Gikan sa Among mga Magbabasa

Pagkamamingawon Naaghat gayod ako sa pagsulat kaninyo human nako mabasa ang serye nga “Nag-inusara Apan Dili Mamingawon.” (Hunyo 8, 2004) Wala dayon ako mainteres sa unang higayon nga nakita nako kini nga serye. Apan sa dihang nagsugod na ako sa pagbasa, akong naamgohan nga dili kaayo ko madayganon sa akong pagbati sa uban. Ang gihatag nga mga sugyot mao gayod ang akong gikinahanglan.

A. V., Tinipong Bansa

Ako adunay patol ug depresyon, ug kanunay akong matulog tungod sa epekto sa mga tambal. Busa, kasagaran, bation kog kamingaw. Kining mga artikuloha nakatabang kanako sa pagsabot nga bisan bation tag kamingaw, kita wala mag-inusara!

J. C., Tinipong Bansa

Ako 14 anyos, ug nakasulay ko kaniadto sa pagpaningkamot nga mauyonan ko sa akong mga klasmet. Nagtuo ko nga mga higala nako sila. Apan, sa dihang nakita nila nga lahi ako tungod sa akong pagka-Kristohanon, akong nasayran nga ila kong talikdan kon dili ko mag-usab ug mosundog nila. Karon akong naamgohan nga ang tinuod nga mga higala​—edaran ug batan-on​—makaplagan diay diha sa Kristohanong kongregasyon.

N. C., Espanya

Kining seryeha nakapaarang kanako sa pagsabot kon nganong negatibo kaayo ang akong reaksiyon sa dihang ang akong bana mobiyahe tungod sa trabaho ug mabilin ako nga nag-inusara. Ang inyong tambag sa paglantaw sa pagkamamingawon ingong komon nga kasinatian ug sa pagpakig-estorya sa usa ka hamtong nga higala nakatabang kaayo kanako.

J. H., Czech Republic

Sa dili madugay mobalhin na ako sa usa ka lugar nga nanginahanglan ug mga magwawali. Ang akong inahan nalipay nga moboluntaryo ako sa laing dapit, apan usahay bation siyag kamingaw. Sa dihang naghunahuna na ako kon unsay akong himoon, kining mga artikuloha migula. Nagplano ako nga makigkomunikar kanunay sa akong inahan, nga ipaambit kaniya ang akong makapalipayng mga eksperyensiya sa pag-alagad.

N. K., Japan

Torre sa London Ang artikulong “Ang Torre sa London​—Makasaysayanhong Monyumento sa Gubot nga Kagahapon” miabot sa husto gayod nga panahon. (Hunyo 8, 2004) Ang akong magtutudlo ug ubang mga eskolmet bag-o pang nakapauli sa ilang biyahe gikan sa London. Sa tabang niining artikuloha, ako daw nakaduaw sa London​—nga walay gasto!

P. L., Alemanya

Kabalaka Dili pa dugay, ako mibatig sobrang kakapoy tungod sa akong mga kabalaka. Misamot ang akong gibati tungod sa paghunahuna nga ang akong kahimtang maoy resulta sa kakulang ug pagtuo. Mapasalamaton kaayo ako sa dihang akong nabasa ang artikulong “Ang Hunahuna sa Bibliya: Ilhanan ba sa Kakulang sa Pagtuo ang Kabalaka?” (Hunyo 8, 2004) Si Jehova kanunay gayod nga modasig kanako sa dihang ako mabalaka.

Y. I., Japan

Demograpiya Sa artikulong “Demograpiya, ang Bibliya, ug ang Umaabot,” kamo nag-ingon nga ang Israel mibiya sa Ehipto human sa 215 ka tuig. (Mayo 8, 2004) Apan ang Exodo 12:​40, 41 miingon nga mibiya sila human sa 430 ka tuig.

R. C., Tinipong Bansa

Ang “Pagmata!” nagtubag: Ang Exodo 12:40 nag-ingon: “Ang pagpuyo sa mga anak sa Israel, nga namuyo sa Ehipto, maoy upat ka gatos ug katloan ka tuig.” Matikdi nga “ang pagpuyo sa mga anak sa Israel” wala lamang maglakip sa panahon nga didto sa Ehipto ang mga Hudiyo; hinunoa, kini dayag nga naglakip sa tibuok yugto nga nagsugod sa dihang misulod si Abraham sa yuta sa Canaan. Gipakita ni apostol Pablo nga kining 430-tuig nga yugto nagsugod sa dihang gibalido ang Abrahamikong pakigtugon. (Galacia 3:​16, 17) Nahitabo kini sa dihang misulod si Abraham sa Canaan niadtong 1943 W.K.P. Gipakita sa kronolohiya sa Bibliya nga 215 ka tuig pa ang milabay una nangadto sa Ehipto ang mga Hudiyo. Busa ang laing 215 ka tuig mao ang aktuwal nga ‘pagpuyo sa mga Hudiyo sa Ehipto.’​—Tan-awa ang artikulong “Chronology,” sa “Insight on the Scriptures Tomo I,” nga gipatik sa mga Saksi ni Jehova.