Sa Dihang ang mga Dragon Mahanaw

“SA DIHANG mga tulo ka piye na lang ang akong gilay-on gikan niini, kalit nga nabag-o ang linihokan sa dragon,” matod ni David Hall sa Ocean Realm nga magasin. “Mihunong kini sa pagpaningaon ug mipalayo, nga nagtago sa duol nga mga sagbot sa dagat ug wala na makita tungod kay maayo kaayo kining pagkatakoban.” Siya nakadayeg: “Kini nga hayop maayo kaayo nga motakoban.” Sa maong pagpakigharong, si Hall nakapribilehiyo sa pagkakita sa usa sa maayo kaayong motakoban nga hayop sa dagat​—ang sea dragon sa Australia nga adunay daghang samag-dahon nga mga siwilsiwil sa lawas.

Ang sea dragon hinay ug linihokan ug nag-agad pag-ayo sa ilang abilidad sa pagtakoban aron dili matukob sa gigutom nga mga isda. Ang ilang dalagon-berde nga mga badlis ug talagsaong samag-dahon nga mga siwilsiwil sa lawas maoy hinungdan nga sila lugos makita diha sa ilang punog-sagbot nga pinuy-anan sa dagat. Ang ilang paglangoy nahisama pa gani sa kompas sa sagbot samtang kini gianod-anod ilalom sa dagat.

Sanglit maayo kaayong pagkatakoban, sila mangukoy nga dili mamatikdan sa ilang kinaham nga pagkaon, ang gigming nga mga pasayan. “Maayo kaayo silang pagkatakoban nga ang mga pasayan dili gani mahadlok magpaduol kanila,” matod sa usa ka tigpaniid. Lamyon sa sea dragon ang mga pasayan nga naglangoylangoy sa duol, nga kalit nga mosuyop niini pinaagi sa ilang taas nga simod ug tunlon kini diretso. Kining mugbong yugto sa pagpangitag pagkaon sal-otan ug tagdugayng yugto​—nga mokabat ug tulo ka adlaw​—sa pagpahulay sa dihang ang sea dragon magpuyo lang, nga motukob ug bisan unsang makaon nga mopaduol kanila.

Ang sea dragon makaplagan lang sa mabawng katubigan sa habagatang baybayon sa Australia. Ang ilang nagkurba nga lawas ug samag-dahon nga mga siwilsiwil kaamgid nianang mga dragon nga ipasundayag sa mga Insek panahon sa ilang mga piyesta, ug mao kanay gigikanan sa ilang ngalan. Sanglit motubo sila ug hangtod 43 sentimetros, mas dagko sila kay sa mga isda nga kamatang nila sama sa mga sea horse.

Kon bahin sa pagpanganak, ang laki ug baye nga sea dragon bali ug mga papel. Oo, ang laki ang momabdos ug manganak! Sa dihang hapit na ang tingpamulak, maporma diha sa ubos nga bahin sa tiyan sa umaabot nga amahan ang init nga puyopuyo nga adunay mga 120 ka gagmayng buho, o sudlanag itlog. Dayon, ibalhin sa baye nga sea dragon ang iyang sulaw-rosason nga mga itlog ngadto niining maong puyopuyo, nga magluklok sa matag itlog sa tagsatagsa niini ka sudlanan. Mga upat ngadto sa unom ka semana sa ulahi, ang 20-milimetro-ka-taas nga gagmayng mga sea dragon mahimugso, ang matag usa pareho gayod ug dagway sa ilang mga ginikanan.

Sa pagkatinuod, kining makapahimuot nga mga linalang maoy lain na usab nga pananglitan sa pagkamamugnaon ug pagkaartistiko ni Jehova nga Diyos!​—Salmo 104:​24, 25.

 [Mga hulagway sa panid 25]

Mabdos nga laki nga sea dragon nga adunay mga itlog; gipakita sa pasukip ang gipadak-ang hulagway sa puyopuyo sa mga itlog

[Mga hulagway sa panid 25]

Nagtakoban nga sea dragon; gipakita sa pasukip ang hayop

[Picture Credit Line sa panid 25]

All photos except brood patch: Michael Morris-Immersedimagery@scubadiving.com