Sa Dili Madugay​—Wad-on na ang Tanang Kalamidad

“Mga anak ug mga apo. Pamati! . . . Sa madugay ug sa madali kini nga bolkan mobuto. Apan sa dili pa kini mobuto, ang bolkan modaguok ug modaguhob ug may mahitabong linog. Kini mopabuga ug mga aso ug mga kalayo ug mga kilat, ang hangin mohuros ug modaguhong ug mohadyong. Dagan taman sa ginhawa . . . kon kamo naglagot sa bolkan, kon ang mga kabtangan ug manggad mas importante kaninyo kay sa kinabuhi, kamo makatilaw gyod sa bolkan tungod kay kamo gahig ulo ug dalo. Ayaw nag kawilihi ang inyong abohan ug balay, panagan na mo.”

KANA nga pasidaan, nga gikan sa librong Earth Shock, ni Andrew Robinson, gikulit diha sa papan nga monyumento sa Portici​—usa ka lungsod sa tiilan sa Mount Vesuvius sa Italya​—human mibuto ang bolkan sa 1631. Ang pagbuto mikalas ug kapin sa 4,000 ka kinabuhi. “Sa wala damha,” matod ni Robinson, “tungod niini nga pagbuto sa 1631 . . . ang Vesuvius nabantog.” Sa unsang paagi? Tungod kay sa gitukod pag-usab ang Portici, nakalotan ang nalubong nga Herculaneum ug Pompeii. Kining duha ka siyudad nagun-ob ug natabonan sa dihang mibuto ang Vesuvius sa 79 K.P.

 Si Pliny nga Manghod, usa ka Romano nga naluwas niana nga kalamidad ug sa ulahi nahimong gobernador, misulat bahin sa talagsaon ug makapaalarma nga mga pag-uyog sa yuta. Siya, ang iyang inahan, ug ang uban mikalagiw gikan sa bolkan ug naluwas.

Pasidaang Ilhanan Alang sa Atong Panahon

Karon kita duol na kaayo sa kataposan sa ekonomikanhon, katilingbanon, ug politikanhon nga mga sistema sa kalibotan. Sa unsang paagi kita nahibalo niana? Tungod kay si Jesu-Kristo nagtagna ug sunodsunod nga mga panghitabo sa kalibotan nga maoy magsilbing ilhanan nga nagpakita nga haduol na ang adlaw sa panudya sa Diyos. Sama sa usa ka bolkan nga nagdaguhob, nag-aso-aso, ug nagbuga ug mga baga, kanang maong mga ilhanan sama sa dagkong mga gubat, linog, kagutom, ug kamatay​—tanan nakapayhag sa kalibotan sa grabe kaayong sukod sukad sa 1914.​—Mateo 24:3-8; Lucas 21:​10, 11; Pinadayag 6:1-8.

Apan ang ilhanan nga gihatag ni Jesus dunay mensahe usab sa paglaom. “Kining maayong balita sa gingharian,” matod niya, “igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mateo 24:14) Matikdi nga ang mensahe sa Gingharian gitawag ni Jesus ug “maayong balita.” Kini maayo gayod nga balita tungod kay ang Gingharian sa Diyos, nga usa ka langitnong kagamhanan nga si Kristo Jesus ang magmando, magawagtang sa kadaot nga gipahinabo sa mga tawo. Dugang pa, wad-on niini ang natural nga mga kalamidad.​—Lucas 4:43; Pinadayag 21:​3, 4.

Sa pagkatinuod, niadtong nagkinabuhi pa siya ingong tawo dinhi sa yuta, gipasundayag ni Jesus ang iyang gahom sa pagkontrolar sa klima pinaagi sa pagpakalma sa usa ka kusog kaayong bagyo. Sa kataha, ang iyang mga tinun-an miingon: “Kinsa ba gayod kini siya, kay mandoan niya bisan ang mga hangin ug ang tubig, ug mopatuo sila kaniya?” (Lucas 8:22-25) Karon, si Jesus dili na tawo, kondili usa na ka gamhanan nga espiritu. Busa, dili lisod alang kaniya ang pagkontrolar sa mga puwersa sa kinaiyahan nga mahimong makadaot sa iyang mga sakop!​—Salmo 2:6-9; Pinadayag 11:15.

Ang uban tingali nag-isip niining tanan ingong pangandoy lamang. Apan hinumdomi nga ang tagna sa Bibliya​—dili sama sa mga saad ug panagna sa tawo​—matuman gayod, apil niini ang mga tagna nga atong nakita nga natuman sukad sa 1914. (Isaias 46:10; 55:​10, 11) Oo, ang malinawon nga palaaboton sa yuta seguradong moabot. Segurado usab ang atong palaaboton kon atong itisok sa kasingkasing ang Pulong sa Diyos ug patalinghogan ang mahigugmaong pasidaan niini bahin sa makuyaw kaayong mga panghitabo nga hapit nang moabot.​—Mateo 24:​42, 44; Juan 17:3.

[Kahon/Hulagway sa panid 11]

UNSAY PAGLAOM SA ATONG MGA MINAHAL NGA NAMATAY?

SA DIHANG mamatay ang atong minahal, tingali malumsan kita sa kaguol. Ang Bibliya nag-ingon nga mihilak si Jesus sa dihang namatay ang iyang suod nga higalang si Lazaro. Bisan pa niana, paglabay sa pipila lang ka minutos si Jesus naghimog usa ka makapahingangha nga milagro​—iyang gibanhaw si Lazaro! (Juan 11:32-44) Ang iyang gihimo naghatag sa tanang tawo ug lig-ong basehanan sa pagtuo sa katingalahang saad nga iyang gisulti sa unang bahin sa iyang ministeryo sa dihang siya miingon: “Ang takna nagsingabot nga ang tanan nga anaa sa handomanang mga lubnganan makadungog sa iyang tingog [ni Jesus] ug manggula.” (Juan 5:​28, 29) Hinaot nga ang hamili nga paglaom sa pagkabanhaw diha sa paraisong yuta mohatag ug kahupayan sa tanang namatyan ug mga minahal.​—Buhat 24:15.

[Mga hulagway sa panid 10]

Namati ka ba sa pasidaan nga ang kalibotan karon anaa na sa kataposang mga adlaw niini?

[Picture Credit Line sa panid 10]

USGS, David A. Johnston, Cascades Volcano Observatory