‘Angay Ninyong Ipasigarbo Kini’

ANG matuod nga mga alagad sa Diyos nakaamgo nga hinungdanon nga magmatinud-anon. Ang gugma alang sa ilang Maglalalang nagtukmod kanila sa pagkahimong matinud-anon. Pananglitan, tagda ang ehemplo ni Lázaro. Pipila ka panahon sa miagi, sa dihang siya nagtrabaho sa usa ka hotel sa Huatulco, Mexico, nakakita siya ug 70 dolyares nga nahulog diha sa lawak-hulatanan. Gitunol dayon niya ang kuwarta ngadto sa manedyer. Wala madugay human niana nakakita siya ug pitaka diha sa banyo. Iya kining gidala ngadto sa reception desk, nga gikatingala apan gikalipay sa tawo nga nawad-an niana.

Kining maong mga buhat nahibaloan sa heneral manedyer, kinsa nangutana kang Lázaro kon unsay nagtukmod kaniya sa pag-uli sa kuwarta ug sa pitaka. Mitubag si Lázaro nga ang moral nga mga sukdanan nga iyang nakat-onan gikan sa Bibliya maoy nakapugong kaniya sa pagkuha sa butang nga dili iya. Sa usa ka sulat sa pasalamat, ang heneral manedyer miingon kang Lázaro: “Karon lisod makakita ug mga tawo nga nagsunod sa hataas nga moral nga mga sukdanan. Gidayeg namo ang imong tinamdan. Imong gipakita nga ikaw desente nga tawo, usa ka sulondan sa imong mga kauban sa trabaho. Ikaw ug ang imong pamilya angayng magpasigarbo niini.” Si Lázaro gipili ingong kinamaayohang empleyado niadtong bulana.

Ang pipila ka kauban sa trabaho naghunahuna nga nasayop si Lázaro sa dihang giuli niya ang maong mga butang. Apan sa dihang nakita nila ang reaksiyon sa ilang amo, ilang gipahalipayan si Lázaro sa iyang pagsunod sa iyang moral nga mga prinsipyo.

Ang Bibliya nagtambag sa matinumanong mga sumusunod ni Jesus nga ‘buhaton ang maayo ngadto sa tanan’ ug “magmaminatud-on sa tanang butang.” (Galacia 6:10; Hebreohanon 13:18) Sa walay duhaduha, ang pagpasundayag ug pagkamatinud-anon ingong mga Kristohanon maghimaya sa “matarong ug matul-id” nga Diyos sa Bibliya, si Jehova.​—Deuteronomio 32:4.