Gikan sa Among mga Magbabasa

Pagkat-on Ako usa ka magtutudlo, ug bag-o lang nakong natapos pagbasa ang serye sa mga artikulo nga may ulohan sa hapin nga “Bata o Tigulang​—Mahimo Kang Malingaw sa Pagkat-on.” (Agosto 8, 2004) Mahibulong gayod ako kon giunsa ninyo pagsulat ang mga artikulo nga mubo, klaro, ug mapuslanon kaayo. Nakadayeg gayod ako sa inyong kaikag sa pagdasig sa mga tawo sa tanang pangedaron sa pagkat-on.

F. S., Italya

Sa dihang ako anaa na sa ikatulong tuig sa hayskul, wala na gayod ako ganahing motungha sa eskuylahan mao nga gitugotan ako sa akong mga ginikanan sa pagtuon nga ako-ako ra diha sa balay. Ako karon 20 anyos na, ug nalipay ako nga ganahan na usab akong magtuon. Ang pagbasa niini nga serye nagpahinumdom kanako nga mahimong kalipayan sa tanang tawo ang pagtuon bisan unsa pay ilang mga kahimtang.

N. G., Tinipong Bansa

Naglisod ako sa pagdumala sa akong panganay nga anak nga lalaki, kinsa nag-edad ug pito ka tuig. Daw dili gayod siya ganahang mobasa ug mga libro, mohimog mga asaynment sa eskuylahan, ug mokat-on diha sa Kristohanong mga tigom. Nagplano ako sa pagpadapat sa tambag niini nga serye.

M. O., Japan

Usa sa mga gisugyot sa artikulo mao ang paghimog mubo nga repaso human sa pagtuon, sanglit sagad nga malimtan nato ang mga butang nga bag-o lang natong natun-an. Kami sa akong asawa nagtuon ug pinulongang Hindi aron makasangyaw mi ngadto sa mga Indian. Nakaplagan nako nga mapuslanon ang pagsulat sa bag-ong mga pulong nga akong nakat-onan diha sa usa ka papel. Dayon, sa dihang wala akoy himoon, repasohon nako kining mga pulonga. Kini nakatabang kanako sa paghinumdom sa akong nakat-onan.

E. T., Tinipong Bansa

Ako nag-edad ug 56 anyos, ug usa ka grupo sa senyas nga pinulongan ang natukod sa among kongregasyon. Bisan tuod limitado ang akong abilidad, nakig-anib ako sa grupo tungod kay gusto nakong motabang. Sa dihang nabalaka na ako kon makat-onan ba gayod nako ang senyas nga pinulongan, nabasa nako kini nga serye. Ang impormasyon ubos sa sub-ulohan nga “Ang mga Tigulang Makakat-on Pa” ug ang kataposang artikulo nakadasig gayod kanako. Determinado na usab ako sa pagkat-on sumala sa akong kaugalingong paso ug sa pagpadayon uban sa grupo sa senyas nga pinulongan.

R. N., Japan

Sinawng mga Magasin Gusto kong ipahibalo kaninyo nga nakapahinuklog gayod kanako ang artikulo nga “Sinawng mga Magasin​—‘Dali, Punita Ako ug Palita Ako!’” (Agosto 8, 2004) Wala nako sukad maamgohi nga kining mga magasina makaapektar gayod diay sa mga tawo. Naikag ako sa punto nga ang “ilusyon sa pagkahimong suod”​—pagkaila sa dagway sa usa ka tawo bisan wala pa gayod siya makita sa personal—makaapektar sa emosyon sa mga tawo sa dihang kining tawhana nga wala pa nila makita mamatay. Nabiktima ako niini kaniadto! Ang akong anak nga babaye interesado na karon nga mobasa sa pipila ka magasin. Hisgotan ra unya nako kining artikuloha uban kaniya.

S. M., Tinipong Bansa

Panagway Gusto kong magpasalamat kaninyo sa artikulo nga “Sa Dihang Naghinobra na ang Kabalaka Bahin sa Panagway.” (Hulyo 22, 2004) Gibati nako nga daw kini gisulat gayod alang kanako. Ako 19 anyos, ug ikasubo nga gitakboyan ako ug sakit maylabot sa pagkaon sa dugaydugayng panahon. Kining sakita dili sayon nga tambalan. Salamat sa mga artikulo nga naghisgot bahin sa mga ulohan nga sama niini. Nakatabang kini kanako sa pagpalandong sa maong butang, ug naglaom ko nga makatabang kini kanako sa pagsulbad sa akong problema.

G. L., Italya

Mga Crossword Salamat sa makalingaw nga mga crossword puzzle. Nakatabang kini kanako sa pagkasayod ug dugang bahin kang Jehova nga Diyos ug sa Bibliya. Ako nuybe anyos.

I. C., Alemanya

Ang “Pagmata!” nagtubag: Ang pasulit sa Bibliya nga “Nahibalo Ka Ba?” makita sa pipila ka laig-pinulongan nga edisyon sa “Pagmata!” nga walay crossword puzzle.