Determinado sa Pagkab-ot sa Akong Tumong

SUMALA SA GIASOY NI MARTHA CHÁVEZ SERNA

Usa ka adlaw niana sa 16 anyos pa ako, nakuyapan ako samtang nagbuhatbuhat sa balay. Sa naulian na ako, diha na ako sa kama. Tungod kay naglibog ug sakit kaayo ang akong ulo, dili gani ako makakita ug makadungog sulod sa daghang minutos. Nahadlok ako. Unsay nahitabo kanako?

ANG nabalaka nakong mga ginikanan nagdala kanako ngadto sa usa ka doktor, ug giresetahan akog mga bitamina. Siya miingon nga ang kombulsiyon maoy tungod sa kakulang ug tulog. Duha ka bulan sa ulahi, gikombulsiyon na usab ako, ug nasundan pa gayod sa ikatulong higayon. Nagpakonsulta kami sa laing doktor. Siya nagtuo nga ako may sakit sa nerbiyos ug giresetahan ako ug mga medisinang pangpakalma.

Hinunoa, kanunay na lang akong gikombulsiyon. Mawad-an akog panimuot, matumba ug masakitan. Usahay, mapaakan nako ang akong dila ug ang sulod sa akong baba. Sa dihang maulian na ako, sakit kaayo ang akong ulo ug kasukaon ko. Sakit ang tibuok nakong lawas, ug sagad dili ako makahinumdom sa nahitabo una pa sa kombulsiyon. Aron maulian, kasagaran kinahanglan akong mohigda ug usa o duha ka adlaw. Bisan pa niana, nagtuo ako nga kining sakita temporaryo lamang​—ug maulian ako sa di madugay.

Epekto Niini sa Akong mga Tumong

Sa batabata pa ako, ang akong pamilya nagsugod pagtuon sa Bibliya uban sa mga Saksi ni Jehova. Ang among mga magtutudlo mao ang duha ka espesyal payunir, o bug-os-panahon nga mga ministro nga mogugol ug daghan kaayong oras kada bulan sa pagtudlo sa mga kamatuoran sa Bibliya ngadto sa uban. Akong nakita nga ang ministeryo niadtong mga payunira nakapalipay kanila. Sa dihang gisultihan ko ang akong maestra ug mga eskolmet bahin sa mga saad sa Bibliya, gibati ko usab ang maong kalipay.

Sa wala madugay, daghang membro sa akong pamilya nahimong mga Saksi ni Jehova. Nalipay gayod ako sa pagsangyaw sa maayong balita! Sa siyete anyos na ako, gihimo usab nakong tumong ang pagkahimong espesyal payunir. Sa edad nga 16, gihimo ko ang usa ka dakong lakang ngadto sa maong tumong sa dihang ako nagpabawtismo. Dayon misugod ang mga kombulsiyon.

Pagpayunir

Bisan pa sa akong mga problema sa panglawas, gibati ko gihapon nga ako mahimong usa ka bug-os-panahong ministro sa mga Saksi ni Jehova. Apan sanglit ako gikombulsiyon kaduha sa usa ka semana, ang pipila diha sa kongregasyon naghunahuna nga dili nako angayng dawaton ang maong bug-at nga responsibilidad. Naguol ug naluya ako. Apan, usa ka higayon niana, miduaw sa among kongregasyon ang usa ka magtiayon nga nag-alagad sa mga pasilidad sa sangang buhatan sa mga Saksi ni Jehova sa Mexico. Ilang nahibaloan ang akong tinguha sa pagpayunir ug gidasig nila ako pag-ayo. Ila akong gikombinsir nga ang akong sakit dili angay magpugong kanako sa pagpayunir.

Busa, niadtong Septiyembre 1, 1988, natudlo ako ingon nga regular payunir sa akong lungsod nga natawhan sa San Andrés Chiautla, Mexico. Migugol ako ug daghang oras kada bulan sa pagsangyaw sa maayong balita. Kon dili ako makasangyaw sa publiko tungod sa kombulsiyon, akong sulatan ug mga topiko sa Kasulatan ang mga tawo sa among lugar, sa ingon naghatag kanilag sinulat nga pagdasig sa pagtuon sa Bibliya.

 Nadayagnos ang Akong Sakit

Niadtong higayona ang akong mga ginikanan, bisan dakog gasto, nagdala kanako ngadto sa usa ka neurologist. Kining doktora nagdayagnos nga ang akong sakit mao ang patol. Sa tabang sa pagtambal nga akong nadawat niadto, nakontrolar ang akong sakit sa mga upat ka tuig. Sa kasamtangan, nakatambong ako sa Tunghaan sa Payunir nga Pag-alagad, diin ako nakadawat ug pagdasig nga nagpasibot sa akong tinguha sa pag-alagad diin mas dako ang panginahanglan sa mga magwawali.

Ang akong mga ginikanan nahibalo kon unsa ka dako ang akong tinguha sa pagpalapad sa akong pag-alagad. Sanglit ang akong sakit labing menos nakontrolar na, gitugotan nila ako sa pag-adto sa Zitácuaro, sa Michoacán State, mga 200 kilometros gikan sa among lugar. Ang pagpakig-uban sa mga payunir sa maong teritoryo nakatabang kanako sa pagpabili pa gayod sa bug-os-panahong pag-alagad.

Apan, human sa duha ka tuig sa Zitácuaro, gipatol na usab ako. Mipauli ako sa balay sa akong mga ginikanan, nga mibating pakyas ug naguol ug kinahanglang tambalan. Miadto ako sa usa ka neurologist kinsa miingon nga ang akong gitomar nga tambal nakadaot diay sa akong atay. Nagsugod ako pagpangitag laing pamaagi, kay dili na kami makabayad sa mga pagpakonsulta sa espesyalista. Nagkagrabe ang akong kahimtang, ug kinahanglang mohunong ako sa pagpayunir. Kapildihan ang matag pag-atake sa patol. Apan inigbasa nako sa mga Salmo ug inig-ampo kang Jehova, bation nako ang iyang paghupay ug paglig-on.​—Salmo 94:17-19.

Nakab-ot ang Akong Tumong

Sa kinagrabehan kong yugto, kaduha ako patolon sa usa ka adlaw. Dayon ang dakong kausaban nahitabo kanako. Gihatagan ako sa usa ka doktor ug laing tambal sa patol, ug miarang-arang ang akong paminaw sa tagdugay nga mga yugto sa panahon. Busa niadtong Septiyembre 1, 1995, nagpayunir na usab ako. Nagpabiling maayo ang akong panglawas, busa human sa duha ka tuig nga wala na ako patola, miaplay ako ingon nga espesyal payunir. Nagpasabot kadto sa paggugol ug mas daghang oras sa ministeryo ug sa pag-alagad bisan diin nga ako gikinahanglan. Hunahunaa lang kon unsay akong gibati sa dihang ako natudlo nga espesyal payunir! Nakab-ot ko ang tumong nga akong gipangandoy sa bata pa ako.

Niadtong Abril 1, 2001, nagsugod ako sa akong bag-ong asaynment, sa usa ka gamayng balangay sa kabukiran sa Hidalgo State. Ako nag-alagad karon sa usa ka gamayng lungsod sa Guanajuato State. Kinahanglang dili ako magpasagad sa pagtomar sa akong tambal ug pagbaton ug igong pahulay. Estrikto usab ako sa akong pagkaon, ilabina kon bahin sa mga tambok, caffeine, ug delata nga mga pagkaon. Maglikay usab ako sa kusganong mga pagbati, sama sa kasuko o sobrang kabalaka. Apan kining estriktong rutina nakapaayo kanako. Sa akong pag-espesyal payunir, kas-a ra ako gipatol.

Tungod kay ako tagsaanon ug walay mga kaakohan sa pamilya, malipay ako sa pagpadayon sa pag-alagad ingong espesyal payunir. Nahupayan ako sa pagkahibalo nga ‘si Jehova dili kay dili-matarong nga kalimtan ang atong buhat ug ang gugma nga atong gipakita alang sa iyang ngalan.’ Pagkamahigugmaon niya, kay wala siya mangayo sa dili nato ikahatag kaniya! Ang pagdawat sa maong kamatuoran nakatabang kanako sa pagbalanse sa akong panghunahuna, kay kon mapugos ako sa pag-undang sa akong pagpayunir tungod sa dili maayong panglawas, ako nahibalo nga si Jehova malipay gihapon sa akong bug-os-kalag nga pag-alagad.​—Hebreohanon 6:10; Colosas 3:23.

Sa walay duhaduha, ang pagpaambit sa akong pagtuo ngadto sa uban kada adlaw nakapalig-on kanako. Kanunay usab kanang magpahinumdom kanako sa mga panalangin nga giandam sa Diyos sa umaabot. Ang saad sa Bibliya mao nga sa bag-ong kalibotan, wala na unyay sakit, “ni may pagbangotan ni pagtiyabaw ni may kasakit pa. Ang unang mga butang nangagi na [unya].”​—Pinadayag 21:​3, 4; Isaias 33:24; 2 Pedro 3:13.

[Mga hulagway sa panid 26]

Mga 7 anyos (ibabaw); mga 16 anyos, wala madugay human ako mabawtismohi

[Hulagway sa panid 27]

Pagsangyaw uban sa usa ka higala