Naningkamot nga Mapakaon ang Binilyong Tawo

I-PLAY

Naningkamot nga Mapakaon ang Binilyong Tawo

MATAG adlaw, bilyon-bilyong tawo ang kulang ug kaon. Apan, kining lisod kaayong kahimtang dili angayng magpadayon, sumala pa sa Hiniusang Kanasoran.

“Kamo nag-ingon nga inyong gihatagan ug pangunang pagtagad ang pagwagtang sa kawalad-on.” Matod pa sa Sekretaryo-Heneral sa Hiniusang Kanasoran nga si Kofi Annan niadtong Septiyembre 8, 2000, ngadto sa pundok sa labing gamhanang mga lalaki ug mga babaye sa kalibotan. Sila nagtigom alang sa Millennium Summit sa Hiniusang Kanasoran, diin niining tigoma daghang lider prangkang nagkomento bahin sa mga problema sa mga kabos sa kalibotan. “Insulto sa tawo ang kawalad-on,” miingon ang bise presidente sa Brazil. Ang primer ministro sa Gran Britanya midugang sa pag-ingon: “Ang adunahang mga nasod napakyas sa pagtabang sa Aprika nga nakapakurat ug nakahatag ug kaulawan sa atong sibilisasyon.”

Klarong gipadayag niining duha ka mamumulong nga ang mga nasod nagpakaulaw sa ilang kaugalingon tungod kay wala nila himoa ang kutob sa ilang maarangan aron mapakaon ang mga tawong gikuraw. Ingong pamatuod sa ilang tinguha nga mapauswag ang pagkinabuhi alang sa tanan sa yuta, ang nanambong sa tigom nanaad sa pagtuman sa walo-ka-bahin nga resolusyon nga naglakip sa mosunod: “Kinahanglang himoon gayod nato ang kutob sa atong maarangan aron ang atong isigkatawo, mga lalaki, mga babaye ug mga bata man makalingkawas gikan sa miserable ug dili-makitawhanong mga kahimtang sa kawalad-on, diin kapin sa usa ka bilyon kanila ang nag-antos. . . . Kami dugang nga manaad: Sa pagkunhod ug katunga, sa tuig 2015, sa gidaghanon sa mga tawo sa kalibotan kansang kita dili moabot ug usa ka dolyar sa usa ka adlaw ug sa gidaghanon sa mga tawo nga nag-antos sa kagutom.”

Unsa nay nahimo bahin nianang dalayegong tumong sukad sa Septiyembre 2000?

Mas Dunay Puwersa ang Lihok kay sa mga Pulong

Sa 2003 ang Global Governance Initiative sa World Economic Forum nagsugod sa pagsusi kon unsa nay nahimo aron makab-ot ang mga tumong nga gilatid diha sa United Nations Millennium Declaration. Ang opisyal nga report, nga giluwatan sa Enero 15, 2004, nag-ingon: “Ang kalibotan wala gayod maningkamot sa pagkab-ot sa tanan nilang dagkong mga tumong.” Mahitungod sa kagutom, ang report nag-ingon: “Ang problema dili ang dakong kakulangan sa pagkaon sa kalibotan—adunay igong pagkaon alang sa tanan. Ang problema mao nga ang mabatonang pagkaon ug igong sustansiya dili makaabot ngadto sa mga tawong way sapi.”

Bahin sa katibuk-ang problema sa kakabos, ang report nag-ingon: “Ang mga kagamhanan, dato man o kabos, menos ug paningkamot sa pagsulbad niini. Apan ang sistema sa panalapi sa kalibotan nga gilaraw sa mga sapian dili gayod makahatag ug kaayohan sa kabos kaayong mga nasod. Ang datong mga nasod, bisan pa sa ilang dalayegong mga panaad, walay interes sa pagbag-o niana nga sistema o sa paghatag ug igong tabang ngadto sa labing kabos nga kanasoran.” Bisan pa niini nga pagsaway, ang mga politiko mas gustong magdebate imbes molihok ug ang mga kagamhanan nagpadayon sa pagmaniobra sa mga butang, alang sa ilang kaugalingong bentaha. Kasamtangan, ang mga kabos sa kalibotan nagpadayon sa pag-antos sa kagutom.

Usa ka pulyeto gikan sa World Economic Forum, nga nag-ulohang “From Aspiration to Action,” nagpasidaan nga “mosamot ang kagutom sa daghan kaayong tawo gawas kon bag-ohon sa mga nasod ang mga polisa maylabot sa negosyo, kon maghimo ang mga nasod ug mga polisa sa pagwagtang sa kagutom ug kon padaghanon ang malamposong lokal nga mga paningkamot.” Ug kinsa ang kinahanglang maningkamot sa paghimog mas maayong mga polisa ug sa pagpadaghan sa “malamposong lokal nga mga paningkamot”? Ang mismong mga kagamhanan nga niadtong 2000 mipadayag sa publiko sa ilang determinasyon sa pagpauswag sa pagkabutang sa tanang tawo.

Ang usa ka panaad nga dili matuman moresulta ug kahigawad; ang daghang panaad nga dili matuman moresulta ug pagkawala sa pagsalig. Tungod kay ang mga kagamhanan sa kalibotan napakyas sa pagtuman sa ilang panaad sa pagtabang sa mga kabos, ang mga tawo nawad-an ug pagsalig kanila. Ang usa ka inahan nga may lima ka anak nga nagpuyo sa kabos nga nasod sa Caribbeano makapakaon sa iyang pamilya kausa lang sa usa ka adlaw. Siya miingon: “Ang ako lang nga gikabalak-an mao kon may makaon ba kami. Dili hinungdanon nako kon kinsay anaa sa gahom. Kami walay nadawat nga bisan unsa gikan kang bisan kinsa nga anaa sa gahom.”

Ang magsusulat sa Bibliya nga si Jeremias miingon: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Ang kapakyasan sa tawhanong mga kagamhanan sa pagsulbad sa mga problema sa mga kabos nagpamatuod nianang gipadayag nga kamatuoran sa Bibliya.

Apan adunay usa ka Magmamando nga may gahom ug tinguha nga gikinahanglan sa pagsulbad sa mga problema sa tawo, ug siya gipaila sa Bibliya. Kon kana nga Magmamando mao nay mogahom, wala na unyay magutman pa.

Usa ka Basehanan sa Paglaom

“Ang tanang mata nagalantaw nga malaomon kanimo, ug ginahatag mo kanila ang ilang pagkaon sa gitakdang panahon niini.” (Salmo 145:15) Kinsa kining Usa nga nagtagad sa panginahanglan sa mga tawo ug pagkaon? Ang Atong Maglalalang, si Jehova nga Diyos. Bisan pag ang tawhanong kaliwat nag-antos sa kagutom ug ubang mga problema sulod sa libolibo na ka tuig, si Jehova interesado gayod sa mga tawo. Iyang nakita ang kapakyasan sa tawhanong mga kagamhanan, ug ang iyang dili-masayop nga Pulong, ang Bibliya, nagpakita nga sa dili madugay iyang pulihan kini ug iyang kaugalingong kagamhanan.

Si Jehova miingon: “Ako, ako mismo, nagpahimutang sa akong hari Ibabaw sa Zion, ang akong bukid nga balaan.” (Salmo 2:6) Kini nga proklamasyon nga naggikan sa kinalabwang awtoridad sa uniberso makahatag ug paglaom. Samtang ang tawhanong mga magmamando napakyas gayod sa pagtabang sa ilang mga ginsakpan, si Jesu-Kristo, ingong Hari nga gitudlo sa Diyos, mohatag ug mga kaayohan nga wala pa matagamtam sukad sa labing kabos nga mga tawo sa kalibotan.

Pinaagi niining maong Hari, pakaonon ni Jehova ang tanang gigutom. “Ang Ginoo sa mga panon maghimo alang sa tanang tawo ug kombira sa matambok nga mga pagkaon,” nag-ingon ang Isaias 25:6 sa New American Bible. Ilalom sa Gingharian sa Diyos nga pagamandoan ni Kristo, ang mga tawo dili gayod mawad-an ug igong pagkaon, bisag asa pa sila magpuyo. Bahin kang Jehova, ang Bibliya nag-ingon: “Imong ginabukhad ang imong kamot ug ginatagbaw ang tinguha sa tanang buhing butang.”—Salmo 145:16.

[Blurb sa panid 13]

“Ang adunahang mga nasod napakyas sa pagtabang sa Aprika nga nakapakurat ug nakahatag ug kaulawan sa atong sibilisasyon.”—Primer Ministro sa Britanya nga si Tony Blair

[Hulagway sa panid 12]

ETHIOPIA: Niining nasora duolan sa 13 ka milyong tawo nagdepende sa hinabang nga pagkaon. Ang bata nga gipakita sa ibabaw maoy usa kanila

[Hulagway sa panid 12]

INDIA: Kining mga estudyanteha nagdawat ug pagkaon sa eskuylahan

[Picture Credit Lines sa panid 12]

PAGMATA!