Nakabantay Tungod kay Nagbasa ug Pagmata!

ANG regular nga mga magbabasa ug Pagmata! nakasabot sa bili sa mga artikulo niini. Apan para sa usa ka magtiayong Aleman nga namakasyon sa Khao Lak, Thailand, sa miaging Disyembre, ang artikulo nga nag-ulohan ug “Makapatay nga mga Balod​—Mga Kasugiran ug mga Kamatuoran,” sa gula sa Pebrero 8, 2001, napamatud-ang bililhon kaayo.

Ang Aleman nga mantalaang Frankenpost (Selber Tagblatt) nagtaho sa kasinatian sa maong magtiayon: “‘Taudtaod na ming naglangoylangoy,’ nahinumdom si Roswitha Gesell. Human maglangoylangoy sa dagat, mibalik ang magtiayong Gesell sa ilang hotel aron mag-ilis. Gihubit ni Reiner Gesell ang makalilisang nga hitabo nga ilang nakita sa dihang mibalik sila: ‘Sa dihang mibalik mi sa baybayon paglabay sa diyes minutos, ang dagat kalit nga mihunas.’ Mihunas gyod hangtod sa katakotan, nga mga pito ka kilometros ang gilay-on gikan sa baybayon, ug ang makita lang mao ang salog sa dagat. ‘Ang tanang nangaligo nahigop sa dagat.’ Ang magtiayong Gesell naluwas tungod sa artikulo sa magasing Pagmata!” Ang maong artikulo nag-ingon nga ang mga tsunami sagad unhan ug talagsaong paghunas.

“Sa dihang nakita sa magtiayong Gesell ang higanteng mga balod sa unahan, nanagan dayon sila palayo sa baybayon. Nahinumdom si Reiner Gesell nga ang dagkong mga balod morag 12 ngadto sa 15 metros [40 ngadto sa 50 piye] ang gitas-on. Usa sa iyang mangilngig nga mahinumdoman mao ang ubang mga turista sa baybayon nga nagtan-aw lang sa dagat sa kahingangha. ‘Wala gyod sila mamahawa. Gisinggitan nako sila sa pagdagan aron maluwas, apan walay mikihol.’ Lagmit wala gayoy naluwas kanila.”

Mahitungod sa magtiayong Gesell, ang usa ka artikulo sa maong mantalaan nag-ingon usab: “Ingong mga Saksi ni Jehova, samtang nagbakasyon nakig-uban sila sa kinadul-ang kongregasyon, nga 140 kilometros ang gilay-on gikan sa Khao Lak. Sa dihang nahibaloan sa ilang mga isigkamagtutuo ang maong kalamidad, ang tibuok kongregasyon nangadto sa Khao Lak aron sa pagpangita kanila.”

Karon nga luwas na silang nakapauli sa Alemanya, mapasalamaton kaayo kining magtiayona tungod sa bililhong impormasyon nga anaa sa Pagmata! Ug mapasalamaton gayod sila sa mga taga-Thailand nga mitabang kanila, ilabina sa ilang espirituwal nga mga igsoon, nga nagpakitag tinuod nga Kristohanong gugma!