Bag-ong Puy-anan sa Usa ka Nagluya nga Goryon
Bag-ong Puy-anan sa Usa ka Nagluya nga Goryon
“KULANG pa ba diay ning atong trabaho nga imo pa mang dugangan?” Kana ang akong unang reaksiyon sa dihang ang akong asawa nagdala sa balay ug usa ka gamitoy nga goryon nga nahulog gikan sa salag niini. Apan daw gihilap ang akong kasingkasing sa gitan-aw nakog maayo ang nagkurogkurog nga langgam. Sa gihapon, naghunahuna ako kon mabuhi pa kaha kining nagluya nga linalang. *
Sa sinugdan, kinahanglan pang among puyokon ang langgam aron mokaon ug diyutayng lawot. Apan sa pagkaugma, ang gamitoy nga goryon nagsige na lag piyakpiyak aron siya pakan-on. Madungog pa gani hangtod sa hagdanan ang iyang siyapsiyap, lapos sa duha ka pultahan sa among apartment!
Gipadayag sa balhibo sa langgam nga siya usa diay ka baye. Ngadtongadto, kini naulian ug kusog ug nakalupad na. Apan napakyas kami sa pagpalupad kaniya ngadto sa gawas! ‘Basig wala pa siyay igong kaisog nga mobiya sa balay,’ maoy among pangagpas. Mao nga nagpalit mi ug halwa ug gihimo namong binuhi ang among gamitoy nga goryon. Ginganlan namo siya ug “Spatzi,” usa ka mapinanggaong porma sa Alemang pulong nga nagkahulogang “goryon.”
Usa ka adlaw niana nag-andam kamig diyutayng kan-on, nga daw usa sa paboritong mga pagkaon ni Spatzi. Kay init pa man kaayo kadto, gipadaplin una kini sa akong asawa ug nagsabod hinuon ug pipila ka tipasi atubangan kang Spatzi. Unsay reaksiyon sa among gamitoy nga langgam? Gikiling ang iyang ulo ug unya ginamit ang iyang sungo iyang giduso ang mga tipasi paingon sa ngilit sa lamesa hangtod nangahulog! Kay nakurat, nagtinan-away mi sa akong asawa ug nangatawa. Mao nga amo dayong gibutang ang diyutayng kan-on nga bugnaw na diha sa atubangan ni Spatzi, nga daw gilamian pag-ayo niini!
Ang pag-atiman niining makalingaw nga gamitoyng langgam magpahinumdom sa gisulti ni Jesus sa iyang mga disipulo: “Dili ba ang duha ka goryon ikabaligya man sa usa ka sensilyo nga gamay ug bili? Bisan pa niana, walay usa kanila ang mahulog sa yuta nga dili mahibaloan sa inyong Amahan.” Dayon si Jesus miingon kanila: “Ayaw kamo kahadlok: kamo labaw pag bili kay sa daghang goryon.”—Mateo 10:29-31.
Pagkamakapahupay ang pagkahibalo nga si Jehova makakita sa atong mga kalisdanan ug mahinumdom sa atong paglahutay. (Isaias 63:9; Hebreohanon 6:10) Oo, ang kahangawa nga atong bation alang sa usa ka gamitoy nga langgam nagpaila lamang sa gugma ni Jehova nga Diyos alang niadtong nag-alagad kaniya!—Tinampo.
[Footnote]
^ Sa pipila ka kahimtang, ang usa ka tawo basin masakit o makalapas sa lokal nga mga ordinansa sa dihang siya mag-atiman sa usa ka masakiton o nagluya nga langgam.