Gikan sa Among mga Magbabasa

Mga Amahan Bag-o pa nakong nahuman ug basa ang seryeng “Unsay Gikinahanglan Aron Mahimong Usa ka Maayong Amahan?” (Agosto 22, 2004) Akong giusob ang akong eskedyul sa trabaho aron mas dako ang akong panahon alang sa akong pamilya ug sa mga responsabilidad diha sa kongregasyon. Tungod sa kahimtang sa akong panginabuhi, bation ko usahay nga angayng mas dako pa ang akong kita pinaagi sa dugang pagtrabaho. Apan ang maong serye nagkombinsir nako nga ang panahon nga magugol uban sa akong pamilya mas hinungdanon kay sa kuwarta. Nadasig ako sa mga kasinatian sa malamposong mga amahan.

K. S., Hapon

Ako ug ang akong manghod nga babaye mapasalamaton kaayo sa maong serye. Kulang kami ug komunikasyon sa among amahan. Natural lang nga siya among gimahal, ug bisan pag wala niya isulti, nagtuo kami nga iya usab kaming gimahal. Tungod sa pagbasa sa maong mga artikulo, gibati namo nga adunay nakasabot kanamo. Sa kinasingkasing kami nagpasalamat kaninyo!

V. D., Italya

Kabantog Ang artikulong “Usa ka Butang nga Mas Maayo pa kay sa Kabantog” (Agosto 22, 2004) maoy tubag sa akong mga pag-ampo. Nakakombinsir kana kanako nga nahimo ko ang maalamong desisyon sa pagbalik sa bug-os-panahong pagka-magsasangyaw. Sa sinugdan, sumala sa gipakita sa artikulo, si Charles wala hisabti sa iyang amahan. Apan siya gigantihan pag-ayo sa ulahi! Nanghinaot ako nga ang akong inahan makauyon na sa akong desisyon nga pauswagon ang akong pag-alagad kang Jehova. Salamat sa pagpailaila kanamo sa matinumanong mga alagad ni Jehova pinaagi sa maong mga artikulo.

Y. P., Ukraine

Ingong batan-on, ako malinga usahay sa kalibotan ug sa mga butang nga daw ginatanyag niini. Sa pagkamatuod, ang sekular nga karera nga akong gipili mahimong mosangpot sa kabantogan. Human mabasa kining artikuloha, ako nakaamgo nga ang pag-alagad kang Jehova dili mao ang tinuod nga motibo sa pagpili nakog mga karera. Ang sugilanon ni Brader Charles Sinutko nakapatandog kanako tungod kay bisan pag personal na siyang nakatilaw kon unsay kabantogan, iyang gipili gihapon ang pag-alagad kang Jehova. Ang maong artikulo nagpadayag kanako nga walay mas maayong butang niining kalibotana kay sa pag-alagad nga bug-os panahon kang Jehova.

R. K., Canada

Nakadayeg ako sa pagtalikod ni Brader Sinutko sa dakog-kita nga karera sa pagkamag-aawit aron mag-alagad kang Jehova nga bug-os panahon. Ako malipayong nagaalagad karon ingong payunir kauban sa akong bana. Buot namong mosunod sa panig-ingnan ni Brader Sinutko pinaagi sa pagpasundayag ug pagtuo kang Jehova ug pag-una kanunay sa Gingharian sa Diyos diha sa among kinabuhi. Salamat kaninyo tungod sa pagpatik niining makapadasig nga kasinatian!

E. S., Hapon

Pagpakigsekso Una Magminyo Buot kong magpasalamat kaninyo tungod sa artikulong “Mga Batan-on Nangutana . . . Sa Unsang Paagi Ako Makalikay sa Pagpakigsekso Una Magminyo?” (Agosto 22, 2004) Ingon nga magtutudlo ug magtatambag, makaiikag kaayo ang maong artikulo. Sa usa ka panaghisgot uban sa klase, gipasiugda ko ang mapuslanong mga punto aron tabangan ang mga estudyante nga isipon sila ni Jehova nga Diyos ingong balaan ug dalayegon ug magmauswagon sa ilang mga pagtuon nga dili makasinatig mga suliran nga mahimong motungha tungod sa pagpakigsekso una pa magminyo. Daghang estudyante ang nagpakitag interes ug buot makakat-on ug dugang pa bahin sa Bibliya! Ang pipila ka magtutudlo karon naghangyo nga ako makigsulti sa ilang mga estudyante panahon sa ilang mga klase. Kada semana, akong hisgotan sa akong mga estudyante ang lainlaing mga topiko gikan sa librong Gisukna sa mga Batan-on.

B. C., Mozambique

Ako 25 anyos ug naningkamot gayod nga makapabiling putli. Ako karon mas determinado kay sukad masukad nga mosulod sa madungganong kaminyoon. Ipadayon ang inyong talagsaong buluhaton.

F. K., Uganda