Gikan sa Among mga Magbabasa

Panglimbong Buot kong masayod kamo nga mapasalamaton kaayo ako sa serye nga “Panalipdi ang Imong Kaugalingon Batok sa Panglimbong.” (Hulyo 22, 2004) Aduna koy gamayng negosyo sa akong balay, ug nabiktima ako sa panglimbong. Ang akong gibati susama gayod nianang gihubit diha sa serye​—kaulaw, ug pagkasad-an tungod kay nabiktima sa panglimbong. Akong gisunod ang gitambag sa serye. Gidawat nako ang akong sayop, nag-ampo kang Jehova, ug nakigsulti sa akong higala nga ansiyano. Tungod niining mga artikuloha, akong nasulbad kining butanga. Nahupayan gayod ako!

T. G., Tinipong Bansa

Pagpakigsekso Una Magminyo Napalig-on gayod ako sa artikulong “Mga Batan-on Nangutana . . . Unsay Daotan sa Pagpakigsekso Una Magminyo?” (Hulyo 22, 2004) Ang mga hunahuna nga gipahayag sa mga batan-on nga gikutlo diha sa artikulo susama gayod sa akong panghunahuna. Natandog gayod ako sa mga pulong diha sa Salmo 84:​11, nga nagsulti kanato nga walay bisan unsang butang maayo nga ihikaw ni Jehova gikan niadtong naglakaw sa katarong.

T. U., Alemanya

Ingong batan-on, naningkamot gayod ako kutob sa akong maarangan sa pagpabiling putli sa mga mata ni Jehova, apan usahay dili kini sayon. Kining artikuloha nagpalig-on sa akong determinasyon ug nagpahinumdom kanako nga dili ra ako ang nag-atubang ug mga pagpit-os gikan sa kalibotan ni Satanas. Makapadasig gayod ang pagkahibalo nga gimahal pag-ayo ni Jehova ang mga batan-on.

F. B., Botswana

Panagway Buot kong magpasalamat kaninyo sa artikulo nga “Sa Dihang Naghinobra na ang Kabalaka Bahin sa Panagway.” (Hulyo 22, 2004) Ako 21 anyos, ug naghunahuna gayod ako nga mas dako ako kay sa ubang mga tawo. Karon gusto nakong mahuptan ang katahom sa sulod nga pagkatawo. Morag ang artikulo gisulat para nako!

N. U., Japan

bIkasubo, karong mga adlawa gipatuo kita nga kinahanglang makabaton kitag hingpit nga lawas. Usahay kinahanglan kining pakigbisogan, ug maguol gayod ako nga napakyas sa pagdaog niini. Apan gusto kong magpadayon sa pagpakigbisog niini, ug kining artikuloha dako kaayog tabang!

D. P., Alemanya

Post-Polio Syndrome (PPS) Salamat sa kaagi ni Jack Meintsma diha sa artikulong “Sa Dihang Matakboyan, Mameligrong Matakboyan Pag-usab.” (Hulyo 22, 2004) Nag-antos ako sa polyarthritis sa 23 na ka tuig apan may mga simtoma ako nga susama nianang gihisgotan diha sa artikulo. Gusto nakong pasalamatan si Brader Meintsma sa impormasyon nga iyang gipaambit mahitungod sa mapuslanong mga aparato ug kon unsay buhaton aron dili kaayo mahago ang naapektohang kaunoran.

U. K., Austria

Ako natakboyan ug polyo sa dihang ako nag-edad ug duha ka tuig ug tunga ug natakboyan ug PPS sa nag-edad ako ug 25. Ang mga doktor dili pamilyar niining sakita, ug naglisod sila sa pagdayagnos niini. Sa wala pa makabasa niining artikuloha, wala gayod ako makakitag sama ka detalyadong impormasyon bahin niining ulohana.

J. E., Pransiya

Ang akong inahan gitakboyan ug poliomyelitis sa dihang sayis anyos pa siya. Ang tukmang kahubitan bahin sa maong sakit nakatabang kanako sa pagsabot sa iyang kahimtang.

T. V., Italya

Ako natakboyan ug polyo sa 18 pa lang ka bulan ang edad, apan wala ako maapektahi nga ingon ka grabe kang Brader Meintsma. Apan, morag luya ako tungod sa huyang nga kaunoran. Ang artikulo nakatabang kanako sa pagsabot kon sa unsang paagi dili ako mahago pag-ayo. Ang kinadak-ang kaayohan gikan sa artikulo mao ang pagkabasa nga si Jehova nakakita ug nahingawa!

L. J., Tinipong Bansa