Gikan sa Among mga Magbabasa

Pagkabatan-on Salamat sa seryeng “Pagsagubang sa mga Kalisdanan sa Pagkabatan-on.” (Hulyo 8, 2004) Bag-o lang ako nga natin-edyer ug nakaagom ko ug pipila ka problema nga nakahasol sa akong tanlag. Pinaagi niining mga artikuloha, nakadawat ako ug hinungdanong tambag nga motabang kanako sa paghinumdom sa akong Dakong Maglalalang. Naglaom ko nga sa akong pagkatin-edyer dili nako maagoman ang mga kasakit nga modangat niadtong magpahaylo sa kalibotan.

R. R., Albania

Sa bata pa ako, daghan kog mga higala nga kaedad nako. Apan sa nagkadako kami, dili na kami mag-estoryahanay. Human sa Kristohanong mga tigom, maglingkod lang ko sa sulod sa kotse ug dili makig-estorya sa uban. Nahupayan ako sa dihang akong nabasa nga ang mga tin-edyer kasagarang makasinati ug lainlaing mga emosyon ug nga ang usa sa labing maayong mga paagi sa pagbuntog sa kamingaw mao ang pagpakitag interes sa uban​—apil na niadtong dili nimo mga kaedad. Niadtong adlawa sa among tigom, nakig-estorya ako sa uban, way sapayan sa ilang edad, ug nakapalipay kini kanako.

M. K., Japan

Ako 15 anyos, ug gikinahanglan kaayo nako kini nga impormasyon. Ang mga batan-on nga gikutlo nakatabang kanako sa pagkasayod nga dili ra diay ako ang nakigbisog niining masakit nga emosyon ug nga kining mga pagbatia mabuntog ra. Kini nakapalig-on ug nakadasig kanako!

L. R., Ukraine

Salamat niini nga serye. Makapahupay ang pagkahibalo nga posibleng masagubang kining makapalibog nga yugto. Ako naglaom nga kining mga artikuloha makatabang sa ubang mga batan-on sa pagsagubang niini nga yugto sa kinabuhi sa balanse nga paagi.

R. V., Italya

Mao gayod kini nga serye ang akong gipangita. Ako malipay ug unya maguol na sab, ug usahay ako wala gayoy pagsalig sa kaugalingon ug mamingawon. Nagtuo gayod ko nga ako ra poy nakaingon niining akong gibati. Apan ang kataposang artikulo niini nga serye nag-ingon: “Gusto ni Jehova nga Diyos nga magmalipayon ka​—tinuod nga malipayon. Kana dili taphaw nga kalipay nga nagtago lamang sa nagpahipi nga kaguol.” Mitulo ang akong mga luha sa dihang nabasa nako kining mga pulonga. Ang artikulo nag-ingon usab nga sa ngadtongadto kining makatugaw nga mga pagbati mawala ra. Nakahupay gayod kini kanako. Milagsik na usab ako. Daghan kaayong salamat!

H. T., Japan

Sa dihang nakita nako kini nga magasin sa Kingdom Hall, gipakli dayon nako ang mga panid niini. Wala nako kini lung-i sa dihang gibasa nako kini sa balay. Apan, naminghoy kaayo ako sa dihang natapos nako kini pagbasa tungod kay dili nako gustong mahuman ang artikulo! Padayona ninyo ang pagsulat ug sama niini nga mga artikulo!

K. C., Tinipong Bansa

Mga Keyboard Ako 12 anyos. Salamat sa artikulong “Anaa sa Imong mga Tudlo ang Usa ka Kalibotan sa Musika.” (Hulyo 8, 2004) Mipalit ko ug libro bahin sa mga instrumento sa musika, nga nagpatin-aw bahin sa keyboard nga mga instrumento. Ang mga detalye bahin sa keyboard gipatin-aw apan dili sama sa pagpatin-aw niini diha sa Pagmata! Dugay na kong nangita ug ingon niana nga artikulo! Ang katakos sa pagtugtog ug instrumento sa musika maoy nindot gayod nga gasa gikan sa atong Maglalalang!

D. G., Alemanya

Pagpanghasi Dili pa dugay, dihay Saksi ni Jehova nga mihatag nako ug magasin nga dunay seryeng “Gihasi Diha sa Trabahoan​—Unsay Imong Mahimo? (Mayo 8, 2004) Tungod sa pagdaogdaog (pagpanghasi) diha sa trabahoan, ang usa nako ka kaila mihawa sa iyang trabaho. Sa Alemanya, kana nagpasabot nga wala siyay madawat nga mga benepisyo samtang walay trabaho sulod sa tulo ka bulan. Naningkamot ko kutob sa akong maarangan sa pagtabang sa batan-ong lalaki. Apan ang inyong magasin, nga akong gisukip uban sa usa ka sulat ngadto sa opisina sa pagpangempleyo, maoy nakatabang ug dako nga ang batan-ong lalaki nakadawat ug mga benepisyo paglabay sa tulo ka adlaw!

R. S., Alemanya