Gikan sa Among mga Magbabasa
Gikan sa Among mga Magbabasa
Pagmabdos sa mga Tin-edyer Natandog ako sa seryeng “Pagmabdos sa mga Tin-edyer—Usa ka Trahedya sa Tibuok Kalibotan.” (Oktubre 8, 2004) Desisayis anyos ako sa dihang namabdos ko. Mapasalamaton ako nga inyong gipasiugda nga kinahanglang paluyohan ang inahan ug nga si Jehova may kahingawa sa bata, nga walay nahimong kasal-anan. Salamat sa maong mahigugmaong artikulo.
M. R., Tinipong Bansa
Akong gipakita kining gulaa sa Pagmata! ngadto sa pangulong mananabang sa duol nga klinika. Siya miingon nga daghang dalagita nga nag-edad ug 14 ug 15 anyos ang nanganak, nga wala pa sukad mahitabo sa maong lugar. Siya miingon nga nanginahanglan siya dihadiha ug 20 ka kopya sa maong magasin aron ihatag ngadto sa mga tin-edyer ug sa ilang mga ginikanan.
I. R., Benin
Nadiskobrehan nako nga mabdos ako usa ka bulan sa wala pa ako mag-17 anyos. Ang pagtug-an sa akong mga ginikanan mao ang labing lisod ug labing makapasubong butang nga akong nahimo sukad. Hinaot nga basahon sa mga batan-on kining artikuloha ug hatagan kinig seryosong pagtagad. Wala gayod ako magtuo nga mahitabo kini kanako!
D. C., Tinipong Bansa
Nahimo akong inahan sa edad nga 17. Gipugos ako sa pagminyo nga misangpot dayon ug diborsiyo. Sakit kaayo alang kanako ang paghunahuna nga tungod sa pagdalidali sa pagpakigsekso nga wala una mamalandong sa mga sangpotanan niini, daghang kahigayonan ang nawala kanako. Kanunay kong naningkamot nga matambagan ang mga batan-on nga dili himoon kining dakong kasaypanan. Salamat kaayo sa inyong artikulo!
N. C., Honduras
“Jehova, Nakaplagan Mo Ako!” Ako 15 anyos, ug nalingaw gayod ako sa pagbasa sa artikulong “Jehova, Nakaplagan Mo Ako!” (Oktubre 8, 2004) Ang eksperyensiya ni Nelly nakatabang kanako sa pagkasabot pa gayod sa giingon sa Santiago 4:8: “Duol sa Diyos, ug siya moduol kaninyo.” Salamat niana nga artikulo nga makapalig-on sa pagtuo!
K. P., Tinipong Bansa
Ang eksperyensiya ni Nelly Lenz nakapakombinsir kanato nga si Jehova maoy usa ka mahigugmaong Diyos ug nga iyang ipaneguro nga siya makaplagan kon kita padayong mangita kaniya.
M. K., Japan
Makapahupay nga mapasaligan pinaagi sa mga artikulong sama niini nga ang tanang karnero ni Jehova bililhon kaayo kaniya nga bisan asa pa sila, siya mahinumdom ug magpalig-on sa matag usa kanila.
J. G., Canada
Nakahilak ako niining artikuloha. Ang akong mga ginikanan dili mga Saksi ni Jehova, ug ila gayod akong gilisodlisod. Nalipay ako nga si Nelly nagpabiling malig-on sa iyang determinasyon sa pag-alagad kang Jehova.
K. L., Jamaica
Ako 12 anyos. Makapadasig kaayo ang pagkahibalo nga bisag unsa pa ka daghan sa imong problema sa balay, si Jehova kanunayng motabang kanimo sa pagsagubang niana.
J. W., Tinipong Bansa
Maayo kay gipaambit ni Nelly ang iyang eksperyensiya kanato. Makatabang kini sa kabataan nga sama niinig kahimtang. Ug kinahanglang hinumdoman sa mga hamtong kining mga bataa. Kita usahay malimot nga sila adunay linaing mga panginahanglan diha sa kongregasyon.
M. K., Denmark
Karon lang ako natandog pag-ayo sa usa ka kasinatian. Naeksperyensiyahan usab nako kon unsaon pagbarog nga malig-on dapig sa kamatuoran ingong usa ka batan-on. Sulod sa upat ka tuig ako ray nag-alagad kang Jehova diha sa among panimalay. Natandog gayod ako sa pagbasa bahin sa personal nga pag-atiman ni Jehova kang Nelly. Salamat sa makapadasig nga kasinatian. Salamat, Nelly!
G. W., Alemanya