Angay Bang Mogamit ug mga Estampa sa Pagsimba?
Ang Hunahuna sa Bibliya
Angay Bang Mogamit ug mga Estampa sa Pagsimba?
MATAG Agosto 15, adunay dakong relihiyosong selebrasyon nga himoon diha sa isla sa Tínos sa Gresya. Libolibo ang magtapok sa pagsimba kang Maria nga inahan ni Jesus ug sa iyang estampa, nga gituohang dunay milagrosong gahom. * Usa ka Grego Ortodoksong basahon nagpatin-aw: “Uban ang talagsaong pagtuo ug debosyon kami nagpasidungog sa Labing Balaang Teotokos, ang Inahan sa atong Ginoo, ug kami naghangyo alang sa iyang proteksiyon ug sa iyang dihadiha nga panalipod ug tabang. Kami nangayog tabang sa milagrosong mga Santos—Balaang mga lalaki ug babaye—alang sa among espirituwal ug pisikal nga mga panginahanglan . . . Uban ang halalom nga debosyon kami mohalok ug mosimba sa ilang balaang mga relikyas ug sagradong mga estampa.”
Daghan sa ubang nag-angkong mga Kristiyano maoy mga membro sa mga denominasyon nga dunay sama niana nga mga buhat sa pagsimba. Apan ang paggamit ba ug mga estampa sa pagsimba gitudlo sa Bibliya?
Ang Unang mga Kristohanon
Tagda ang nahitabo sa mga tuig 50 K.P. sa dihang miduaw si apostol Pablo sa Atenas, usa ka siyudad diin gipasiugda pag-ayo ang paggamit ug mga imahen sa pagsimba. Gipatin-aw ni Pablo sa mga taga-Atenas nga ang Diyos “wala magpuyo sa hinimog-kamot nga mga templo, ni siya pagaatimanon sa tawhanong mga kamot nga maorag siya nanginahanglan pa ug bisan unsa . . . Busa, . . . kita dili angayng maghunahuna nga ang Mao nga Diyos maoy sama ug bulawan o plata o bato, samag butang nga kinulit sa kabatid ug pagkamamugnaon sa tawo.”—Buhat 17:24, 25, 29.
1 Juan 5:21) Si Pablo misulat sa mga taga-Corinto: “Aduna bay panag-uyon ang templo sa Diyos uban sa mga idolo?” (2 Corinto 6:16) Daghan sa unang mga Kristohanon naggamit kaniadto ug relihiyosong mga imahen sa pagsimba. Si Pablo nagpahinumdom sa mga Kristohanon sa Tesalonica bahin niini sa dihang siya misulat: ‘Miliso kamo ngadto sa Diyos gikan sa inyong mga idolo aron magpaulipon sa buhi ug matuod nga Diyos.’ (1 Tesalonica 1:9) Tin-aw nga ang panglantaw sa maong mga Kristohanon bahin sa mga estampa sama usab sa panglantaw ni Juan ug Pablo.
Sa pagkatinuod, ang maong mga pasidaan batok sa paggamit ug mga idolo naandan na diha sa Kristohanon Gregong Kasulatan, nga gitawag usab ug Bag-ong Tugon. Pananglitan, gitambagan ni apostol Juan ang mga Kristohanon: “Pagbantay kamo gikan sa mga idolo.” (Paggamit ug Estampa sa mga “Kristiyano”
Ang Encyclopædia Britannica nag-ingon nga “sa unang tulo ka siglo sa Kristiyanong Simbahan, . . . walay naglungtad nga mga buhat sa arte nga may Kristiyanong tema, ug gibabagan gayod kini sa simbahan sa katibuk-an. Pananglitan, si Clement sa Alejandria nagsaway sa relihiyoso (pagano) nga mga buhat sa arte tungod kay nagdasig kini sa mga tawo sa pagsimba sa linalang inay sa Maglalalang.”
Nan, sa unsang paagi napopular kaayo ang paggamit ug mga estampa? Ang Britannica nagpadayon sa pag-ingon: “Sa mga tungatunga sa ika-3 nga siglo, ang Kristiyanong Simbahan misulay paggamit ug pagdawat ug artistikong mga hulagway apan supak kaayo niini ang pipila ka kongregasyon. Sa diha lamang nga ang Kristiyanong Simbahan nahimong opisyal nga relihiyon sa Romanhong imperyo ilalom ni Emperador Constantino sa unang bahin sa ika-4 nga siglo nga gigamit ang mga hulagway diha sa mga simbahan, ug niadtong tungora kini gisugdan sa pagdawat ingong naandan nga Kristiyanong buhat.”
Ang usa ka naandang buhat sa daghang pagano nga niadtong tungora nagsugod na sa pag-angkong mga Kristiyano mao ang pagsimba sa hulagway sa emperador. “Ingong pagsubay sa kulto sa emperador,” nagpatin-aw si John Taylor diha sa iyang librong Icon Painting, “gisimba sa mga tawo ang iyang hulagway nga gidibuho diha sa lona o kahoy, ug kana nga buhat dali nga mitultol ngadto sa pagsimba sa mga estampa.” Sa ingon ang paganong pagsimba ug mga hulagway gipulihan sa pagsimba sa mga hulagway ni Jesus, Maria, mga manulonda, ug “mga santos.” Kining mga hulagwaya nga gisugdan paggamit diha sa mga simbahan anam-anam nga gigamit diha sa mga balay sa milyonmilyong tawo ug gisimba usab didto.
Pagsimba “Uban sa Espiritu ug Kamatuoran”
Gisultihan ni Jesus ang iyang mga mamiminaw nga ang mga alagad sa Diyos kinahanglang mosimba “uban sa espiritu ug kamatuoran.” (Juan 4:24) Busa kon ang usa ka sinserong tawo gustong mahibalo sa kamatuoran bahin sa paggamit ug mga estampa sa pagsimba, kinahanglang modangop siya sa Pulong sa Diyos aron malamdagan maylabot niini.
Pananglitan, ang Bibliya naundan sa mga pulong ni Jesus: “Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.” (Juan 14:6) Si Pablo mipahayag nga “adunay usa ka Diyos, ug usa ka tigpataliwala sa Diyos ug sa mga tawo, usa ka tawo, si Kristo Jesus,” ug nga ‘si Kristo nangamuyo alang kanato.’ (1 Timoteo 2:5; Roma 8:34) Kini mahimong mas makahuloganon sa dihang atong mabasa nga si Kristo makaarang “sa pagluwas sa bug-os kanilang nagaduol sa Diyos pinaagi kaniya, tungod kay siya buhi man kanunay aron sa pagpangamuyo alang kanila.” (Hebreohanon 7:25) Kinahanglang moduol kita sa Diyos pinaagi sa ngalan ni Jesu-Kristo. Ang ubang mga persona, ug siyempre ang walay-kinabuhi nga estampa, dili makahulip kaniya. Ang maong kahibalo gikan sa Pulong sa Diyos makatabang sa tanang nangita sa kamatuoran aron makaplagan ang paagi sa pagsimba “sa Amahan uban sa espiritu ug sa kamatuoran” ug aron matagamtam ang mga panalangin niining superyor nga paagi sa pagsimba. Sa pagkatinuod, sama sa giingon ni Jesus, “ang Amahan nagapangita sa mga ingon kanila aron magasimba kaniya.”—Juan 4:23.
[Footnote]
^ Kasagaran, ang usa ka relihiyosong estampa maoy hulad o simbolo nga gisimba sa mga membro sa usa ka partikular nga relihiyon. Pananglitan, diha sa Ortodoksong Simbahan sa Silangan, ang pipila niini maoy mga hulad ni Kristo; ang uban naghawas sa Trinidad, “mga santos,” manulonda o, sama sa gihisgotan sa itaas, naghawas kang Maria nga inahan ni Jesus. Minilyon ka tawo dunay masimbahong tinamdan sa mga estampa sama nianang tinamdan sa daghang tawo alang sa mga imahen nga gigamit sa pagsimba. Ang pipila ka relihiyon nga wala mag-angkong Kristiyano dunay sama niana nga pagtuo ug pagbati bahin sa mga estampa ug mga imahen sa ilang mga diyos.
[Picture Credit Line sa panid 20]
Boris Subacic/AFP/Getty Images