Nganong Angay Kong Buhaton ang Hago nga Trabaho?
Mga Batan-on Nangutana . . .
Nganong Angay Kong Buhaton ang Hago nga Trabaho?
“Wala gayod ako makahunahuna nga ako magbuhat ug hago nga trabaho. Mas malingaw ako samtang magkompiyuter.”—Nathan.
“Ang pipila ka batan-on nagtamay kanamong nagbuhat ug hago nga trabaho, nga daw kami bugo mao nga dili makabuhat ug laing trabaho.”—Sarah.
HAGO NGA TRABAHO—kini giisip sa daghan ingong puol, hugaw, ug dili-tilinguhaon. Usa ka propesor sa ekonomiks nag-ingon bahin sa hago nga mga trabaho: “Ang maong mga trabaho dili madungganon niining kalibotan nga mahunahunaon sa dungog.” Busa dili katingalahan nga daghang batan-on moyam-id sa ideya mismo sa pagbuhat ug hago nga trabaho.
Bisan pa niana, gidasig sa Bibliya ang lahi kaayong tinamdan bahin sa hago nga trabaho. Si Haring Solomon miingon: “Wala nay laing mas maayo alang sa tawo kay sa mokaon siya ug moinom ug himoon niya ang iyang kalag nga makapahimulos ug maayo sa iyang kahago.” (Ecclesiastes 2:24) Sa panahon sa Bibliya, ang katawhan sa Israel maoy mga mag-uuma. Makapahago pag-ayo sa lawas ang pagdaro, pag-ani, ug paggiok. Bisan pa niana, si Solomon miingon nga ang paghago magantihon kaayo.
Kasiglohan sa ulahi, si apostol Pablo miingon: “Ang kawatan kinahanglan nga dili na mangawat, hinuon maghago siya, nga magbuhat pinaagi sa iyang mga kamot sa maayong buluhaton.” (Efeso 4:28) Si Pablo mismo nagbuhat ug hago nga trabaho. Bisan pag siya edukado kaayo nga tawo, iyang gisuportahan ang iyang kaugalingon pinaagi sa paghimog mga tolda.—Buhat 18:1-3.
Unsay imong hunahuna bahin sa pagbuhat ug pakusog nga trabaho? Kon nakaamgo ka o wala, daghang kaayohan ang imong mabatonan gikan sa hago nga trabaho.
Pagbansay Alang sa Malamposong Kinabuhi
Ang pagbuhat nimog pakusog nga trabaho—pinaagi kaha sa pagmartilyo o pagpamutol sa mga sagbot sa tugkaran—makapahimsog kanimo. Ang
imong pagbaton ug maayong panglawas dili mao lang ang benepisyo. Makaayo ka ba sa nahiyos nga ligid o makailis ug aseite sa kotse? Makaayo ka ba sa nabuak nga bentana o sa baradong lababo? Antigo ka bang moluto? Kanunay bang mahinlo ang inyong banyo mao nga kini libre sa mga mikrobyo? Kini sila maoy mga kahanas nga angayng makat-onan sa mga batan-ong lalaki ug babaye, mga kahanas nga makatabang kanimo aron magmalamposon ka sa pagkinabuhing kinaugalingon sa umaabot.Makaiikag nga si Jesu-Kristo mismo daw nahanas sa pipila ka pakamot nga trabaho samtang dinhi siya sa yuta. Siya nakakat-on sa pagpamanday—sa walay duhaduha gikan sa iyang amaama, si Jose—kay gitawag man siyang panday. (Mateo 13:55; Marcos 6:3) Ikaw makakat-on usab ug nagkadaiyang mapuslanong mga kahanas pinaagi sa pagbuhat ug pakusog nga trabaho.
Pag-ugmad ug Madanihong mga Kinaiya
Ang hago nga trabaho makaapektar usab sa imong pagbati bahin sa imong kaugalingon. Sa dihang nagsulat alang sa U.S. National Mental Health and Education Center, si Dr. Fred Provenzano nag-ingon nga ang pagkat-on ug hago nga mga trabaho makadugang sa imong “pagsalig-sa-kaugalingon ug katibuk-ang pagkamasaligon” ug “makatabang sa kaugmaran sa disiplina-sa-kaugalingon ug kahapsay, nga maoy mga pasukaranan sa malamposong pangempleyo.” Usa ka batan-ong lalaki nga ginganlag John nag-ingon: “Ang hago nga trabaho makatabang kanimo sa pagkakat-on sa pagpailob. Ikaw makakat-on sa pagsulbad ug mga suliran.”
Si Sarah, nga gikutlo ganina, misaysay: “Ang pagbuhat ug hago nga trabaho nagtudlo kanako nga mahimong trabahador ug kugihan. Nakakat-on ako sa pagka-disiplinado sa mental ug pisikal nga paagi.” Puol ba ang hago nga trabaho? Matod ni Nathan: “Nakakat-on ako sa pagkalingaw sa pagbuhat ug pakusog nga trabaho. Samtang ang akong mga kahanas miuswag, nakita ko nga ang kalidad sa akong trabaho miuswag. Kini nakapausbaw sa akong pagtamod-sa-kaugalingon.”
Ang hago nga trabaho makatudlo usab kanimo sa pagkalipay gumikan sa imong kalamposan. Kini ang giingon sa usa ka batan-ong lalaki nga ginganlang si James: “Gusto ko nga mamanday. Bisan pag kini tingali hago usahay, sa kanunay ako makatan-aw sa akong nabuhat ug ako malipay sa akong nahimo. Makapatagbaw gayod kini.” Si Brian adunay samang pagbati: “Gusto kong mokubilkubil ug mga kotse. Ang pagkaamgo nga may katakos ako sa pag-ayo sa guba nga butang ug paghimo niana nga daw bag-o makahatag kanako sa pagbati sa pagkamasaligon ug katagbawan.”
Sagradong Pag-alagad
Alang sa Kristohanong mga batan-on, ang pagbuhat sa hago nga trabaho makatabang sa ilang pag-alagad sa Diyos. Sa dihang si Haring Solomon gitudlo sa pagtukod ug matahom kaayong templo alang kang Jehova, iyang naamgohan nga kadto lisod nga buluhaton nga nagkinahanglan ug labihan ka dakong paghago ug kahanas. Ang Bibliya nag-ingon: “Si Haring Solomon nagpasugo ug nagpakuha kang Hiram gikan sa Tiro. Siya maoy anak nga lalaki sa usa ka babayeng balo gikan sa tribo ni Neptali, ug ang iyang amahan usa ka tawong taga-Tiro, mamumuhat sa tumbaga; ug siya puno sa kaalam ug sa pagsabot ug sa kahibalo sa pagbuhat sa tanang buhat sa tumbaga. Busa siya miadto kang Haring Solomon ug gisugdan pagbuhat ang tanan niyang buluhaton.”—1 Hari 7:13, 14.
Dako nga kadungganan nga si Hiram migamit sa iyang mga kahanas aron sa pagpauswag sa pagsimba ni Jehova! Ang kasinatian ni Hiram nagpasiugda sa kamatuoran sa mga pulong sa Bibliya diha sa Proverbio 22:29: “Nakakita ka na ba ug usa ka tawo nga hanas sa iyang buhat? Siya magatindog sa atubangan sa mga hari; siya dili magatindog sa atubangan sa ordinaryong mga tawo.”
Karong adlawa, bisan ang mga batan-on nga adunay gamay o walay mga kahanas sa pagtukod nakapribilehiyo sa pagtabang pagtukod ug mga Kingdom Hall. Tungod sa ilang pagpakigbahin sa maong mga proyekto, ang pipila nakakat-on ug mapuslanong mga pakamot nga trabaho, sama sa pagka-elektrisyan, pagka-tubero, pagka-kantero, ug pamanday. Ikaw mahimong makigsulti sa inyong mga ansiyano bahin sa posibilidad nga makaambit sa pagtukod ug Kingdom Hall.
Si James, kinsa nakatrabaho sa ubay-ubayng Kingdom Hall, nag-ingon: “Daghan diha sa mga kongregasyon ang wala tingaliy panahon o katakos sa pagtabang. Busa pinaagi sa pagtabang, ikaw nagtabang sa tibuok kongregasyon.” Si Nathan, kinsa nakakat-on sa pagkongkreto, nakadiskobre nga ang maong kahanas nagbukas ug laing pultahan sa pag-alagad ngadto sa Diyos. Siya nahinumdom: “Ako nakaadto sa Zimbabwe ug nakagamit sa akong mga kahanas sa pagtabang pagtukod sa sangang buhatan sa mga Saksi ni Jehova. Tulo ka bulan akong nagtrabaho didto, ug kadto usa sa labing talagsaong mga kasinatian sa akong kinabuhi.” Alang sa ubang batan-on, ang pagkagustog hago nga trabaho nakapadasig kanila sa pag-aplay isip mga boluntaryo sa lokal nga sangang buhatan sa mga Saksi ni Jehova.
Maangkon usab nimo ang usa ka sukod sa “pagkakontento” pinaagi sa pagkahimong hanas sa hago nga trabaho. (1 Timoteo 6:6) Daghang batan-on sa mga Saksi ni Jehova nag-alagad ingong mga payunir o bug-os-panahong mga tig-ebanghelyo. Ang pagkat-on ug usa ka pakamot nga trabaho nakatabang sa pipila sa pagbuhi sa ilang kaugalingon nga wala mogastog daghang panahon ug kuwarta sa pag-eskuyla.
Kon Unsaon Pagkat-on sa Pagbuhat ug Hago nga Trabaho
Tin-aw, kon interesado kang manginabuhi isip artesano o buot lang nga mag-ayoayo sa balay, ikaw makabenepisyo sa pagkakat-on sa pagbuhat ug hago nga trabaho. Ang tunghaan sa inyong dapit basin nagtanyag ug pipila ka kursong bokasyonal. Lagmit makadawat ka usab ug pagbansay diha mismo sa balay. Sa unsang paagi? Pinaagi sa pagkat-on sa pagbuhat sa mga buluhaton sa panimalay. Nagsulat si Dr. Provenzano, nga gikutlo ganina: “Ang mga buluhaton sa panimalay hinungdanon ilabina alang sa mga tin-edyer tungod kay kana magtudlog paninugdang mga kahanas sa panginabuhi nga makatabang sa mga tin-edyer aron sila molampos ug takos magkinabuhing bulag gikan sa ilang mga ginikanan sa dihang modangat na ang maong panahon.” Busa magmaigmat sa pagbuhat kon unsay gikinahanglan sa balay. Angay na bang pamutlon ang sagbot sa tugkaran o ayohon ang estante?
Inay nga makauulaw, ang hago nga trabaho makaayo kanimo sa daghang paagi. Ayaw likayi ang hago nga trabaho! Hinunoa, paningkamot nga “magpahimulos ug maayo” gikan sa imong kahago, kay sumala sa Ecclesiastes 3:13, “kini ang gasa sa Diyos.”
[Blurb sa panid 21]
Ang pagkat-on ug pakamot nga trabaho nakatabang sa daghang batan-on sa pagpauswag sa ilang pag-alagad sa Diyos
[Mga hulagway sa panid 22]
Ang imong mga ginikanan kasagarang makatudlo kanimog paninugdang mga kahanas