“Kadtong Gipanagtawag nga ‘mga Diyos’”

SA DIHANG giayo ni apostol Pablo ang usa ka tawong bakol sa Listra, ang mga tawo naninggit: “Ang mga diyos nahimong sama sa mga tawo ug nanaog nganhi kanato!” Gitawag nila si Pablo nga Hermes, ug ang iyang kaubang si Bernabe, nga Zeus. (Buhat 14:8-14) Sa Efeso, ang platero nga si Demetrio nagpasidaan nga kon si Pablo tugotan sa pagpadayon pagwali, ‘ang templo sa bantogang diyosa nga si Artemis isipon unya nga walay kapuslanan.’​—Buhat 19:24-28.

Ang mga tawo sa unang siglo​—sama sa daghan karon​—nagsimba niadtong “gipanagtawag nga mga ‘diyos,’ sa langit man o sa yuta.” Sa pagkatinuod, si Pablo miingon: “Adunay daghang ‘diyos’ ug daghang ‘ginoo’.” Hinunoa, siya usab misaysay: “Alang kanato sa pagkatinuod adunay usa lamang ka Diyos nga Amahan,” ug “adunay usa ka Ginoo, si Jesu-Kristo.”​—1 Corinto 8:​5, 6.

Si Jesus ba Gitawag Usab nga Diyos?

Bisan tuod si Jesus wala gayod mangangkon nga Diyos, ingong tinudlo nga magmamando ni Jehova, siya gipaila sa tagna ni Isaias pinaagi sa mga terminong “Diyos nga Gamhanan” ug “Prinsipe sa Pakigdait.” Ang tagna ni Isaias midugang: “Sa kadagaya sa prinsipenhong pagmando ug sa pakigdait walay kataposan.” (Isaias 9:​6, 7) Busa, ingong “Prinsipe”​—ang anak sa Bantogang Hari, si Jehova​—si Jesus moalagad ingong Magmamando sa langitnong gingharian sa “Diyos nga Labing Gamhanan.”​—Exodo 6:3.

Apan, ang usa ka tawo basin mangutana, ‘Sa unsang diwa si Jesus usa ka “Diyos nga Gamhanan,” ug dili ba miingon man si apostol Juan nga si Jesus mismo maoy Diyos?’ Sa New Cebuano Version nga Bibliya, ang Juan 1:1 mabasa: “Sa sinugdan mao ang Pulong, ug ang Pulong kauban sa Diyos, ug ang Pulong Diyos.” Ang uban moergo nga kini nagkahulogan nga “ang Pulong,” nga natawo sa yuta ingong ang batang si Jesus, mao ang Labing Gamhanang Diyos mismo. Tinuod ba kini?

Kon kining tekstoha sabton nga si Jesus mao ang Labing Gamhanan nga Diyos mismo, kini mosumpaki sa nag-unang pahayag, “ang Pulong kauban sa Diyos.” Ang usa ka tawo nga “kauban” sa laing tawo dili mahimong mao ra nianang lain nga tawo. Busa, daghang maghuhubad sa Bibliya naghimog pagpalahi, nga nagpatin-aw nga ang Pulong dili mao ang Labing Gamhanan nga Diyos. Pananglitan, ang pipila ka hubad sa Bibliya miingon sa mosunod: “Ang Pulong Diyos,” “diyos ang Pulong,” ug “ang Pulong balaan.” *

Ang mga teksto sa Bibliya nga sa Gregong pinulongan  samag pagkabalay sa mga pulong sa Juan 1:1 migamit sa ekspresyong “usa ka diyos.” Pananglitan, sa dihang nagtumong kang Herodes Agripa I, ang mga tawo naninggit: ‘Usa ka diyos ang namulong.’ Ug sa dihang si Pablo wala mamatay dihang napaakan ug lalang bitin, ang mga tawo miingon: “Siya usa ka diyos.” (Buhat 12:22; 28:3-6) Nahiuyon sa Gregong gramatika ug pagtulon-an sa Bibliya ang paghisgot sa Pulong ingong, dili Diyos, kondili “usa ka diyos.”​—Juan 1:1.

Tagda kon giunsa ni Juan pagpaila “ang Pulong” sa unang kapitulo sa iyang Ebanghelyo. “Ang Pulong nahimong unod ug mipuyo sa atong taliwala,” siya misulat, “ug nakita nato ang iyang himaya, ang himaya nga ingon sa iya [dili sa Diyos kondili] sa bugtong nga anak gikan sa amahan.” Busa “ang Pulong,” nga nahimong unod, nagpuyo sa yuta ingong tawo nga si Jesus ug nakita sa mga tawo. Busa, dili posibleng siya ang Labing Gamhanan nga Diyos, nga bahin kaniya si Juan miingon: “Walay tawo nga nakakita sa Diyos sa bisan unsang panahon.”​—Juan 1:​14, 18.

‘Nan, ngano man,’ ang usa tingali mangutana, ‘nga si Tomas miingon dihang nakita niya ang binanhawng si Jesus, “Ginoo ko ug Diyos ko!”?’ Ingon sa gipakita na, si Jesus maoy usa ka diyos sa diwa nga siya balaan, apan dili siya ang Amahan. Mao pa lay pag-ingon ni Jesus kang Maria Magdalena: “Ako mosaka ngadto sa akong Amahan ug inyong Amahan ug ngadto sa akong Diyos ug inyong Diyos.” Hinumdomi, usab, kon nganong gisulat ni Juan ang iyang Ebanghelyo. Tulo ka bersikulo human sa asoy bahin ni Tomas, gipatin-aw ni Juan nga siya misulat aron ang mga tawo “motuo nga si Jesus mao ang Kristo nga Anak sa Diyos”​—dili nga siya ang Diyos.​—Juan 20:​17, 28, 31.

Kinsa ang ‘Diyos Niining Kalibotana’?

Dayag nga adunay daghang diyos. Ang uban kanila, ingon sa ato nang nahisgotan, ginganlan diha sa Bibliya. Bisan pa niana, ang mga tawo nga nakakita sa gahom ni Jehova sa karaang panahon miingon: “Si Jehova mao ang matuod nga Diyos! Si Jehova mao ang matuod nga Diyos!” (1 Hari 18:39) Hinunoa, duna pay laing diyos nga duna poy gahom. Ang Bibliya nag-ingon: “Ang diyos niini nga sistema sa mga butang nagbuta sa mga hunahuna sa mga dili-magtutuo.”​—2 Corinto 4:4.

Sa gabii una siya namatay, si Jesus tulo ka beses nga nagpasidaan sa iyang mga tinun-an batok niining maong diyos, nga nagtawag kaniya nga “ang magmamando niining kalibotana.” Si Jesus miingon nga kining gamhanang magmamando, o diyos, “palagpoton.” (Juan 12:31; 14:30; 16:11) Kinsa man kining maong diyos, ug unsa ang kalibotan nga niana siya nagmando?

Siya walay lain kondili ang rebeldeng manulonda, si Satanas nga Yawa. Giunsa nato pagkasayod? Ang Bibliya nagpatin-aw nga sa dihang gitental ni Satanas si Jesus, gipakita ni Satanas kaniya “ang tanang gingharian sa kalibotan ug ang ilang himaya, ug iyang giingnan siya: ‘Kining tanan nga butang ihatag ko kanimo kon mohapa ka ug mohimog usa ka buhat sa pagsimba kanako.’” (Mateo 4:​8, 9) Kining maong tanyag dili gayod unta usa ka tentasyon kon si Satanas nagtanyag pa kang Jesus ug butang nga dili iya ni Satanas. Sa pagkatinuod, si apostol Juan miingon: “Ang tibuok kalibotan nailalom sa gahom sa usa nga daotan.”​—1 Juan 5:19.

Hinumdomi nga si Jesus nagsaad: “Ang magmamando niining kalibotana palagpoton.” (Juan 12:31) Sa pagkatinuod, kining kalibotana, o sistema sa mga butang, lakip ang magmamando niini, pagawagtangon, ingon sa gitagna ni apostol Juan sa dihang siya miingon: “Ang kalibotan nagakahanaw.” Apan, si Juan midugang: “Siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:17) Atong susihon karon ang mahimayaong mga katuyoan sa bugtong matuod nga Diyos ug kon sa unsang paagi kita makabenepisyo gikan niana.

[Footnote]

[Hulagway sa panid 8, 9]

Ang katawhan sa Listra naaghat sa pagtawag kang Pablo ug Bernabe nga mga diyos

[Hulagway sa panid 8, 9]

Si Jesus miingon kang Maria Magdalena: ‘Ako mosaka sa akong Diyos ug inyong Diyos’