Gikan sa Pution Ngadto sa Tabonon nga Panit Nag-usob-usob nga mga Ideya Bahin sa Panit

UNSAY imong ilhanan sa kahimsog? Ang lison, tabonon bag panit nga lawas? Kana mao ang ilhanan alang sa daghang taga-Uropa ug Amerika del Norte. Apan dili kana tinuod sa tanang panahon. Katuigan kanhi, ang kababayen-an sa Uropa tigsul-ob ug kalo nga lagpad ug paldiyas ug tigpayong ingong salimbong sa init nga adlaw. Ang pution nga panit giisip nga ilhanan sa mga tawong dungganon. Ang tabonon nga panit tungod sa pagkabulad sa adlaw maoy ilhanan sa pagkamamumuo.

Sa mas karaan pang panahon, ang mga produkto nga nahibaloan karon nga makahilo gigamit sa pagpaputi sa panit. Pananglitan, niadtong 400 W.K.P., gigamit sa mga Grego ang polbos sa nawong nga dunay lead carbonate (makahilong asin) sa pagpaputi sa ilang panit. Si Poppaea Sabina, ang asawa sa Romanong Emperador Nero, migamit nianang makahilo nga substansiya sa pagpaputi sa iyang nawong. Sa ika-16 nga siglo, ang arsenic gigamit sa pipila ka Italyana aron ang ilang mga nawong mahimong daw sihag. Apan sukad gipabantog sa Pranses nga tigdisenyog sinina nga si Coco Chanel ang tabonon nga panit sa sinugdan sa katuigang 1920, ang tabonon nga panit giisip sa daghan ingong pagkamakiuso. Ang mga tawo mogugol ug daghang oras nga magbulad sa adlaw.

Hinuon, dili tanan nga mahiligon sa gawas sa balay ang gustog tabonon nga panit. Ang pagbulad sa adlaw dili bahin sa ilang kultura. Gusto lang nila nga masinati ang makapakalmadong mga epekto sa init nga adlaw ug sa huyohoy inay ang makapatabonon-sa-panit nga epekto sa mga silaw sa adlaw sa dihang magpalabay sa tibuok adlaw sa gawas sa balay. Nganong ang ilang panit kinahanglang panalipdan gikan sa adlaw?

[Hulagway sa panid 3]

Talan-awon sa baybayon sa sinugdan sa ika-20ng siglo

[Credit Line]

Brown Brothers