‘Usa ka Magasin nga Gipaluyohan sa Diyos’

USA ka lalaki nga nagtuon sa Bibliya uban sa mga Saksi ni Jehova sa Nigeria mitambong ug seminar nga giorganisar sa Inter-African Committee on Women and Children. Nagdala siya ug duha ka bag-ong mga kopya sa Pagmata!

Sa unang adlaw sa seminar, namatikdan sa maong lalaki nga ang mamumulong naggamit ug mga punto gikan sa usa sa mga magasin nga iyang dala. Ang hapin niini may ulohang “May Kapuslanan ang Kinabuhi.” (Oktubre 22, 2001) Busa gipagawas dayon niya ang iyang kopya ug gitamdan kini panahon sa lektyur.

Pagkahapon, usa ka abogado nga maoy mopakigpulong pagkasunod adlaw nakakita sa hapin sa laing isyu sa Pagmata! nga dala sa maong estudyante sa Bibliya, nga naghisgot bahin sa seryeng “Tabang Alang sa Gikulata nga mga Babaye.” Ang abogado gustong mohulam niini. Nianang gabhiona, iyang gibasura ang iyang unang giandam nga pakigpulong ug nagbalay ug lain base sa mga artikulo sa Pagmata! Pagkasunod adlaw, samtang naglektyur ang abogado, usa ka babaye, nga naglingkod sa laray nga gilingkoran sa estudyante sa Bibliya, ang mipagula sa iyang kopya sa Pagmata! ug gitamdan kini panahon sa lektyur.

Ang estudyante sa Bibliya mismo dakog natampo sa panaghisgot diha sa seminar tungod sa iyang pagbasa sa maong mga artikulo sa Pagmata! ‘Segurado ako,’ matod niya, ‘nga kining magasina gipaluyohan sa Diyos.’

Gusto ba nimo nga regular kang hatdan niining magasina diha sa imong balay? Nganong dili nimo hangyoon ang usa sa mga Saksi ni Jehova sa paghatod ug magasin kanimo?