Karaang Artikulo Nakatandog sa Kasingkasing

SA USA ka tunghaan sa Suwałki, sa amihanan-sidlakang Polandia, gipaandam sa usa ka magtutudlo ang iyang mga estudyante alang sa panaghisgot bahin sa aborsiyon. Ang disesayis anyos nga si Justyna nanguhag pipila ka impormasyon gikan sa mga publikasyon sa mga Saksi ni Jehova. Sa adlaw sa panaghisgot, gihatagan silag higayon sa magtutudlo sa pagpahayag sa ilang mga opinyon.

“Akong giduol ang magtutudlo ug gipakita kaniya ang artikulong ‘Talaadlawan sa Batang Wala pa Matawo,’ nga gipatik sa Septiyembre 22, 1980, nga gula sa Pagmata!” matod ni Justyna. Giingnan niya ang iyang magtutudlo: “Palihog matikdi nga kini gisulat sumala sa panglantaw sa usa ka bata nga nagtubo pa sa tiyan, nga hapit nang ipakuha. Sa akong hunahuna, makapainteres gayod kini.” Gibasag kusog sa magtutudlo ang talaadlawan. Hilom lang ang mga estudyante, ang tanan naminaw pag-ayo.

Wala pa gani makatunga sa pagbasa ang magtutudlo, dili na niya kapugngan ang iyang gibati mao nga gihangyo niya ang usa ka estudyante nga maoy mopadayon sa pagbasa niana. Milingkod ang magtutudlo ug mihilak. Human mabasa ang talaadlawan, misunod ang makaiikag nga panaghisgot, ug ang pipila ka estudyante nangayog kopya sa maong artikulo. “Nabag-o ang tinamdan sa klase bahin sa literatura nga gipatik sa mga Saksi ni Jehova,” matod pa ni Justyna. “Kaniadto dili sila ganahan, apan karon maayo na ang ilang panglantaw niini. Nahimo pa ganing regular nga magbabasa sa Pagmata! ang usa ka batang lalaki.”

Maingon nga malamposong gigamit ni Justyna ang artikulo nga iyang nakaplagan sa usa ka gula sa Pagmata! nga gipatik 20 ka tuig na kanhi, ikaw usab makakaplag ug “usa ka puntil nga kaalam” diha sa daandaang mga gula niining magasina. (Job 28:18) Sa dihang motambong sa mga tigom sa lokal nga Kingdom Hall sa mga Saksi ni Jehova, mahimo nimong susihon ang mga tomo sa Pagmata! nga makita diha sa mga estante sa librarya. Malingaw ka gayod sa pagbasa sa mapuslanong mga artikulo nga bililhon gihapon bisan pa sa paglabay sa panahon. Makabaton ka usab ug bag-ong kopya sa Pagmata! gikan sa mga Saksi ni Jehova sa inyong dapit.

[Hulagway sa panid 31]

Si Justyna sa dihang nag-eskuyla pa siya