Ang Hunahuna sa Bibliya

Uyon ba ang Diyos sa Kaminyoon sa Parehas ug Sekso?

PANAHON sa seremonyas sa simbahan, ang duha ka lalaki nagtindog nga nagkinuptanay sa kamot atubangan sa iladong Episkopal nga obispo. Sila “nagsinaaray . . . atubangan sa Diyos ug sa simbahan.” Ang obispo, nga nagsul-ob ug daghag-dayandayan nga besti nga kolor bulawan ug puti, nagbendisyon sa ilang panaghiusa atubangan sa publiko. Human niana ang magtiayon naggakos ug naghalok ug ang nanambong nanindog ug namakpak. Matod pa niining obispoha, ang maong homoseksuwal nga mga relasyon “balaan ug takos nga bendisyonan, . . . takos nga tawgong balaan.”

Apan, ang ubang relihiyosong mga lider misupak gayod sa mga kaminyoon sa parehas ug sekso. “Natugaw kaayo kami sa desisyon [sa obispo],” miingon si Cynthia Brust, usa ka tigpamaba sa American Anglican Council, usa ka grupo sa konserbatibong mga Episkopalian. Miingon siya: “Ang pagbendisyon sa mga kaminyoon sa parehas ug sekso kasukwahi sa klarong pagtulon-an bahin sa kaminyoon ug pagpakigsekso nga anaa sa Bibliya,” ug midugang siya nga “ang pagpakigsekso . . . itugot lamang sa lalaki ug babaye nga magminyo.”

Ang mainit nga panaglantugi bahin niining isyuha wala lamang mahitabo diha sa relihiyon. Sa tibuok kalibotan, ang mainit nga politikal nga mga debate nagapadayon, tungod kay dako kaayo ang posibleng epekto niini sa katilingban, politika, ug sa ekonomiya kon ang mga pensiyon, insyurans sa panglawas, ug mga buhis ang nalangkit.

 Ang mga isyu nga naglangkit sa sibil nga mga katungod ug legal nga pag-ila subsob nga komplikado kaayo ug makapabahin sa opinyon sa publiko. Ang matuod nga mga Kristohanon maningkamot gayod nga mahuptan ang pagkaneyutral pinaagi sa paglikay sa politikal nga mga debate. (Juan 17:16) * Apan, ang uban nga nagtahod sa Bibliya naglibog mahitungod sa kaminyoon sa parehas ug sekso ug sa homoseksuwalidad. Unsay imong panglantaw sa kaminyoon sa parehas ug sekso? Unsay sukdanan sa Diyos sa kaminyoon? Unsay epekto sa imong tinamdan nganha sa imong relasyon sa Diyos?

Ang Atong Maglalalang Naghatag sa Sukdanan

Ang atong Maglalalang dugay nang naglatid ug mga lagda nga naggiya sa kaminyoon sa wala pa maghimo ang mga kagamhanan ug mga lagda bahin sa kaminyoon. Ang unang basahon sa Bibliya nagtug-an kanato: “Ang lalaki mobiya sa iyang amahan ug sa iyang inahan ug siya kinahanglang moipon sa iyang asawa ug sila mahimong usa ka unod.” (Genesis 2:24) Ang Hebreohanong pulong nga “asawa,” sumala sa Vine’s Expository Dictionary of Biblical Words, “nagtumong sa usa ka babaye.” Gipamatud-an ni Jesus nga kadtong nayugo sa kaminyoon kinahanglang “lalaki ug babaye.”​—Mateo 19:4.

Busa, katuyoan sa Diyos nga ang kaminyoon mahimong permanente ug suod nga bugkos tali sa lalaki ug babaye. Ang mga lalaki ug babaye gidisenyo nga mahimong katimbang sa usag usa aron ilang matagbaw ang tagsatagsa ka emosyonal, espirituwal, ug seksuwal nga mga panginahanglan ug mga tinguha.

Ang iladong asoy sa Bibliya bahin sa Sodoma ug Gomora nagpadayag sa pagbati sa Diyos bahin sa homoseksuwalidad. Ang Diyos nag-ingon: “Ang tuaw sa pagmulo bahin sa Sodoma ug sa Gomora, oo, kini makusog, ug ang ilang sala, oo, kini mabug-at kaayo.” (Genesis 18:20) Ang gilapdon sa ilang moral nga kadunotan nianang panahona nadayag sa dihang duha ka bisita ang miadto sa matarong nga tawong si Lot. “Ang balay gilibotan sa kalalakin-an sa Sodoma, gikan sa batang lalaki hangtod sa tigulang nga lalaki, ang tanang katawhan ingong usa ka magubtanong panon. Ug sila nagtawag kang Lot ug nag-ingon kaniya: ‘Hain man ang mga lalaki nga mianha kanimo karong gabhiona? Dad-a sila sa gawas ngari kanamo aron kami makigdulog kanila.’” (Genesis 19:​4, 5) Ang Bibliya nag-ingon: “Ang mga tawo sa Sodoma daotan ug hilabihan ka makasasala batok kang Jehova.”​—Genesis 13:13.

Ang mga lalaki “nanag-uros-uros sa ilang kaulag sa usag usa, mga lalaki sa mga lalaki.” (Roma 1:27) Sila “nangagpas sa unod alang sa dili-kinaiyanhong paggamit.” (Judas 7) Sa mga nasod diin kaylap ang mga kampanya alang sa katungod sa mga homoseksuwal, mosupak tingali ang uban nga gamiton ang pulong ‘dili-kinaiyanhon’ sa paghubit sa homoseksuwal nga panggawi. Apan, dili ba ang Diyos mao gayod ang maghukom kon unsay kaharmonya sa kinaiyahan? Iyang gisugo ang iyang katawhan sa karaang panahon: “Dili ka modulog sa lalaki sama sa imong pagdulog sa babaye. Usa kini ka dulumtanang butang.”​—Levitico 18:22.

Imong Tulubagon sa Diyos

Klaro ang giingon sa Bibliya: Ang Diyos dili mouyon o mokonsentir sa homoseksuwal nga mga buhat. Dili usab niya uyonan ang mga tawo nga ‘nagauyon niadtong nagbuhat niana.’ (Roma 1:32) Ug ang “kaminyoon” dili makapahimo sa homoseksuwalidad nga talahoron tan-awon. Ang sugo sa Diyos nga himoon nga “dungganon ang kaminyoon taliwala sa tanan” wala maglakip sa kaminyoon sa mga homoseksuwal, nga iyang giisip nga dulumtanan.​—Hebreohanon 13:4.

Bisan pa niana, uban sa tabang sa Diyos, si bisan kinsa makakat-on sa ‘pag-ayad sa pakighilawas,’ nga naglakip sa homoseksuwal nga mga buhat, ug sa “paghupot sa iyang kaugalingong sudlanan diha sa kabalaan ug kadungganan.” (1 Tesalonica 4:​3, 4) Tinuod, kini dili gayod sayon. Si Nathan *, nga usa ka homoseksuwal kaniadto, miingon: “Abi nakog dili gayod ako makahunong.” Apan nagbag-o siya uban sa tabang sa “espiritu sa atong Diyos.” (1 Corinto 6:11) Ingon sa nadiskobrehan ni Nathan, walay problema nga dili masulbad ni Jehova, kinsa makahatag ug kalig-on ug tabang nga gikinahanglan aron sa pagkab-ot sa Iyang mga sukdanan ug pagdawat sa Iyang mga panalangin.​—Salmo 46:1.

[Mga footnote]

[Picture Credit Line sa panid 26]

Photo by Chris Hondros/Getty Images