Pagpaniid sa Kalibotan

Tabletas nga mga Bitamina ug Kanser

Ang pagsusi sa 14 ka pagtuon nga giapilan ug 170,000 ka tawo nagpakita nga ang tabletas nga mga bitamina dili makapanalipod batok sa kanser sa tutonlan, tiyan, atay, tinai, ug hagorila. Sumala sa medikal nga magasing Deutsches Ärzteblatt, ang antioxidant nga mga tabletas nga beta carotene ug mga bitamina A, C, ug E dili lang kay walay mapuslanong epekto kondili medyo makapasamot hinuon sa kapeligrohang makanser. Si Dr. Richard Sullivan sa Cancer Research UK nagpatin-aw: “Walay laktod nga paagi sa pagsanta sa kanser sa dakong tinai. Kon nagtomar kag mga bitamina aron panalipdan ang imong kaugalingon batok sa maong sakit, nag-usik ka lang sa imong salapi.” Siya midugang: “Ang labing maayong paagi aron mamenosan ang risgo mao ang pagkaog sustansiyadong mga pagkaon ug dili pagtabako.”

 Nabalaka sa mga Kagaw?

“Ang pagtinguha ug balay nga walay kagaw dili lang kay dili makataronganon, kondili walay pulos usab,” matod sa usa ka artikulo diha sa The New York Times. “Gawas kon ang kauban nimo sa balay tigulang na kaayo, bata pa kaayo (wala pay 6 ka bulan ang edad) ug masakiton kaayo, ang pipila ka bakterya diha sa lamesa, kuptanan sa pultahan o kutsara dili makapameligro” sa imong panglawas. Tinuod, ang dali-madaot nga pagkaon nga ibilin sa lamesa sa pipila ka oras posibleng mahugawan tungod sa bakterya ug magpahinabog pagkalibang. Aron malikayan kini, tipigi ang dali-madaot nga mga pagkaon diha sa repridyeretor. Sa pagpanalipod sa imong kaugalingon batok sa bakterya, dili na kinahanglang mogamit pa ug kontra-bakterya nga mga produkto. “Panghunaw lang pinaagig sabon ug tubig pipila ka beses sa usa ka adlaw, kay mao ra nay gikinahanglan,” matod sa mantalaan.

Pagsalig Nagakawala

“Ang kadaghanan sa mga Katsila diyutay o walay pagsalig sa kadaghanang institusyon nga ilang gipasakopan,” nagtaho ang mantalaang El País sa Espanya. Sumala sa Center for Sociological Research, kapin ug diyutay sa katunga sa 2,500 ka tawo nga giinterbiyo miingon nga diyutay silag pagsalig sa gobyerno, 56.2 porsiyento ang diyutayg pagsalig sa mga bangko, ug 57.7 porsiyento ang wala kaayoy pagsalig sa mga unyon sa mga obrero. Sa usa ka nasod diin duolan sa 75 porsiyento nag-angkong Katoliko, kapin sa 61 porsiyento ang nag-ingong sila “diyutay o walay pagsalig sa Iglesya Katolika.” Nagkomento bahin niini, usa ka editoryal sa mantalaang Diario 16 miingon: “Kadaghanang Katsila nag-isip gayod sa ilang kaugalingon ingong Katoliko, apan daghan kaayo kanila ang wala mosubay niini nga relihiyon o modawat sa mga pagtulon-an niini.”

Pagbasa Makapauswag sa Memorya

Unsaon nimo pagpauswag sa imong memorya? “Ayaw pagdahom ug milagro,” matod sa Folha Online sa Brazil. “Ang sekreto mao ang paggamit sa imong utok.” Ang usa sa labing maayong mga paagi sa pagpalihok sa imong utok mao ang pagbasa. Sa unsang paagi? Ang neurologo nga si Ivan Izquierdo miingon: “Sa dihang mabasa sa usa ka tawo ang pulong ‘kahoy,’ ang tanang kahoy nga iyang nailhan sa iyang tibuok kinabuhi mobalik sa iyang panumdoman sulod lang sa gatosan ka bahin sa usa ka segundo.” Sumala kang Izquierdo, “kining tanan mahitabo nga wala tuyoa.” Siya nagtuo nga pinaagi niining matanga sa mental nga kalihokan, ang utok dili daling matakboyan ug mga sakit sama sa Alzheimer. Ang neurologo nga si Wagner Gattaz, sa Research Center for Memory Disorders, sa São Paulo, Brazil nag-ingon: “Kon kanunay natong gamiton ang atong memorya, mas matipigan nato kini.”

Mga Text Message Nagkadaghan

“Sa tibuok kalibotan, kapin sa 360 ka bilyong text message ang ipadala kada tuig,” nagtaho ang International Herald Tribune. “Kana maoy mga usa ka bilyon nga mugbong mga mensahe kada adlaw.” Ang short message service, o SMS (pag-text) gigamit na sa mas daghang paagi. Nagkadaghang kompaniya ang mag-text ngadto sa cell phone sa posibleng mga kliyente aron mamaligya sa ilang produkto. Pananglitan, ang mga tawo puwede nang mohangyo nga padad-an sa mga pag-ampo sa papa diha sa ilang mga cell phone. Ang mga polis sa Netherlands magpadalag SMS sa gikawat nga mga cell phone aron ipaalinggat sa mga tawong gustong mopalit niini nga ang cell phone kinawat. Ug ang pipila ka mga nasod nga dunay relihiyosong balaod nga nagtugot sa lalaki sa pagdiborsiyo sa iyang asawa human mosulti sa tulo ka beses nga “Makigdiborsiyo ko nimo” nag-awtorisar sa diborsiyo pinaagig SMS.

Paggamit ug Internet sa Netherlands

“Usa sa matag 5 ka bata nga nag-edad ug 11 ngadto sa 12 anyos ang ginahasi ug estranghero pinaagig mga komento bahin sa sekso samtang nakig-chat diha sa Internet,” nag-ingon ang usa ka pagtuon nga gitaho diha sa mantalaang Algemeen Dagblad. Sa dihang gipangutana ang 660 ka ginikanan ug 220 ka bata nga nag-edad ug 8 ngadto sa 12, kapin sa katunga sa mga bata nga nag-Internet ang may panalagsang “dili-maayong eksperyensiya” tungod sa “makahasol nga mga E-mail nga namaligyag bisan unsang produkto” o pornograpikong mga hulagway o ubang dili-angay nga impormasyon. Kini nga mga panghitabo gisumbong sa kadaghanang mga bata ngadto sa ilang mga ginikanan. Ang pagtuon midugang sa pag-ingon nga 8 sa 10 ka ginikanan nabalaka bahin sa mga kapeligrohan nga maagoman sa ilang anak pinaagi sa pag-Internet, nga halos katunga sa mga ginikanan miingon nga gusto nilang bantayan pag-ayo ang pag-Internet sa ilang mga anak, nga 60 porsiyento sa mga ginikanan nagbutang sa kompiyuter diha sa sala aron mabantayan ang ilang mga anak, ug nga ang mga bata moaberids ug halos usa ka oras kada adlaw sa pagdula, pagpadalag electronic mail, ug pagpakig-chat diha sa Internet.

Ang Tambag nga Ilang Palabihon

“Nahibaloan pinaagi sa usa ka surbi nga palabihon sa duolan sa dos-tersiya sa mga direktor sa iladong mga kompaniya ang tambag sa ilang kapikas kay nianang sa laing membro sa hunta o kauban sa trabaho sa dihang mag-atubang ug malisod nga problema sa trabaho,” nag-ingon ang The Times sa London. Si Bob Arnold, kansang kompaniya nga konsultahanan maoy nagpahigayon sa panukiduki, nag-ingon nga dili kahanas kondili pagsalig ang gikinahanglan sa mga lider sa negosyo gikan sa ilang mga tigtambag. Siya mipatin-aw: “Siyempre, ang pagkaindependente, pagkadili-madapigon ug eksperyensiya mao ang mga hiyas nga gikinahanglan gayong makita diha sa mga tawong motambag sa mga membro sa hunta,” apan tungod kay ang pagsalig mao ang labing hinungdanon, ang tambag nga ihatag sa mga asawa mao ang palabihon.

Paghunong sa Paggamit ug mga Tseke Gidahom

“Sa sunod nga bayente ka tuig o kapin pa, ang mga tseke talagsa na lang tingaling gamiton,” matod sa U.S.News & World Report. Ang pagbayad pinaagig tseke kalit kaayong mius-os sukad gigamit ang “mas barato ug mas paspas nga mga paagi sa pagbayad sama sa mga kredit kard, debit kard, ug pakigtransaksiyon sa bangko pinaagig Internet.” Ang ubang mga rason mao ang direktang pagdeposito ug awtomatikong pagbayad sa utang, diin ang mga kustomer mohatag ug permiso sa mga tigpautang nga ang bayad kuhaon gikan sa ilang pondo sa bangko. Ang mga bangko nag-ingon nga ang paghunong sa paggamit ug papel nga mga tseke magpanalipod sa usa nga makawatan sa iyang identidad. Apan, ang pipila ka kustomer ug mga eksperto bahin sa panglimbong nabalaka nga ang paggamit ug elektronikong mga tseke makapasamot sa paglapas sa pribasiya ug panglimbong.