Kami Nakakaplag ug Mas Maayong Butang

SUMALA SA GIASOY NI FRANCIS DEL ROSARIO DE PÁEZ

Niadtong 1988 ako ug ang akong mga magulang nga lalaki, duyog sa ubang banda, nagpasundayag atubangan sa libolibong tumatan-aw sa Madison Square Garden sa New York City. Tungod sa akong talagsaong pagsayaw, ang among grupo gipakpakan ug kusog. Bisag batan-on pa, kami milampos tungod sa tabang ni Papa.

SI Papa nga usa ka musikero nakapaniid nga ang akong pito ka magulang nga lalaki dunay abilidad sa musika. Busa iyang gibaligya ang among balay ug mipalit ug mga instrumento sa musika ug mga gamit aron matabangan sila sa pagtukod ug banda. Bata pa ako niadto, kay sa 1966 lang ako natawo. Niadtong panahona, ang among pamilya nagpuyo sa lungsod sa Higüey sa Dominican Republic.

Ang unang pagpanugtog sa akong mga igsoon gihimo niadtong 1978 sa munisipyo sa Higüey. Sa ngadtongadto sila mibalhin ug nanugtog sa kaulohan, sa Santo Domingo. Sila nagsugod sa pagtugtog ug pag-awit ug lahi nga estilo sa merengue ug, tungod niini, sila napopular kaayo. * Ang grupo sa ulahi nailhang Los Hermanos Rosario (Ang Managsoong Rosario).

Kay dugay na kaayo akong nangandoy nga mahimong iladong mananayaw, gusto ko nga moduyog sa akong mga igsoong lalaki. Diha sa usa ka parti, gipasayaw ako sa akong igsoong si Pepe, nga maoy lider sa grupo, ug miingon: “Si Francis maoy usa sa akong mga igsoong babaye, nga kinamanghoran, ug siya mahibalong mosayaw.” Ang mga tawo diha sa parti ginindotan pag-ayo sa akong sayaw. Gipahimuslan kining higayona, akong giingnan si Pepe nga gusto kong mahimong mananayaw sa grupo. Mao nga sa edad nga 16 ako nagsugod sa pagsayaw sa tanang pasundayag sa Los Hermanos Rosario.

Nahimong Inila nga Mananayaw

Una pa niini, may mga babaye nga mag-aawit uban sa mga grupo nga tigtugtog ug merengue apan wala pa sukad nga may babaye nga mosayaw diha sa sentro sa entablado nga atubangan sa mga lalaki nga nanugtog. Ako maoy nag-imbento sa tanan nakong lihok sa sayaw, nga naggamit ug bag-ong estilo sa sayaw duyog sa among musika nga merengue. Sa napopular ang akong teknik sa pagsayaw, kini gitawag ug a lo Francis Rosario.

Kami dunay awit nga merengue nga may ulohang “Cumandé,” nga ang bahin sa mga liriko niini nag-ingon: “Y ahora todo el mundo como Francis Rosario” (Ug karon sayaw mo sama ni Francis Rosario). Unya sundogon sa mga tawo ang akong estilo sa pagsayaw. Usahay sila manglingkod lang sa salog nga magtan-aw nako nga nagsayaw imbes sila manayaw. Sa ngadtongadto, ang gigamit lang sa pagpaanunsiyo sa pasundayag sa among grupo mao ang akong letrato. Masabtan na dayon sa tanan nga ang Los Hermanos Rosario maoy magpasundayag.

Human nga nagsugod ako sa pagpasundayag uban sa akong mga igsoon, dihay ubang mga musikero nga nadugang sa among grupo, apil ang tulo ka managsoon nga Páez ug apelyido. Ang usa kanila, nga tigtugtog ug trompeta nga ginganlag Roberto, nahimong akong bana sa ulahi. Ang managsoong Páez nahimong inila sa pagtugtog uban sa grupo. Ang Los Hermanos Rosario nagsugod sa pagkadawat ug daghang imbitasyon sa pagpasundayag sa telebisyon sa Santo Domingo, maingon man sa pagtugtog sa ubang mga nasod.

Sa 1988 nagpasundayag kami libot sa Tinipong  Bansa ug Canada. Ang usa sa among mga pasundayag gihimo diha sa Madison Square Garden nga gihisgotan sa sinugdan. Daghan sa popular kaayong mga grupo nga nanugtog ug merengue nagpasundayag didto, ug ang among grupo mao ang gipakpakan ug kusog. Human niana nga pasundayag, kami gayod ang ipresentar sa mga ahente sa pasundayag ingong panapos sa programa. Tungod sa akong pagsayaw, misamot ka daghan ang dumadayeg sa Los Hermanos Rosario. Ang halin sa among mga plaka mikusog usab.

Daghan kaayong lugar ang among naadtoan sama sa Colombia, Ecuador, Panama, Puerto Rico, Curaçao, Espanya, Alemanya, ug ubang mga nasod. Wala magdugay, kami nahimong usa sa labing popular sa kalibotan sa mga banda sa Latin Amerika. Ang sayaw, ang entablado, ang biste, ug ang mek-ap nahimong labing importante sa akong kinabuhi.

Sa dalaga pa ako, miingon ako nga kon may lalaki nga makagusto nako pero dili interesado ug sayaw, biyaan nako siya una pa ako mobiya sa akong pagsayaw. Apan, ang akong tinamdan bahin sa mga butang nga gihatagan nako ug pangunang pagtagad hapit nang mabag-o.

Nakaamgo sa Importansiya sa Espirituwal nga mga Butang

Kini nga kausaban nagsugod sa dihang kami dunay serye sa mga pasundayag sa Canary Islands sa 1991. Bag-o pa kaming minyo ni Roberto. Ang iyang igsoong si Freddy, nga kauban sa grupo nga tigtugtog, nagsugod sa pagtuon sa Bibliya uban sa mga Saksi ni Jehova ug magdaladala kanunay ug mga publikasyon.

Usa ka adlaw niana nakakita ako ug librong Ikaw Mabuhing Walay Kataposan sa Paraiso sa Yuta diha sa kuwarto ni Freddy, ug gibasa nako kini. Nainteres ako sa kapitulong “Unsang Matanga sa Dapit ang Impiyerno?” Nainteres ako niini tungod kay si Mama miingon nga ang tawo nga nakahimo ug daotan masunog sa impiyerno. Busa, ako nahadlok nga mahiadto didto.

Paglabay sa pipila ka semana, samtang didto pa kami sa Canary Islands, nakuhaan ako. Sa dihang gidala nila ako sa ospital, akong gisugo si Roberto sa paghulam kang Freddy sa libro nga akong nakita diha sa iyang kuwarto. Gusto ko nga mobasa niini samtang nagpauli sa panglawas. Naikag kaayo ako sa libro. Ang usa sa mga butang nga akong nakat-onan mao nga ang impiyerno sa Bibliya maoy ordinaryong lubnganan lamang sa katawhan ug nga wala gayoy tinguha ang Diyos sa pagsakit kang bisan kinsa. (Jeremias 7:31) Nadasig kaayo ako nga ang Bibliya nagtudlo nga ang mga patay walay nahibaloan nga bisan unsa.​—Ecclesiastes 9:​5, 10.

Sa dihang mipauli kami sa Dominican Republic, dihay gihangyo ni Freddy nga usa sa mga Saksi ni Jehova sa pagduaw namo. Iyang gipatin-aw kanamo ang paglaom sa Bibliya nga walay kataposang kinabuhi diha sa paraiso sa yuta, ug nainteres usab ang akong bana niini. (Salmo 37:29; Lucas 23:43) Kami mihangyo ug pagtuon sa Bibliya.

Nabag-o ang mga Tinamdan Labot sa mga Butang nga Gihatagan ug Importansiya

Sa miuswag ang akong kahibalo bahin sa Bibliya, ang akong panglantaw bahin sa trabaho nga gimahal nako pag-ayo nabag-o. Ang mga prinsipyo sa Bibliya nakapabag-o sa akong panghunahuna. (Roma 12:2) Gipangutana nako ang akong  kaugalingon: ‘Makaako ba ako pagsayaw niining matanga sa sayaw atubangan niining mga tawhana? Dili kini ang akong gitinguha.’ Miampo ako sa Diyos, “Palihog pagawasa ako niining kahimtanga.” Nakigsulti ako sa akong bana bahin sa akong gibati, ug kami samag gibati. “Pailob lang, Ga,” siya miingon. “Ikay unag hunong, ug mosunod ra ko.”

Nagsabak na pod ako, ug kay dili man ako makasayaw, libre ako sa pagtambong kanunay sa Kristohanong mga tigom sa Kingdom Hall. Kini nakapalig-on kanako ug kang Roberto, kinsa motambong usab, nga nakapaamgo kanamo sa pagkahinungdanon sa pagpakigtigom uban sa katawhan ni Jehova. Kami nakasabot nga aron makapadayon diha sa dalan sa kamatuoran sa Bibliya, gikinahanglan namo ang pagpanudlo ug pagdasig nga ikahatag sa Kristohanong mga tigom. (Hebreohanon 10:​24, 25) Bisan sa magpasundayag kami sa gawas sa Dominican Republic, kami ni Roberto mangita gayod ug Kingdom Hall ug motambong ug mga tigom.

Human nga nanganak, mibalik ako sa pagtrabaho, apan wala na akoy kaikag niana. Kini nga kausaban dayag kaayo, ug ang media nagsugod sa pagpanaway nako. Ako kanunayng pangutan-on, “Nganong lahi na man kaayo ang imong sinayawan karon?” Ako mag-ampo kanunay kang Jehova nga tabangan ako nga makagawas niining kahimtanga aron dili kami magkabangi sa akong mga igsoon. Ako nahimong usa sa mga tag-iya sa grupo, ug dili ko gustong makigkomprontar kanila.

Sa dihang nagsabak na usab ako, akong giingnan si Rafa, nga maoy nagdumala sa grupo sa pagkamatay sa among igsoong si Pepe, nga gusto kong mogugol ug mas daghang panahon uban sa mga bata ug dili na mobalik sa pagtrabaho. Iya akong gisultihan nga ako ray bahala kon unsa ang akong giisip nga labing maayo alang kanako. Walay usa sa akong mga igsoon ang misupak sa akong pagtuon sa Bibliya. Mapasalamaton kaayo ako niini.

Usa ka Bag-ong Kinabuhi sa Pag-alagad Kang Jehova

Sa 1993, human nakagugol ug napulo ka tuig sa grupo, gitapos nako ang akong karera sa pagsayaw ug akong gipahinungod ang akong kaugalingon kang Jehova sa bug-os. Nahimo akong magmamantala sa maayong balita sa Gingharian sa Diyos, ug human nga mibiya si Roberto sa grupo, kami gibawtismohan sa 1994. (Mateo 24:14) Si Freddy ug ang magulang ni Roberto, nga si Julio, nahimong mga Saksi, maingon man si Manuel Pérez, laing membro sa grupo. Hangtod karon silang tanan matinumanon gihapong nag-alagad kang Jehova.

Daghang tawo ang wala makasabot kon nganong mihunong ako sa pagsayaw, kay gimahal man nako pag-ayo kini. Ang uban nagtuo, sama sa usa ka iladong prodyuser sa telebisyon sa among nasod, nga molabay ra kini nga yugto sa akong kinabuhi. “Sama sa ubang mga tigpasundayag, maulian ra siya niini ug mobalik sa grupo,” siya nanagna. Apan wala gayod kana mahitabo. Ako determinado sa paggugol sa akong kaugalingon nga mas bug-os sa pag-alagad kang Jehova.

Tulo na ang among anak karon: Si Katty, Roberto, ug Obed. Kami naningkamot gayod sa pagtudlo kanila nga ang labing hinungdanong butang sa kinabuhi mao ang espirituwal ug dili ang materyal. Tungod sa among kaagi, kami may igong puwersa sa pagpasidaan kanila sa makapadaot nga impluwensiya sa kalibotan ug sa paghatag kanila ug maayong giya sa kinabuhi. Ang among senemanang pagtuon sa Bibliya sa balay mapuslanon kaayo, kay kini nakatabang kanamo sa pagpabiling nahiusa sa usa ka kalibotan diin ang mga pamilya nagkabahinbahin.

Among gitudloan ang among kabataan sa paglantaw kang Jehova ingong tinuod nga persona nga ilang kasaligan. (Proverbio 3:​5, 6; Hebreohanon 11:27) Among gipakita usab kanila ang pagkahinungdanon sa pagtambong ug pagpakigbahin sa Kristohanong mga tigom. Ang pagtan-aw sa among mga anak nga nagdako diha sa dalan sa kamatuoran sa Bibliya maoy usa ka bililhon kaayong gasa. Mga duha na ka tuig karon, ako nag-alagad ingong oksilyare payunir, usa ka termino nga gigamit sa mga Saksi ni Jehova alang niadtong nagagugol ug 50 ka oras o kapin pa matag bulan sa pagpaambit sa ilang pinasukad sa Bibliya nga mga pagtuo ngadto sa uban. Ug daghang tuig na nga nag-alagad ang akong bana ingong ansiyano sa Kristohanong kongregasyon.

Giisip ko gihapon ang merengue ingong maanindot nga paagi sa pagsayaw. Apan makasubo, ang kadaghanan sa sayaw nga merengue nga popular karon lahi na kaayo kay sa miagi. Sa katibuk-an, kini dili mahilas kaniadto. Karon, aron makakita ug maligdong nga musika nga merengue, kami kinahanglang magmapilion.

 Labing Maayo ang Pag-alagad Kang Jehova

Daghan kaayo ang gitanyag sa kalibotan, apan kinahanglang palandongon sa usa ang mga kahimtang may kalabotan niining tanan. Tinuod kini diha sa industriya sa musika, nga kon tan-awon sa gawas makadani kaayo ug dili makadaot. Apan, kini makadaot. Daghan niadtong konektado sa industriya sa musika nalangkit sa mga droga ug imoralidad. Makauban sa mga tigpasundayag ang mga tawo nga walay laing gihunahuna kondili ang paglipaylipay lang ug sila walay mga konsensiya.​—1 Corinto 15:33.

Among naamgohan nga ang labing maayo nga mahimo ni bisan kinsa mao ang pag-alagad kang Jehova. Nahinumdom pa ako nga mipauli sa hotel human sa usa sa among kinadak-ang mga pasundayag ug mibati nga ang kinabuhi walay kahulogan. Karon akong nahibaloan nga tungod kini kay wala namo tagan-i ang among labing dako nga panginahanglan, ang among espirituwal nga panginahanglan.​—Mateo 5:3.

Ang gihatagan namog pagtagad sa kinabuhi karon mao ang pagpahimuot sa among Maglalalang, ilabina pinaagi sa pagsangyaw ug pagpanudlo sa maayong balita sa iyang Gingharian. (Mateo 24:14; Buhat 20:35) Ang paghimo niini nakahatag ug kalipay ug katagbawan sa among pamilya. Kami mapasalamaton kaayo nga nahimong katawhan sa Diyos ug nakabaton ug tinuod nga mga higala​—mga brader ug mga sister sa kamatuoran​—nga kauban namo sa pagpaambit sa maanindot nga paglaom nga kinabuhing walay kataposan diha sa bag-ong kalibotan sa Diyos.​—Marcos 10:​29, 30; 2 Pedro 3:13; Pinadayag 21:​3, 4.

Kami dako kaayog kita sa kalibotan sa kalingawan. Apan pinaagi sa pagkahibalo bahin sa among Diyos, si Jehova, kami nakakaplag ug espirituwal nga mga bahandi nga mas bililhon kay sa bisan unsang materyal nga bahandi. Kami malipayon kaayo nga nag-alagad sa usa ka Diyos nga may katuyoan, usa ka malipayong Diyos nga nagdasig kanato sa pagsalig kaniya! (Salmo 37:3) Kami kombinsido gayod nga kami nakakaplag ug usa ka butang nga mas maayo kay sa kadungganan ug bahandi, ug kami nanghinaot nga si Jehova motabang kanamo ug sa among pamilya sa pagtuman sa iyang kabubut-on sa walay kataposan.

[Footnote]

[Hulagway sa panid 21]

Uban sa mga membro sa grupo sa unang bahin sa akong karera

[Hulagway sa panid 21]

Nagpasundayag sa New York City, sa mga 1990

[Hulagway sa panid 23]

Atubangan sa Kingdom Hall

[Hulagway sa panid 23]

Gisal-ot: Panahon sa usa ka pagtuon sa Bibliya sa pamilya