Mga Batan-on nga Nangitag mga Tubag

Sa dihang gihimo ang ika-17 nga Catholic World Youth Day didto sa Toronto, Canada, niadtong 2002, ginatos ka libong tawo ang nangadto gikan sa tibuok kalibotan. Bisan tuod wala makigbahin sa maong okasyon, gidahom sa mga Saksi ni Jehova nga mangabot ang daghang batan-on diha sa siyudad. Sa unsang paagi nangandam sila alang niini? Ilang gipahimuslan ang maong okasyon sa pagpakigsulti kanila bahin sa Kasulatan sama sa tinamdan sa unang-siglong mga Kristohanon.​—Buhat 16:​12, 13.

Gidayeg sa mga Saksi kining mga batan-ona tungod sa ilang interes sa espirituwal nga mga butang. Kini mitultol ngadto sa daghang mahigalaong mga panaghisgot bahin sa Kasulatan. Sa dihang gipangutana sa usa ka Saksi kon natuman ba sa World Youth Day ang iyang gidahom, usa ka batan-ong babaye mitubag: “Buweno, sa pagkakaron nalingaw mi sa musika ug sayaw, apan walay nakapalig-on sa akong pagtuo.”

Dayon gitanyagan sa Saksi ang maong babaye ug brosyur nga nag-ulohang Usa ka Basahon Alang sa Tanang Tawo, nga nagpatin-aw nga kini nagtubag sa daghang pangutana nga gisukna sa mga tawo bahin sa Bibliya, sama sa “Mao ba gayod kini ang Pulong sa Diyos?” ug “Sa unsang paagi mahibalo kita nga kini wala mausab sukad nga kini unang gisulat?”

Ang babaye mitubag: “Mao kanang mga pangutanaha ang nakapalibog kanako. Gusto nakong matubag ang akong mga pangutana. Basahon dayon nako kini. Lagmit mao kini ang labing hinungdanong butang nga akong makuha gikan niining biyahea.”

Usa lamang kana sa daghang panaghisgot nga nahimo sa mga Saksi uban sa mga delegado sa Catholic World Youth Day. Kon gusto usab nimong makabatog kopya sa 32-panid nga brosyur nga Usa ka Basahon Alang sa Tanang Tawo, pil-api lang ang nagaubang kupon ug ipadala kana ngadto sa adres nga gipakita diha sa kupon o ngadto sa nahiangayng adres nga gilista sa panid 5 niining magasina.

□ Interesado akong makadawat ug kopya sa brosyur nga Usa ka Basahon Alang sa Tanang Tawo.

□ Palihog kontaka ako mahitungod sa usa ka libreng pagtuon sa Bibliya sa balay.