Pagpasundayag ug Maayong Tanlag Naghimaya sa Diyos

TINAMPO SA MAGSUSULAT SA PAGMATA! SA UKRAINE

SA PAGPAULI gikan sa usa ka Kristohanong tigom, ang pamilyang Chibisov, nga mga Saksi ni Jehova sa Ukraine, nakakita ug pitaka nga may importanteng mga sulod, apil ang usa ka lisensiya sa pagdrayb, mga credit card, ug mga $500 sa lokal nga salapi. Niining pamilyaha nga may lima ka sakop, ang bana lang ang dunay trabaho. Siya mokita ug duolan sa $70 kada bulan. Busa kini nga salapi dako gayod unta nga tabang kanila. Unsay ilang gihimo?

Ang inahan nag-asoy: “Ang among mga anak nga babaye naghisgot dayon kon unsaon pag-uli sa pitaka ngadto sa tag-iya niini, nga nasayrang usa ka babaye tungod sa lisensiya sa pagdrayb. Nalipay kami sa akong bana kon giunsa pagpasundayag sa among mga anak ang ilang maayong pagkabansay nga tanlag. Pagkasunod adlaw akong giteleponohan ang babaye nga tag-iya sa pitaka. Naghilak sa kalipay, si Olha miabot ug gisultihan kami nga siya ug ang iyang bana dunay pipila ka gamayng mga tindahan sa among lungsod. Ang kuwarta diha sa pitaka mao ang binulan nga suweldo sa ilang mga empleyado. Dugang pa, ang usa sa mga dokumento sa panalapi hinungdanon kaayo alang sa mga rekord sa iyang negosyo.

“Gipangutana kami ni Olha kon diin namo nakita ang pitaka. Gisulti namo kaniya ang lugar ug gipatin-aw usab namo nga didto kami nianang dapita tungod kay paingon na kami sa balay gikan sa among Kristohanong tigom. Sa dihang gitanyagan namo siya ug pipila ka literatura sa Bibliya, siya matinahoron nga midawat niini.

“Pipila ka semana sa ulahi, ang among kaubang Saksi sa kongregasyon nag-ingon nga sa nagtanyag siya ug literatura sa Bibliya sa mga lumalabay sa dalan, usa ka babaye miingon nga kaniadto dili gayod siya maminaw sa mga Saksi ni Jehova. Apan karon, siya dili lang andam sa pagpaminaw kondili sa pagdawat usab ug literatura. Matod niya, tungod kini kay giuli sa mga Saksi ang pitaka sa iyang anak.”

[Hulagway sa panid 31]

Ang pamilyang Chibisov