Pagpaniid sa Kalibotan
Pagpaniid sa Kalibotan
Sunscreen sa Hippo
“Panalipdan sa hippo ang ilang walay-balhibong panit batok sa adlaw pinaagi sa pagpatunghag sunscreen (losyon batok sa adlaw) nga susama sa komersiyal nga mga produkto nga gigamit sa mga tawo,” nagtaho ang The Independent sa London. Human eksamina ang likido nga migawas sa panit sa usa ka hippo didto sa zoo sa Tokyo, nahibaloan sa mga siyentipiko sa Kyoto, Japan, kon sa unsang paagi kini nanalipod sa panit sa hippo batok sa kadaot sa tropikanhong adlaw ug sa abog. Ang pilitpilit, walay-kolor nga likido inanayng mopula, dayon mobrawon ug mahisamag plastik. Sa dihang kini mobrawon na, kini moaslom pag-ayo, sa ingon magsilbing isog nga pangontra sa kagaw. Ang mibrawon nga likido magsilbi usab nga sunscreen pinaagi sa pagsuhop sa ultraviolet nga kahayag, sama sa obra sa komersiyal nga mga sunscreen. Apan, ang mga kompaniya sa kosmetiko lagmit dili magbaligya sa sunscreen sa hippo sa umaabot, matod pa sa mantalaan, una tungod kay diyutay ra kaayo ang hippo sa kalibotan, ug ikaduha tungod kay ang likido baho kaayo.
Ang Pagbarbel Makapakunhod sa Depresyon sa mga Tigulang
Gipakita sa usa ka pagtuon nga “ang pagbarbel makapakunhod ug 50 porsiyento sa depresyon sa mga tigulang,” nagtaho ang mantalaang Australian. Busa, ang pagbarbel sama rag epekto sa mga medisina nga mopamenos sa depresyon sa mga tigulang, sumala sa espesyalista sa mga tigulang nga si Dr. Nalin Singh sa Royal Prince Alfred Hospital sa Sydney. Sa maong pagtuon, nga naglangkit sa 60 ka lalaki ug mga babaye nga nag-aberids ug 72 anyos, bisan kadtong nag-ehersisyo nga kasarangan lang nakasinati ug “30 porsiyento nga pag-us-os sa depresyon, sama niadtong wala magbarbel apan giatiman sa mga doktor,” nag-ingon ang The Australian. Gawas pa sa pagpamenos sa depresyon, ang pagbarbel makapalig-on sa “mga bukog ug kaunoran sa mga tigulang, nga makatabang kanila nga malikayan ang pagkatumba. Makatabang usab kini sa pagkontrolar sa artraytis, diabetes ug taas nga presyon sa dugo,” nag-ingon ang mantalaan. Si Singh nagsugyot nga ang pagbarbel “angayng itanyag ingong pangunang tambal sa depresyon, ilabina sa mga tigulang.”
Ang TV Nagtudlog Pagkaagresibo
“Ang pagtan-aw ug mga seryal sa telebisyon nagdasig ug nagkalainlaing panggawi sa mga bata nga makadaot sa katilingban, lakip na sa pagpanglibak, pagtabitabi, pagpakaylap ug mga hulungihong, pagbungkag sa mga relasyon sa ubang mga tawo ug pagpanghulga,” sumala sa usa ka pagtuon nga gihubit diha sa mantalaan sa London nga The Times. Ang pagtuon, nga gipresentar ngadto sa British Psychological Society, nakakaplag ug “dakong kalabotan” tali sa pagtan-aw nianang dili-direktang pagkaagresibo diha sa TV ug sa panggawi sa mga batan-on nga makadaot sa katilingban, matod pa sa mantalaan. Ang kinangil-arang mga seryal nag-aberids ug 14 ka kaso sa pagpanglibak sulod sa usa ka oras. Ang tigpakigpulong nga si Sarah Coyne sa University of Central Lancashire, Inglaterra, nabalaka nga ang “kanunay ug walay-puas” nga pagpasundayag sa dili-direktang pagkaagresibo ingong makataronganon, madanihon, o maayog sangpotan naghatag sa mga batan-on ug dili-maayong mga sumbanan.
Layog-Abot nga mga Epekto sa Diyeta nga Menos sa Carbohydrate
Bisan tuod mous-os ang timbang sa mga tigdiyeta tungod sa diyeta nga menos ug carbohydrate, halos walay impormasyon nga mabatonan bahin sa layog-abot nga epekto sa maong mga pagdiyeta. Ang pipila ka mga tigdukiduki nabalaka nga ang daghag-protina nga diyeta mahimong mosangpot sa sakit sa atay ug rinyon, osteoporosis, ug ubang grabeng mga sakit. “Ang kadaghanan sa lamiang pagkaon diha sa mga diyeta nga menos sa carbohydrate—sama sa filet mignon (baga nga hiwa sa karneng baka) nga ituslob sa lami nga sarsa—daghan ug saturated fats nga makasampong sa dagkong mga ugat. . . , nga peligro kaayo sa sakit sa kasingkasing ug estrok,” nag-ingon ang magasing Time. Kasukwahi niini, si Dr. David Katz sa Yale University School of Public Health nag-ingon: “Ang mga diyeta nga dagaya sa lanotlanot ug sa daghag-elemento nga carbohydrate, nga makaplagan diha sa mga prutas, utanon, liso ug mga lugas, napamatud-an diha sa daghang pagtuon nga adunay kalabotan sa pagkataas sa kinabuhi, dumalayon nga pagkontrolar sa timbang, pagmenos sa risgo nga makanser, sa risgo nga masakit sa kasingkasing, sa risgo nga makabaton ug diabetes, pagmenos sa risgo nga masakit sa estomago ug tinai ug makaayo sa lawas.”
Pininturahang mga Kinulit
“Ang mga arkeologo ug mga historyano sa arte nagpanuko sa pagbiya sa ilang panglantaw nga ang bantogang mga kinulit sa karaang panahon wala pinturahi,” sama sa karaang mga Gregong estatwa, nag-ingon ang magasin sa Alemanya nga Spektrum der Wissenschaft. “Ang tinuod mao—kini maanindot kaayog mga kolor.” Bisan pag gihisgotan sa kasaysayan nga dunay pininturahang mga estatwa ug dihay nadiskobrehan nga gagmayng mga timailhan sa kolor diha sa maong mga kinulit, wala kaayo kana tagda sa mga eskolar. Apan, ning bag-o pa, nakita ang dili-direktang pamatuod nga ang mga estatwa pininturahan pinaagi sa pagtuon sa paglubad sa kolor sa mga kinulit. Ang mga kolor sa pintura molubad sa lainlaing gikusgon, nga magladlad sa pipila ka bahin sa estatwa ngadto sa ulan ug init sa dili pa maladlad ang ubang bahin. Ang kalainan sa pagkaladlad magpatungha ug lainlaing dagway sa paglubad sa kolor, nga nagpaila nga ang estatwa gipinturahan ug lainlaing kolor. Morag ang arte sa pagkulit “nakompleto lamang diha sa hunahuna sa mga Grego ug Romano sa dihang napinturahan na kini,” mihinapos ang maong taho.
Abtik-ug-Dila nga mga Tinggalong
Sa unsang paagi ang usa ka tinggalong makapagula sa dila niini nga paspas kaayo aron masikop ang tukbonon? “Ang sekreto mao ang usa ka igpasupot nga mekanismo nga magtipig ug enerhiya sama sa malubaylubay nga bahin sa igpalansad sa dili pa kini buhian,” nagtaho ang magasing New Scientist. Nahibalo ang mga siyentipiko nga ang dila sa tinggalong adunay mga hapinhapin nga gilibotan ug “kaunoran nga nagsilbing akselerador.” Karon, sa abag sa slow-motion nga kuha sa video, ang Olandes nga mga tigpanukiduki nakadiskobre nga 200 ka milisegundo lamang sa dili pa mogula ang dila niini, “gamiton sa tinggalong ang kaunoran nga nagsilbing akselerador aron mosulod ang enerhiya ngadto sa mga hapinhapin sa dila, nga magpatongpatong niini samag mga seksiyon sa usa ka teleskopyo. Sa dihang motukob ang tinggalong, ang natigom nga enerhiya ikapagula sulod lamang sa 20 ka milisegundo, ug tungod niini ang dila mogula” aron sa pagsikop sa tukbonon.
Dili-Matinuohong mga Taga-Britanya
Sa usa ka surbi sa 10,000 ka tawo sa napulo ka nasod, ang Britanya “nalakip sa labing dili matinuohon sa Diyos . . . , nga adunay kinadiyutayan ug mga tawo nga nag-angkon nga sila adunay relihiyosong pagtuo ug nakigbahin sa relihiyosong mga kalihokan,” nag-ingon ang The Times sa London. Bisan tuod 46 porsiyento sa mga taga-Britanya nag-ingon nga nagtuo gayod sila sa Diyos, duha lamang ka nasod, ang Rusya ug ang Republika sa Habagatang Korea, ang mas diyutay ug mga magtutuo. Kapin sa 90 porsiyento sa mga tawo sa Nigeria, Indonesia, ug Lebanon ang nagtuo nga ang ilang diyos mao ang bugtong matuod nga Diyos, apan 3 lamang sa 10 ka taga-Britanya ang mibatig sama niana. Diha sa kadaghanang nasod kapin sa 80 porsiyento ang nag-ingon nga ang pagtuo sa Diyos makapahimo sa usa nga mas maayong tawo, apan 56 porsiyento lamang sa mga taga-Britanya ang miuyon. Bisan tuod 85 porsiyento sa Tinipong Bansa, 99 porsiyento sa Indonesia, ug 83 porsiyento sa Mexico ang nagtuo nga gilalang sa Diyos ang uniberso, 52 porsiyento lamang sa taga-Britanya ang nagtuo niana. Sa dihang gipangutana sila kon ang kalibotan mahimo bang mas malinawon kon walay relihiyon, 6 porsiyento sa Tinipong Bansa, 9 porsiyento sa India, ug 11 porsiyento sa Israel ang miingong oo, apan sa Britanya 29 porsiyento ang miingong oo!