyang Anak, si Kristo Jesus, tinoon ni Jehova nga Diyos nga ang dagayang mga kahinguhaan sa yuta maapod-apod sa makataronganong paagi ngadto sa tanang tawo. (Miqueas 4:2-4) Iya usab nga ‘laglagon ang mga nagalaglag sa yuta,’ sa ato pa, kadtong nagdaot sa kalikopan, sa espirituwal man o pisikal nga paagi.​—Pinadayag 11:18.

Nianang panahona, ang saad nga narekord sa Isaias 40:29-31 matuman sa espirituwal ug pisikal nga paagi: “Siya naghatag ug gahom sa gikapoy; ug sa walay dinamikong kusog siya nagpadagaya sa bug-os nga gahom. Ang mga batang lalaki kapoyon ug maluya, ug ang mga batan-ong lalaki sa walay pakyas mangapandol, apan kadtong naglaom kang Jehova maulian sa kusog. Sila manglupad pataas pinaagig mga pako nga sama sa mga agila. Sila managan ug dili maluya; sila manglakaw ug dili kapoyon.” Makakat-on ka usab ug dugang bahin sa Tinubdan sa tanang enerhiya ug sa solusyon sa mga suliran sa enerhiya sa yuta kon mogahin ka ug panahon sa pagtuon sa Bibliya.

[Footnote]