Gikan sa Among mga Magbabasa

Kabataan Di pa dugay nabasa nako ang serye nga “Ang Unang mga Tuig sa Bata​—Unsay Angayng Himoon sa mga Ginikanan?” (Oktubre 22, 2004) Nakadayeg kaayo ko niining mga artikuloha mao nga ako nakadesider sa pagsulat. Ako adunay anak babaye nga hapit nang magsingko anyos. Akong gihunahuna kaniadto nga kinahanglan nakong ieskedyul ang tanan niyang kalihokan. Hinunoa, nag-ingon ang magasin nga gibati sa pipila ka magtutudlo nga ang mga bata kinahanglang tugotan rang magduladula nga silasila ra, kay kini magpalihok sa pagkamamugnaon ug mag-ugmad sa ilang sosyal, mental, ug emosyonal nga mga katakos. Daghang salamat! Palihog ipadayon ang pagpatik ug mga artikulo nga may susamang mga ulohan!

I. K., Rusya

Sa dihang gibasa nako kining mga artikuloha, wala nako kapugngi ang akong mga luha. Nahinumdom ako 29 ka tuig kanhi sa dihang ako adunay masuso, ug niadtong tungora ako batan-on pa kaayong inahan nga wala mag-alagad kang Jehova. Nakahimo akog daghang sayop. Apan ang akong mga luha sa pagbasol nahimong mga luha sa kalipay. Sa miaging semana, ang akong anak babaye nanganak sa iyang panganay. Mapasalamaton kaayo ako kang Jehova nga ang akong apo adunay mga ginikanan nga nahigugma kang Jehova ug makapahimulos sa maong mga artikulo.

E. H., Tinipong Bansa

Mga Batan-on Nangutana Daghan kaayong salamat sa artikulo nga “Mga Batan-on Nangutana . . . Sa Unsang Paagi Ikasulti Nako Niya ang Akong Gibati?” (Oktubre 22, 2004) Di pa dugay, usa ka batan-ong babaye nakigbulag kanako. Tungod kay nahigugma pa man ko niya, naglaom pa gihapon ako nga makig-uli pa siya kanako. Apan human nakog basa niining artikuloha, akong nasabtan nga damgo lamang kini, ug sa unang higayon, nadawat nako ang kamatuoran. Salamat sa paghisgot sa maong praktikal nga ulohan. Sa makausa pa, akong nasabtan kon sa unsang paagi makatabang kanamo ang mga prinsipyo sa Bibliya.

Y. K., Japan

Bisan tuod sa pagkakaron wala pa koy giplanohang pangulitawhan aron minyoan, kining artikuloha dakog gikatabang kanako nga magmabinantayon kanunay. Tinuod nga kaming mga batan-on ang mas nameligro sa mga pag-atake ni Satanas, apan tinuod usab nga si Jehova nagatabang kanamo. Ipadayon ang pagpatik sa mga artikulo nga sama niini!

C. D., Romania

Kining artikuloha nakatabang nako sa pag-isip sa mga butang sa matinud-anong paagi. Nakatabang kini kanako sa pagdesider nga palabyon una ang dugang panahon sa dili pa ako mangulitawo. Labaw sa tanan, kini nakadasig kanako sa pagbuhat ug labaw pa diha sa kongregasyon aron mapauswag nako ang akong reputasyon ug mapalambo usab ang akong relasyon kang Jehova. Kini makapahimo kanako nga mas madanihon ngadto sa tanan. Salamat sa inyong masinabtanong pagtagad sa mga batan-on!

D. K., Olandia

Usa ka adlaw niana, nagkaestoryahanay mi sa akong higalang babaye bahin sa lalaki nga iyang gikaibgan. Gusto siyang magpatambag kanako kon unsaon niya pagpahayag sa iyang gibati. Gipaningkamotan namong mahinumdoman ang mga prinsipyo sa Bibliya. Busa inyong mahanduraw ang among katingala sa dihang sa pagkasunod adlaw among nadawat kining magasina! Salamat kaayo sa pagpatik niining mga artikuloha!

J. S., Irlandia

Ako 14 anyos. Sa among klase sa tunghaan, ang gugma ug panagtratohay mao kanunay ang hisgotan. Sa pagbasa nako niining artikuloha, daghan akog nakat-onan kon unsaon pagpangitag kapikas sa kaminyoon sa umaabot. Nasabtan usab nako kon sa unsang paagi si Jehova nagtagad gayod kanamo ug naghatag ug maayong tambag. Buot akong molihok nga maalamon​—sa paagi nga dalawaton sa Diyos—uban sa mga kaatbang sa sekso. Palihog ipadayon ang pagpatik ug talagsaong mga artikulo nga sama niini sa umaabot.

K. I., Japan