Kabukiran—Kinsay Moluwas Kanila?

SULOD sa upat ka adlaw sa tuig 2002, dihay gihimong Global Mountain Summit sa Bishkek sa Kyrgyzstan (sentral Asia). Kini ang unang internasyonal nga miting nga gilaraw aron hisgotan ang mga problema may kalabotan sa mga bukid. Ang mga tigpasiugda niini naglaom nga ang tuig 2002 mahimong “sinugdanan sa usa ka bag-ong yugto nga nag-ila sa pagkahinungdanon sa mga bukid.”

Gikauyonan diha sa miting ang “Bishkek Mountain Platform,” mga polisa nga nagsilbing mga giya alang sa tanang interesado sa pagpanalipod sa mga bukid. Ang gipahayag nga katuyoan niini mao “ang pagpauswag sa pangabuhi sa mga tawo sa bukid, pagpanalipod sa sistema sa ekolohiya sa bukid ug mas maalamong paggamit sa mga kahinguhaan sa bukid.”

Ang pipila ka paningkamot nagmalamposon. Ang mga lugar nga talagsaon ang katahom ug panagkadaiya sa mga hayop ug tanom gipanalipdan sa usa ka tibuok-kalibotan nga sistema sa nasodnong mga parke. Diha sa daghang bahin sa kalibotan, ang mga grupo nga tigpanalipod sa kinaiyahan milampos sa pipila ka paagi sa pagsumpo sa dakong kadaot sa kalikopan. Usa ka ideya nga gihatagan ug pagtagad sa Mountain Summit sa Bishkek mao ang hugot nga panaad sa paghinlo sa nukleyar nga biya nga gilabay diha sa mga bukid sa Kyrgyzstan. Kining makahilo kaayo nga biya nagpameligro sa suplay sa tubig sa 20 porsiyento sa mga tawo sa sentral Asia.

Bisan pa niana, ang mga problema nga nalangkit sa pagpanalipod sa mga bukid sa kalibotan dili mabangbang. Pananglitan, sa 1995, ang mga awtoridad sa Canada nagpakanaog ug “Forest Practices Code” sa pagpanalipod sa nahibiling kalasangan sa British Columbia. Bisan pa niana, natukian sa sunodsunod nga imbestigasyon nga wala panumbalinga sa mga kompaniya sa laging ang mga polisa ug nagpadayon sa pagpamuril sa mga kahoy bisan diha sa titip kaayong mga bakilid. Ang polisa gipaluagan sa 1997, kay ang mga magtotroso nagreklamo nga kini estrikto ra kaayo.

Ang intereses may kalabotan sa negosyo dili lamang mao ang kababagan. Ang kataposang deklarasyon sa Bishkek Summit miila nga ang gubat, kawalad-on, ug kagutom nakapasamot sa kadaot sa sistema sa ekolohiya sa bukid. Ang mga bukid, lakip ang tanang bahin sa planeta, padayon nga madaot kon dili matapos kining tanang hinungdan sa pagkadaot sa puy-anan sa hayop ug tanom.

Ang Kabalaka sa Diyos Alang sa Iyang Kalalangan

Bisan pa niining makaguol nga kahimtang, kita dunay katarongan sa pagbaton ug masanag nga tinamdan sa umaabot. Ang Labing Makagagahom nga Diyos nakakita sa nagakahitabo sa iyang kalalangan. Ang Bibliya naghubit kaniya ingong ang Usa nga ‘nanag-iya sa mga taluktok sa kabukiran.’ (Salmo 95:4) Siya nabalaka usab sa mga hayop sa bukid. Sumala sa Salmo 50:​10, 11, si Jehova nag-ingon: “Ang tagsatagsa ka ihalas nga hayop sa lasang akoa man, ang mga mananap sa ibabaw sa usa ka libo nga kabukiran. Naila ko pag-ayo ang matag pak-an nga linalang sa kabukiran, ug ania uban kanako ang mga panon sa kahayopan sa kapatagan.”

Ang Diyos ba dunay paagi sa pagluwas sa nagakadaot nga kalikopan sa kalibotan? Oo, aduna! Ang Bibliya nag-ingon nga siya “magatukod ug usa ka gingharian nga dili gayod malumpag.” (Daniel 2:44) Si Jesu-Kristo, ang tinudlong Magmamando nianang langitnong kagamhanan, interesado gayod sa yuta ug sa mga tawo nga nagpuyo niana. (Proverbio 8:31) Ang iyang pagmando magpatunhay sa pakigdait sa yuta, magtapos sa tanang pagpahimulos niini, ug mag-ayo sa kadaot nga naagoman sa planeta.​—Pinadayag 11:18.

Kon nangandoy ka niini nga kasulbaran, ikaw sa walay duhaduha magpadayon sa pag-ampo nga ‘moanhi ang gingharian sa Diyos.’ (Mateo 6:​9, 10) Ang maong pag-ampo dili makawang. Ang Gingharian sa Diyos sa dili madugay magtapos sa inhustisya ug magtul-id sa kadaot nga naagoman sa planeta. Sa dihang kini mahitabo, ang mga bukid mismo ‘manghugyaw sa kalipay’ sa mahulagwayong paagi.​—Salmo 98:8.