Ang Hunahuna sa Bibliya

Ang Astrolohiya Magbutyag ba sa Imong Kaugmaon?

SA UNSANG paagi imong mapauswag ang imong kinabuhi ug mapalampos ang imong pagpangagpas sa gugma ug salapi? Daghang tawo ang modangop sa astrolohiya alang sa tubag. Kada adlaw milyonmilyon ang mobasa sa mga horoskopyo diha sa mantalaan sa paglaom nga magmalamposon ang ilang kaugmaon. Bisan ang mga lider sa kalibotan nahibaloan nga nagpagiya sa mga bituon sa paghimog mga desisyon.

Kasaligan ba ang astrolohiya? Sa unsang paagi managna ang mga astrologo? Angay bang tugotan sa mga Kristohanon ang mga bituon ug mga planeta nga maoy magbuot kon sa unsang paagi sila magkinabuhi?

Unsa ang Astrolohiya?

Sumala sa The World Book Encyclopedia, ang astrolohiya “gipasukad sa pagtuo nga ang mga bituon ug mga planeta naglatid ug mga sumbanan nga makabutyag sa kinaiya o kaugmaon sa tawo.” Nagtuo ang mga astrologo nga ang tukmang mga posisyon sa mga planeta ug mga simbolo sa zodiac sa adlaw sa pagkatawo makaimpluwensiya sa pagkinabuhi sa usa. * Ang posisyon sa maong mga bituon ug mga planeta sa bisan unsang espesipikong panahon gitawag ug horoskopyo.

Dugay nang gituohan ang astrolohiya. Mga upat ka libo ka tuig kanhi, gisugdan pagtagna sa mga Babilonyanhon ang umaabot pinasukad sa mga posisyon sa adlaw, bulan, ug sa lima ka planeta nga dali kaayong makita. Matod nila nga kining mga butanga sa langit adunay mga puwersa nga makaimpluwensiya sa kinaiya sa tawo. Sa ulahi ilang gilakip ang mga simbolo sa zodiac sa ilang mga pagpanagna.

Hataas nga Kasaysayan sa Kapakyasan

Gipasiugda sa Bibliya ang kalambigitan sa Babilonya ug sa astrolohiya, ug sa makadaghan kini naghisgot sa mga astrologo sa Babilonya. (Daniel 4:7; 5:​7, 11) Sa mga adlaw ni manalagnang Daniel, kaylap kaayo ang astrolohiya sa Caldea (Babilonya) nga ang paggamit sa terminong “mga Caldeanhon” nagtumong gayod sa mga astrologo.

Nakita ni Daniel ang impluwensiya sa astrolohiya sa Babilonya ug ang kapakyasan sa mga astrologo niini sa pagtagna sa pagkapukan sa siyudad. (Daniel 2:27) Matikdi kon unsay tukmang gitagna ni manalagnang Isaias duha ka siglo nga mas sayo. “Paduola ang imong mga astrologo ug paluwasa sila kanimo​—silang nagtuon sa mga bituon, nga naglatid sa ilang mga dapit sa kalangitan ug pasultiha sila kanimo sa matag bulan  kon unsay mahitabo kanimo,” mabiaybiayong misulat si Isaias. “Dili gani sila makaluwas sa ilang kaugalingon.”​—Isaias 47:​13, 14, Today’s English Version.

Dayag nga ang Babilonyanhong mga astrologo dili makatagna sa pagkapukan sa ilang siyudad bisag pipila lang ka oras nga abante. Ug sa dihang ang malaglagong paghukom sa Diyos gipakita diha sa bungbong sa palasyo ni Haring Belsazar, ang mga astrologo wala makabadbad sa misteryosong sinulat.​—Daniel 5:​7, 8.

Ang mga astrologo karon dili usab makatagna sa talagsaong mga hitabo. Human masusi ang kapin sa 3,000 ka espesipikong mga pagpanagna sa astrolohiya, ang mga siyentipikong imbestigador nga si R. Culver ug Philip Ianna nakahinapos nga 10 porsiyento lamang ang tukma. Apan si bisan kinsang batid nga tig-analisar sa dagan sa mga butang ug panghitabo makahimo pag mas maayo kay niana.

Supak sa mga Pagtulon-an sa Bibliya

Hinunoa, ang Hebreohanong mga manalagna wala magsalikway sa astrolohiya tungod lang sa dayag nga pagkapakyas niini sa pagtagna sa umaabot sa tukmang paagi. Ang Balaod nga gihatag sa Diyos kang Moises pintok nga nagpasidaan sa mga Israelinhon batok sa pagpangitag mga tilimad-on. “Walay makaplagan diha kanimo . . . bisan kinsa nga nagapanag-an . . . o bisan kinsa nga nagapangitag mga tilimad-on,” nag-ingon ang Balaod. “Bisan kinsa nga nagabuhat niining mga butanga dulumtanan kang Jehova.”​—Deuteronomio 18:​10, 12.

Bisan tuod ang astrolohiya wala hisgoti nga tino sa maong teksto, tin-aw nga ang pagdili naglakip sa maong buhat. Ang Encyclopædia Britannica nag-ingon nga ang astrolohiya maoy usa ka “matang sa pagpanagna nga naglangkob sa pagtagna sa yutan-on ug tawhanon nga mga hitabo pinaagi sa pag-obserbar ug pag-interpretar sa tinong mga bituon, Adlaw, Bulan, ug mga planeta.” Ang tanang matang sa pagpanagna​—gipasukad man sa mga bituon o sa ubang mga butang​—nagsupak sa mga lagda sa Diyos. Ngano? Adunay maayong rason.

Inay ipasidungog ang atong mga kalamposan o ipasangil ang atong mga kapakyasan ngadto sa mga bituon, ang Bibliya tin-awng nag-ingon nga “bisan unsay ginapugas sa usa ka tawo, kini usab iyang anihon.” (Galacia 6:7) Kitang tanan manubag sa Diyos sa atong mga lihok, kay kita adunay kagawasan sa pagpili. (Deuteronomio 30:​19, 20; Roma 14:12) Tinuod, mahimong mag-antos kita gumikan sa aksidente o sakit tungod sa mga hitabo nga dili nato makontrolar. Apan ang Kasulatan nag-ingon nga ang maong mga katalagman maoy tungod sa ‘panahon ug wala damhang panghitabo,’ dili sa atong horoskopyo.​—Ecclesiastes 9:11.

Kon bahin sa tawhanong mga relasyon, kita giawhag sa Bibliya nga isul-ob nato ang mga hiyas sama sa pagkamabination, kalulot, pagpaubos sa hunahuna, kalumo, hataas-nga-pailob, ug gugma. (Colosas 3:12-14) Kining mga hiyasa maoy yawi sa pagbaton ug dumalayong mga panaghigalaay ug pagpalig-on sa mga kaminyoon. Ang pagpilig kapikas sa kaminyoon nga pareho nilag simbolo sa zodiac maoy dili kasaligang giya. Gisusi sa sikologong si Bernard Silverman ang horoskopyo sa pagkatawo sa mga 3,500 ka magtiayon, 17 porsiyento kanila nagbulag ra gihapon sa ulahi. Wala siya makakaplag ug ubos nga gidaghanon sa diborsiyo taliwala sa mga tawong nakigminyo sa pareho nilag simbolo sa zodiac.

Klaro nga ang astrolohiya dili kasaligan ug makapahisalaag. Mao na hinuoy atong basolon ang mga bituon inay ang atong kaugalingon kon makahimo kitag mga kasaypanan. Labaw sa tanan, kini dayag nga gisaway diha sa Pulong sa Diyos.

[Footnote]