Nakapukaw Kini sa Iyang Tinguha nga Makabaton ug Bibliya

Sa dihang ang Rusya gigamhan pa sa Komunistang mga diktador, ang mga tawo wala dasiga sa pagbasa sa Bibliya. Apan, sa dili pa dugayng katuigan milyonmilyon ka Bibliya ang giapod-apod nianang nasora. Ang usa ka rason kon nganong napukaw pag-usab ang interes bahin sa Bibliya gipadayag diha sa sulat nga nadawat sa sangang buhatan sa mga Saksi ni Jehova sa Rusya. Si Sergei, usa ka bana ug amahan nga taga-Volgograd​—usa ka dakong siyudad nga sa daghang tuig ginganlag Stalingrad, nga gikuha sa ngalan sa Sobyet nga diktador nga si Joseph Stalin​—nagpatin-aw:

“Dili pa dugay, ang mga hawas sa inyong organisasyon miduaw kanako sa balay. Sila matinahorong nangutana kon motuo ba ako sa Diyos. Ako miingon nga ang tanang tawo motuo, bisag gamay, sa Diyos. Sa dihang miingon ko nga ako adunay asawa ug anak nga lalaki, ang usa kanila mikuha diha sa iyang bag ug librong Ang Sekreto sa Kalipay sa Pamilya ug gihatag kini kanako.”

Sa ulahi gibasa ni Sergei ang libro. “Naikag gayod ako niini,” matod niya. “Ang libro dayag nga gisulat sa makinaadmanon ug dedikado nga mga tawo. Kasagaran, madudahon ako sa relihiyosong mga grupo, apan ako nagtuo nga kamo matinud-anon nga mga tawo. Akong nakita ang inyong adres sa kataposang panid sa libro.” Busa misulat si Sergei sa maong adres ug nangayog kopya sa Bibliya.

Ang mga prinsipyong makita diha sa librong Kalipay sa Pamilya nga makatabang aron magmalipayon ang mga pamilya gibase diha sa mga pagtulon-an sa Bibliya. Apil sa matulon-anon nga mga kapitulo sa libro mao ang “Bansaya ang Inyong Anak Sukad sa Pagkabata,” “Panalipdi ang Inyong Pamilya Gikan sa Makadaot nga mga Impluwensiya,” ug “Mentinaha ang Kalinaw sa Inyong Panimalay.”

Mahimo kang mohangyo ug kopya sa Ang Sekreto sa Kalipay sa Pamilya pinaagi sa pagpil-ap sa nagauban nga kupon ug sa pagpadala niana ngadto sa adres nga makita diha sa kupon o sa nahiangay nga adres diha sa panid 5 niini nga magasin.

□ Interesado akong makadawat ug kopya sa librong Ang Sekreto sa Kalipay sa Pamilya.

□ Palihog kontaka ako bahin sa usa ka libreng pagtuon sa Bibliya sa balay.