Kagawasan Gikan sa Kahadlok—Posible ba Kini?

MAKAHIMO ba si bisan kinsa sa pagkinabuhi niining makuyaw nga kalibotan karon nga dili gayod mahadlok? Dili gayod. Bisan ang mga tawo nga may pagtuo sa Diyos nag-atubang ug mga kapeligrohan nga makapabalaka. Pananglitan, sa unang-siglo K.P., si apostol Pablo nga nakabiyahe na ngadto sa daghang dapit, naghisgot nga iyang nasinatian ang pagkalunod, kapeligrohan sa mga suba, kapeligrohan gikan sa mga tulisan sa dalan, ug kapeligrohan diha sa siyudad. (2 Corinto 11:25-28) Karong adlawa usab, kadaghanan kanato kinahanglang moatubang sa peligrosong mga kahimtang.

Apan, makahimo kitag maalamong mga panagana, ug kon mamenosan nato ang mga kapeligrohan, hayan mamenosan nato ang atong mga kabalaka. Ang Bibliya nag-ingon: “Maalamon ang tawo nga nakakita sa katalagman ug nagtago sa iyang kaugalingon, apan ang walay kasinatian moagi ug magaantos sa silot.” (Proverbio 22:3) Unsa ang pipila ka mapuslanong mga lakang nga angayng himoon?

Mga Pagpanagana

Makaiikag, bisan tuod ang Bibliya gisulat dugay na kanhi, kini naundan ug daghang prinsipyo nga mapuslanon gihapon aron malikayan ang mga kapeligrohan karon. Pananglitan, kini nag-ingon: “Mahitungod sa maalamon, ang iyang mga mata anaa sa iyang ulo; apan ang hungog nagpadayon sa paglakaw diha sa tumang kangitngit.” (Ecclesiastes 2:14) Maalamon gayod nga magmabinantayon kon kinsay anaa sa imong duol ug ayaw pag-agi diha sa ngitngit nga mga dapit kutob sa mahimo. Labing maayo kon anha ka moagi sa hayag nga mga dalan inigpauli nimo, bisan pag medyo layolayo ang imong lakwon. Ang Bibliya usab nag-ingon: “Ang duha mas maayo kay sa usa . . . Kon ang usa ka tawo makabuntog sa usa nga nag-inusara, ang duha nga magkauban makabarog batok kaniya.” (Ecclesiastes 4:​9, 12) Kon anaa ka nagpuyo sa usa ka peligrosong lugar, duna bay imong ikauban inigpauli nimo sa inyoha?

Kon hold-apon ka, hinumdomi gayod nga ang kinabuhi mas bililhon kay sa kabtangan. (Mateo 16:26) Maayo usang hinumdoman nga kon dunay magtapok nga mga tawo nga mopahungaw sa ilang kasuko, peligroso sila ug dili matag-an ang ilang mga lihok.​—Exodo 23:2.

 Kon gihasi ka sa usa ka tawo nga dunay imoral nga katuyoan, mosultig law-ay nga mga pasiaw, o mosulay sa paghikap kanimo, isalikway gayod siya. Biyai dayon siya, sama sa gihimo ni Jose sa dihang gihawiran siya sa usa ka babaye nga dunay imoral nga tuyo. Siya ‘mikalagiw ug migawas.’ (Genesis 39:12) Kon imposible ang pagbiya, mahimo kang moingon: “Hunonga kana!” o “Ayaw kog hikapa!” o “Wa ko kagusto sa imong sinultihan.” Kon mahimo, ayawg agi diha sa mga dapit diin kanunayng mahitabo ang pagpanghasi.

Pagsagubang sa Kahadlok Diha sa Panimalay

Unsay imong mahimo kon nahadlok ka sa imong pintas nga bana? Maalamon tingali ang pagplano ug kaikyasan enkasog ang lihok sa imong bana kalit lang magpameligro sa imong panglawas o kinabuhi o sa imong mga anak. * Ang Bibliya nag-asoy kon sa unsang paagi mainampingong giplano ni Jacob ang kaikyasan nga mahimong gamiton enkasog mahimong pintas ang iyang igsoon nga si Esau. Ingon sa nahitabo, ang plano wala magamit, apan usa kadto ka maalamong pagpanagana. (Genesis 32:6-8) Ang usa ka plano alang sa pag-ikyas mahimong maglangkit sa pagpangitag usa ka tawo nga mosagop kanimo panahon sa emerhensiya. Mahimo nimong pakig-estoryahan daan ang maong tawo kon unsay imong mga panginahanglan. Labing maayo kon ang hinungdanong mga dokumento ug uban pang hinungdanong mga butang hiposon diha sa dapit nga dali rang makuha.

Ang pagtaho sa pagpangabuso sa imong bana ngadto sa mga awtoridad ug pagpangayo sa ilang proteksiyon mahimong usa usab ka kapilian. * Ang Bibliya nagtudlo kanato nga kitang tanan kinahanglang mosagubang sa mga linugdangan sa atong mga lihok. (Galacia 6:7) Maylabot sa awtoridad sa gobyerno, ang Bibliya nag-ingon: “Kini ministro sa Diyos alang sa imong kaayohan. Apan kon ikaw nagabuhat sa daotan, angay ka nga mahadlok.” (Roma 13:4) Ang pagpanagmal diha sa panimalay maoy usa ka seryosong krimen nga sama ra sa krimen diha sa kadalanan. Ang pagsunodsunod o pagpanuop maoy usa usab ka krimen sa daghang nasod.

Ang paghimo sa mga lakang nga atong nahisgotan hayan makapamenos sa kahadlok. Apan ang Bibliya naghatag ug labaw pa kay sa mapuslanong tambag. Kini maoy usa ka basahon sa dili-mapakyas nga mga tagna nga nagbutyag kon unsay ginabuhat karon sa Diyos ug kon unsay iyang pagabuhaton sa umaabot. Unsa ang paglaom nga gitanyag sa Bibliya para sa mga tawo nga napugos sa pagkinabuhi diha sa kahadlok?

Kon Unsay Kahulogan sa Makahahadlok nga Panahon

Makaiikag, si apostol Pablo misulat: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya magmahigugmaon sa ilang kaugalingon, . . . walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo.” (2 Timoteo  3:1-3) Kining mga pulonga naghubit gayod ug makahahadlok nga mga panahon!

Sa dihang si Jesus naghisgot bahin sa “kataposan sa sistema sa mga butang,” siya miingon: “Ang nasod motindog batok sa nasod, ug ang gingharian batok sa gingharian; ug aduna unyay dagkong mga linog, ug sa nagkalainlaing mga dapit mga kamatay ug mga kanihit sa pagkaon; ug aduna unyay makalilisang nga mga talan-awon ug dagkong mga ilhanan gikan sa langit.” (Mateo 24:​3, 7, 8; Lucas 21:​10, 11) Busa, ang “makalilisang nga mga talan-awon” nga atong nakita ug nakapasamot sa makahahadlok nga panahon karon kinahanglang dili makapakurat kanato. Apan unsay kahulogan niini?

Si Jesus miingon: “Sa dihang makita ninyo nga nagakahitabo kining mga butanga, hibaloi nga ang gingharian sa Diyos haduol na.” (Lucas 21:31) Ning atong panahon, makadahom kita ug usa ka gobyerno nga iya sa Diyos nga momando gikan sa langit ibabaw sa tanang katawhan. (Daniel 2:44) Sama sa unsa kaha ang kinabuhi nianang panahona?

Kagawasan Gikan sa Kahadlok!

Gihubit sa Bibliya ang usa ka umaabot nga malinawong panahon sa dihang walay nay mga gubat, mga mamumuhat ug daotan, ug ang yuta mapuno ug mga tawo nga nahigugma sa Diyos. Si Pedro, nga usa ka apostol ni Jesus, misulat bahin sa usa ka umaabot nga “adlaw sa paghukom ug sa kalaglagan sa mga tawong dili-diyosnon.” Wala nay bisan unsang daotan nga kahadlokan pa tungod kay ‘ang pagkamatarong magpuyo’ dinhi sa yuta. (2 Pedro 3:​7, 9, 13) Hunahunaa lang ang kahupayan sa pagpuyo taliwala sa kasaligang mga tawo nga nahigugma gayod sa usag usa! Kining maong palaaboton motabang kanato sa pag-isip sa presenteng makuyaw nga mga panahon nga may paglaom. Kining kahimtanga dili magpadayon hangtod sa hangtod.​—Salmo 37:9-11.

Alang sa kaayohan niadtong mga tawong nabalaka, ang manalagna ni Jehova giingnan: “Sultihi ang mga nabalaka sa kasingkasing: ‘Magmalig-on. Ayaw kahadlok. Tan-awa! Ang inyong kaugalingong Diyos moabot uban ang panimalos, ang Diyos uban gayod ang pagbalos. Siya mismo moabot ug magluwas kaninyo.’” (Isaias 35:4) Busa, ang mga alagad sa matuod nga Diyos makapanglantaw sa umaabot nga may pagsalig. (Filipos 4:​6, 7) Alang sa mga tawo nga kinahanglang magkinabuhi diha sa kahadlok, makapahupay gayod ang pagkahibalo nga wala talikdi ni Jehova ang iyang unang katuyoan alang sa yuta nga mapuno ug mga tawo nga nakaila kaniya ug nagbanaag sa iyang mahigugmaong mga hiyas.​—Genesis 1:26-28; Isaias 11:9.

Nahibalo kita nga walay makapugong kang Jehova sa pagtuman sa iyang mahigugmaong mga katuyoan alang sa katawhan. (Isaias 55:​10, 11; Roma 8:35-39) Sa dihang masabtan nato kini, ang mga pulong sa pamilyar kaayong salmo adunay linaing kahulogan. Didto atong mabasa: “Si Jehova mao ang akong Magbalantay. . . . Siya nagapabaskog sa akong kalag. Siya nagaagak kanako sa mga alagianan sa pagkamatarong tungod sa iyang ngalan. Bisan kon magalakaw ako sa walog sa mabagang kangiob, ako walay kahadlokan nga daotan, kay ikaw magauban kanako.” (Salmo 23:1-4) Bisag mosamot pa ang makahahadlok nga mga panahon, haduol na ang usa ka kalibotan nga walay kahadlok ug kini moabot gayod.

[Mga footnote]

[Mga hulagway sa panid 8-10]

Sa dili madugay ipadangat sa Diyos ang usa ka kalibotan nga walay kahadlok