Nadani Ngadto sa Maglalalang Tungod sa Katahom sa Kamatuoran

SUMALA SA GIASOY NI TSUYOSHI FUJII

PIPILA ka tuig kanhi gihatagan akog talagsaong kahigayonan. Ingong luyoluyo ni Senei Ikenobo, pangulo sa Ikenobo nga tunghaan bahin sa paghan-ay ug mga bulak, akong gihan-ay ang mga bulak diha sa eleganteng lawak sa Imperyal nga Palasyo sa Tokyo, Japan. Nagtrabaho kami nga gibantayan ug maayo. Diha sa mapig-otong palibot, nag-amping ako nga dili makausik bisag usa lang ka tulo sa tubig. Usa kadto sa talagsaong mga okasyon sa akong karera sa paghan-ay ug mga bulak. Pasugira ako kon sa unsang paagi nakasulod ako sa maong trabaho.

Natawo ako niadtong 1948 sa Nishiwaki City, nga anaa sa amihanan-kasadpang Kobe, Japan. Sukad pa sa akong pagkabata, nakadayeg gayod ako sa mag-usab-usab nga katahom sa upat ka klima nga makita diha sa mga bulak. Ugaling lang, gimatuto ako sa akong apohang babaye nga usa ka debotadang Budhista, busa ang paghunahuna bahin sa usa ka Maglalalang wala gayod mosantop sa akong alimpatakan.

Hangtod karon ang akong inahan nagtudlo pa gihapon ug ikebana, o paghan-ay ug bulak, didto sa akong yutang natawhan. Sa Japan, ang ikebana, nga nailhan usab nga kado (ang paagi sa mga bulak), maoy gitamod pag-ayo nga kurso. Bisan tuod wala gayod ako tudloi ni Mama bahin sa maong arte, dako ang iyang impluwensiya kanako. Sa dihang miabot ang higayon nga modesisyon na ako kon unsay akong himoon sa umaabot, buot kong magtuon ug ikebana. Ang akong magtutudlo ug ang akong inahan nagrekomendar ug regular nga kurso sa unibersidad, apan sa walay pagpanuko gipili nako ang pagtungha sa Ikenobo College. Ang Ikenobo mao ang labing karaang kurso bahin sa ikebana sa Japan. Sa dihang nadawat na ako, naningkamot gayod ako sa pagtuon sa arte sa paghan-ay ug bulak.

Sinugdanan sa Pagtuon ug Ikebana

Ang ikebana, nga usa ka karaang buhat sa arte sa Japan, adunay kinabuhi sumala sa kahulogan niining pulonga. Pasaysaya ako. Nindot tingali tan-awon ang mga bulak nga gibutang sa usa ka timba diha sa baligyaanag bulak, apan ikatandi ba kini sa gagmayng mga bulak nga namuswak diha sa kapatagan o sa mga kahoy nga namulak didto sa kabukiran? Diha sa kinaiyanhong dapit sa mga tanom, imong bation ang kaanindot sa kinabuhi ug mga panahon. Mao nay higayon nga ang imong kasingkasing lagmit matukbil. Ang ikebana maoy usa ka paagi sa pagpahayag sa maong katahom diha sa kinaiyahan pinaagi sa paggamit sa mga bulak ug mga tanom, nga maghan-ay niini sumala sa kon unsay nakapatandog kanimo.

Pananglit, gusto nimong ipahayag ang imong bation panahon sa tinghunlak. Mahimo nimo kana pinaagi sa paggamit sa mga bulak sa maong panahon, sama sa gentian ug patrinia, uban sa mga dahon sa tinghunlak. Gusto ba nimong dugangan kana aron ikaw mobatig makapapreskong huyohoy? Ang pipila ka lindog sa eulalia nga nagbawog ug diyutay maoy paagi aron ikahulagway nimo kini, mao nga bation usab sa mga tumatan-aw ang hinuyohoy sa tinghunlak. Nadani kaayo ako sa ikebana, nga nalipay sa pagpahayag sa akong gibati pinaagi sa paghan-ay sa mga bulak ug mga tanom diha sa plorera.

Usa ka Dakong “Pamilya”

Ang kasaysayan sa ikebana ingong arte para sa pagdayandayan nagsugod 500 ka tuig kanhi. Ang mga tunghaan sa ikebana gikontrolar sa sistema sa pagmando sa usa ka pangulo. Mapanunod ang posisyon sa pangulo. Ingong manununod sa artistikong mga tradisyon, siya ang may awtoridad ingong patriarka ibabaw sa usa ka dakong “pamilya” sa  mga sumusunod. Uban sa mga tradisyon, iyang ipasa sa sunod nga kaliwatan ang bag-ong mga estilo nga iyang naugmad nga mohaom sa yugto sa panahon sa iyang pagkinabuhi.

Human makagraduwar sa Ikenobo College ug makatapos sa duha ka tuig nga teknikal nga kurso sa kado, mitrabaho ako sa Ikenobo Foundation niadtong Enero 1971. Akong giplano ug giorganisar ang “Mga Eksibit sa Ekenobo Foundation Bahin sa Ikebana” sa tibuok Japan. Milibot usab ako sa tibuok nasod uban sa pangulo ingong usa sa iyang mga luyoluyo sa paggama sa iyang mga buhat sa arte.

Mahinumdoman pa gihapon nako ang unang higayon nga ako nagbarog diha sa plataporma sa Fukuoka Sports Center ingong luyoluyo sa pangulo samtang iyang gipasundayag ang paghan-ay sa mga bulak. Ginerbiyos gayod ako nga nag-atubang sa libolibong tawo. Gibawog nako ang mga lindog ug giputol ang mga sanga, nga kining tanan dili unta nako angayng buhaton. Apan ang pangulo malulotong mipasiaw bahin niini samtang iyang gisaysay sa mga tumatan-aw ang iyang gihimo. Nakatabang kadto kanako nga marelaks.

Sa dihang himoon ang nasodnong mga eksibit nga tambongan sa iladong mga tawo gikan sa gawas sa nasod, mokuyog ako sa pangulo aron maghan-ay ug mga bulak alang sa maong okasyon. Sama sa akong gihisgotan sa sinugdan, ang usa sa maong kahigayonan mao ang paghan-ay ug mga bulak diha sa usa ka eleganteng lawak sa Imperyal nga Palasyo.

Sa ulahi, sa dihang ang Ikenobo Central Training School gitukod aron tudloan pag-usab ang mga instruktor sa tibuok nasod, giasayn ako sa trabaho nga nalangkit sa pagpanudlo, paghimog kurikulum, ug pagsuperbisar sa paggamag mga teksbok ug mga pelikula nga gamiton sa paglektyur sa mga 200,000 ka tawo nga nagbansay ug ikebana diha sa 300 ka sanga sa tibuok Japan. Mipanaw ako sa tibuok nasod aron isuperbisar ang kurso. May mga sanga usab ang Ikenobo sa ubang nasod, ug ako miadto sa Taiwan sa daghang higayon sulod sa usa ka tuig. Busa gisaligan ako sa pangulo ug gihuptan nako ang usa ka responsableng posisyon.

Nalingaw ako sa akong trabaho, apan wala gayod ako matagbaw sa akong kinabuhi. Bisan tuod ang akong trabaho nasentro sa matahom nga mga butang, dihay nakapahigawad kanako. Ang pangabugho ug kasina taliwala sa mga nagbansay misangpot sa pagdaot sa dungog, ug ang lokal nga mga instruktor sagad moduol kanako aron magpatambag. Apan sa usa ka organisasyon diin ang karaang mga kostumbre ug gahom maoy nagpatigbabaw, daghang butang ang dili nako makontrolar. Sanglit daghan ang interesado kaayo sa ikebana ug seryosong nagtuon niana, gipaningkamotan nako ang pagbuhat kutob sa akong maarangan aron sila makakat-on uban ang kalipay.

Unang Pagkasinati sa Katahom sa Kamatuoran

Wala koy gana sa relihiyon kay nagtuo ako nga mosangpot lang kini sa pagkanabutaan sa hunahuna. Gawas pa, nakita nako ang tumang pagkasalingkapaw niadtong naghisgot bahin sa kalinaw ug kalipay. Sa laing bahin, ang akong asawa, si Keiko, nangita sa kamatuoran sukad pa sa iyang pagkabata. Interesado siya sa nagkalainlaing relihiyon ug namati sa ilang mga pagtulon-an, apan walay usa niini ang nakatagbaw sa iyang espirituwal nga kagutom.

Busa sa dihang usa sa mga Saksi ni Jehova miduaw sa among balay, si Keiko miuyon nga magtuon sa Bibliya. Iya akong sultihan sa tanan niyang nakat-onan ug sa bisan unsa nga nakapahingangha kaniya. Maayo paminawon ang gisulti ni Keiko kanako, apan wala ko matakdi sa iyang kadasig.

Bisan pa niana, kanunay kong gisultihan ni Keiko uban ang hugot nga pagtuo bahin sa iyang nakat-onan gikan sa Bibliya. Kanunay niyang butangan ug duha ka magasin nga naghisgot bahin sa Bibliya ang akong bag inigbiyahe nako. Apan wala gyod nako kadto basaha. Akong giampingan ang akong karera nga akong giugmad sa daghang katuigan. Mao pay among pagpalit ug kaugalingong balay, ug daw anaa sa akong hunahuna nga kon akong dawaton ang mga pagtulon-an sa Bibliya, basig mawad-an na hinuon kamig balay. Sa kasamtangan, si Keiko kusog nga miuswag ug mipadapat sa iyang gituohan. Gibati nako nga ako sinalikway ug nag-inusara. Bisan tuod nasayod ako nga husto ang iyang gipanulti kanako, gisupak nako siya.

Misupak, Apan Nadani sa Kamatuoran

Kasagaran ako mopauli sa balay gikan sa trabaho nga gabii na kaayo, apan sa mga gabii nga motambong si Keiko sa mga tigom sa mga Saksi ni Jehova, tuyoon nakong mouli nga mas ulahi kay sa naandan. Bisan pag alas dos o alas tres sa kaadlawon na kong mopauli, si Keiko maghulat kanako aron suginlan ako kon unsay nahitabo nianang adlawa, nga nagpakitag kahingawa kanako. Apan dili nako madawat nga ang akong pamilya mobiya sa balay sulod sa pipila ka oras aron motambong sa  Kristohanong mga tigom. Gipangusgan nako ang pagsupak ug naghisgot na ako nga makigbulag. Apan, si Keiko nagmalig-on.

Wala ko makasabot kon nganong ingon niadto ang tinamdan ni Keiko. Bisan pa sa nadaot namong relasyon ug sa iyang giantos nga hubak, malipayon kaayo siya sa tanan niyang gibuhat. Ang putli nga kasingkasing ug talagsaong kalumo ni Keiko maoy unang nakadani kanako. Ug mao gayod kanay hinungdan kon nganong nabalaka ako nga basig nalimbongan siya sa pagsugod niyag tuon sa Bibliya.

Sa gihapon, gipadapat ni Keiko ang iyang nakat-onan ug naningkamot nga mahimong maayong asawa ug inahan. Bisag ako supak, sa dihang iya akong gihangyo nga motambong sa Kristohanong mga tigom ug mga asembliya, mitambong ako panagsa, tingali tungod kay mapasigarbohon ako kang Keiko.

Sa samang higayon, nangabugho ako kang Jehova. Sa nakita nako nga si Keiko naningkamot sa pagbag-o, natingala ako kon nganong ang mga pagtulon-an sa Bibliya adunay dakong epekto sa mga tawo. Ako naghunahuna, ‘Ngano kahang andam mang moantos ang akong asawa sa tanang kalisdanan alang kang Jehova?’

Wala madugay, pipila ka Kristohanong mga igsoong lalaki gikan sa kongregasyon ni Keiko ang naningkamot sa pagduaw kanako sa balay. Dili ko gustong makighimamat kanila. Apan buot kong mahibalo kon nganong si Keiko adunay kalinaw sa hunahuna. Sa kataposan, ang akong kamausisahon kusganon kaayo mao nga miuyon ako sa pagtuon sa Bibliya. Samtang nagkasuod kami niadtong miduaw kanako, akong namatikdan diha kanila ang usa ka butang nga makapadasig. Pinaagi sa senemanang pagtuon, ang kamatuoran sa Bibliya hinayhinay nga midulot sa akong kasingkasing, ug misangkad ang akong mga panglantaw.

Ang Katahom sa Kinaiyahan ug sa Kamatuoran

Sa gipaningkamotan nako pagpahayag ang katahom ug gahom sa kinaiyahan pinaagi sa ikebana, akong gihunahuna pag-ayo kon unsaon nako pagpahayag ang kaanindot niini. Dayon, sa pagkahibalo nako nga si Jehova mao diay ang naglalang sa katingalahang mga butang sa kinaiyahan, nasabtan na nako karon ang tanan. Unsaon god sa usa ka ubos nga tawo sa pagpakig-indig sa artistikong katakos sa Maglalalang? Si Jehova ang Supremong Dibuhista! Apan, pinaagi sa pagsundog kaniya, nakahan-ay ako ug mga bulak sa mas maayong paagi. Ngani, human ako mosugod pagtuon sa Bibliya, ang mga tawo miingon nga nausab kono ang akong tinamdan sa trabaho, nga ang kalagsik giduyogan na ug kalumo.

Ang mga kamatuoran sa Bibliya nakatabang kanako sa pagsabot sa daghang butang sa unang higayon. Sa dihang akong nakat-onan nga ingong magmamando sa kalibotan, si Satanas nga Yawa mao diay ang nakaingon sa pag-antos sa tawo karon ug nga ang atong kasingkasing malimbongon tungod sa napanunod nga sala gikan kang Adan, sa kataposan akong nasabtan ang tinuod nga kahulogan sa nagakahitabo sa atong palibot. (Jeremias 17:9; 1 Juan 5:19) Akong nakat-onan nga si Jehova maoy makigdaitong Diyos, dagaya sa gugma, hustisya, gahom, ug kaalam (Deuteronomio 32:4; Roma 11:33; 1 Juan 4:8; Pinadayag 11:17); nga tungod sa gugma gipadala sa Diyos si Jesus aron mamatay alang kanato (Juan 3:16; 2 Corinto 5:14); ug moabot ang panahon nga wala nay pag-antos o kamatayon (Pinadayag 21:4). Nakadayeg ako sa katahom niining maong mga kamatuoran. Dugang pa niana, ang mga Saksi ni Jehova nagpadapat sa pagtulon-an ni Jesus nga “higugmaon mo ang imong silingan sama sa imong kaugalingon.” Tungod kay nasinati nako mismo kini, nakombinsir ako nga mao kini ang matuod nga relihiyon.​—Mateo 22:39.

Ang Babag nga Angayng Buntogon

Sa migamot na ang kamatuoran sa akong kasingkasing, akong giatubang ang usa ka suliran. Kon ang pangulo dili makatambong sa mga paglubong, kasagaran akoy mohawas kaniya diha sa Budhistang mga rituwal. Nahimo kadtong pagsulay kanako sa dihang naghunahuna ako sa pagdedikar sa akong kaugalingon kang Jehova. Midesisyon ako nga dili moapil sa Budhistang mga rituwal. (1 Corinto 10:21) Sa kamatinahoron, akong gipatin-aw sa pangulo nga nagplano akong magpabawtismo sa dili madugay ug determinado ako nga dili makigbahin sa bisan unsang pagsimba, bisan pag ang pagbuhat niana nalangkit sa akong trabaho. Iya akong giingnan nga dili siya supak sa akong pagkahimong Kristohanon ug dili siya manghilabot sa akong relihiyosong mga kalihokan. Natingala ako sa maong tubag tungod kay nagtuo kong masilotan ug mawad-an akog trabaho.

Kay nabuntog na ang maong babag, nabawtismohan ako ingong simbolo sa akong pagpahinungod  kang Jehova diha sa usa ka Kristohanong asembliya niadtong Hunyo 1983, usa ka tuig human sa akong unang pagtuon sa Bibliya. Sa pagkawas nako sa bawtismohanan, giabiabi ako ni Keiko nga mapahiyomon kaayo nga may mga luha nga nanglugmaw sa iyang mga mata. Nanglugmaw usab ang akong mga luha samtang akong gipasalamatan si Jehova uban kang Keiko tungod sa kalipay nga among gibati.

Desisyon sa Pag-undang sa Akong Sekular nga Trabaho

Masinaboton kaayo ang pangulo bahin sa akong baroganan ingong dedikadong Kristohanon. Gipaningkamotan nako pagtuman ang akong mga kaakohan nga mas seryoso kay sa kaniadto. Bisan pa niana, gipaningkamotan nako nga mahimong timbang ang akong sekular nga trabaho ug Kristohanong pagkinabuhi. Sulod sa pito ka tuig, migahin akog dugang panahon diha sa Kristohanong ministeryo sa daghang bulan kada tuig.

Ugaling lang, kinahanglang pamalandongon nakog maayo ang espirituwalidad sa akong bugtong anak lalaki ug sa nagkaluya nga panglawas ni Keiko. Akong gihunahuna nga ‘kinahanglang mogugol akog dugang panahon sa akong pamilya.’ Gusto ko usab nga unahon kanunay ang intereses sa Gingharian sa akong kinabuhi. Kining maong mga panginahanglan ug mga tinguha nagdasig kanako sa pag-ampo kang Jehova bahin sa pag-undang sa akong karera sa ikebana. Nasabtan sa pangulo nga nakadesisyon na ako, ug sa kataposan nakaretiro ako nga way kahasol niadtong Hulyo 1990 sa edad nga 42.

Pagtabang sa Uban nga Makakita sa Katahom sa Kamatuoran

Wala madugay human makaretiro, misugod ako sa bug-os-panahong ministeryo aron matabangan ang uban nga makakaplag sa kamatuoran. Sa pagkakaron, mogugol akog usa ka adlaw sa usa ka semana sa pagtudlo bahin sa paghan-ay ug mga bulak, nga wala magawngi sa estilo sa Ikenobo. Ako nakapribilehiyo sa pag-alagad ingong ansiyano sa kongregasyon, ug si Keiko nagpayunir usab ug panalagsa na lang hubakon kon itandi kaniadto. Ang among anak lalaki, nga minyo na, nag-alagad ingong ministeryal nga alagad diha sa sikbit nga kongregasyon. Usa gayod ka bililhong pribilehiyo alang kanamong tanan ang pag-alagad kang Jehova ingong pamilya!

Ilalom sa pagmando sa Gingharian ni Jesu-Kristo, naghinamhinam ako sa paggamit sa mga bulak nga akong gitanom sa akong tanaman aron sa paghimog matahom nga pagkahan-ay nga mga bulak. Maoy akong tim-os nga tinguha nga uban sa akong minahal nga pamilya, akong madayeg sa walay kataposan ang halangdong ngalan ni Jehova, ang Maglalalang sa tanang matahom nga mga butang.

[Hulagway sa panid 23]

Uban sa akong asawa, among anak lalaki, ug sa iyang pamilya

[Mga hulagway sa panid 23]

Pinaagi sa ikebana, ikapahayag nimo ang imong pagbati sa katahom sa kinaiyahan