Gikan sa Among mga Magbabasa

Pagkabaog Bisan tuod wala ako makaeskuyla ug medisina, maikagon kaayo nakong gibasa ang serye nga “Pagkabaog​—Mga Paagi sa Pagtambal, ug mga Pangutana.” (Septiyembre 22, 2004) Makapahimuot gayod ang pagkahibalo kon unsa ka dako ang pagpabili ni Jehova sa kinabuhi sa tawo. Ang dili-mapihigong paghisgot sa mga suliran nga nalangkit makatabang sa usa ka tawo sa pagsalig gayod kaniya. Daghang tawo diha sa teritoryo sa among kongregasyon ang nalipay sa pagdawat niining magasina.

V. P., Rusya

Ang akong bana ug ako gustong makabatog mga anak human dayon sa among kasal. Apan, katuigan sa ulahi, giatubang namo ang mga suliran nga gihubit niining seryeha. Makapadasig gayod ang pagkahibalo nga si Jehova nagtagana ug pagkaon sa hustong panahon. Makapaguol gayod kon sultihan ka nga dili ka puwedeng manganak. Apan pinaagi sa pagpanukiduki ug pinaagi niining artikuloha, natabangan ako nga mahupayan sa kamatuoran nga dili kay kami ra ang nakasinati niini. Giisip namong usa gayod ka panalangin nga among magugol sa bug-os ang among panahon sa pag-alagad kang Jehova.

T. O., Tinipong Bansa

Vitiligo Daghan kaayong salamat sa artikulong “Unsa may Vitiligo?” (Septiyembre 22, 2004) Natakboyan ako niining sakita sulod na sa lima ka tuig. Apan mas nakaarang ako sa pagsagubang niini sukad nga gipatik ninyo kining artikuloha. Nalipay ako nga nahisakop sa usa ka Kristohanong organisasyon nga nahingawa gayod sa tagsatagsa kanato!

C. H., Alemanya

Dili paghingapin ang pag-ingon nga makahasol kaayo sa hunahuna ug pagbati ang pagkinabuhi nga dunay vitiligo. Si Jehova nagtudlo kanato nga mahimong magmasensitibo sa usag usa. Gipangandoy ko gayod ang panahon sa dihang mahibalik na ang natural nga kolor sa akong panit.

B. W., Tinipong Bansa

Ako nag-antos sa vitiligo sulod na sa 25 ka tuig. Makapahupay na kaayo bisan ang pagkahibalo lang nga ang uban nakasinati usab sa samang emosyonal nga kasakit nga akong gibati. Daghang tawo ang may sayop nga panghunahuna bahin niining sakita, apan pinaagi niining artikuloha sila makasabot sa tukmang paagi. Daghan kaayong salamat sa pagsulat bahin niining ulohana!

K. S., Japan

Natakboyan ako niining sakita sulod na sa mga 30 anyos. Sa bata pa ako, yagayagaan ako sa akong mga katalirongan tungod sa akong panagway. Nakakat-on ra ako sa pagkinabuhi uban niining sakita. Sama kang Sibongile, nakahukom ako sa pagdasig sa uban pinaagi sa saad sa Bibliya nga sa dili madugay wagtangon na ni Jehova ang tanang suliran sa panglawas ug ang nagaubang emosyonal nga kaguol nga makapahinabog grabeng kasakit.

J. M., Czech Republic

Natakboyan niining sakita ang akong 19-anyos nga anak babaye. Walay nahibalo kon unsa ka daghang luha ang mitulo sa iyang mga mata o kon kapila siya nag-ampo kang Jehova bahin niana. Gihigugma niya si Jehova ug di pa dugay siya nahimong usa ka bug-os-panahong ebanghelisador. Mapasalamaton kami nga kamo nagpatik ug mga artikulo nga sama niini tungod kay kini nagtabang kanamo sa pagbati sa kahingawa ni Jehova alang kanamo.

S. S., Japan

Ako usa ka bug-os-panahong ebanghelisador. Dili nako mahubit ang akong bation sa dihang tutokan ako sa mga tawo ug magpanuko ang uban sa pagpakiglamano o paghalog kanako tungod sa pagkausab sa kolor sa akong panit. Ang pagkabaton lamang sa maong mahigugmaon ug tukma nga artikulo nakapahupay pag-ayo kanako. Salamat sa inyong pagtabang sa uban sa pagkasabot nga ang among sakit dili mananakod ug sa pagpakita kanamo nga si Jehova may kahingawa kanamo.

C. S., Tinipong Bansa