Tapioca Crepe—Usa ka Lamian nga Pagkaon sa Brazil

Tinampo sa magsusulat sa Pagmata! sa Brazil

SA Brazil, ang tapioca mahimong nagpunting sa nagkalainlaing mga produkto nga gikan sa kamoteng kahoy. Ang usa niini maoy ordinaryong plat nga tinapay. Mora kinig putos sa lumpia nga sagad gitawag ug tapioca crepe. Gama kini sa tayubong nga gitawag ug polvilho doce o goma, nga gikan sa unoron nga kamoteng kahoy.

Ang kamoteng kahoy nidniron ug pug-an, ang pinuga niini gatas ug kolor. Ang duga ipadaplin aron molugdang ang mga solido. Ang duga iyabo, ug ang nanglugdang nga solido, nga tayubongon nga masa, ibulad.

Ang tapioca maoy pangunang pagkaon sa mga lumad nga mga taga-Brazil. Sa ulahi, ang bag-ong abot nga mga Portuges nakadiskobre nga maayong kapuli sa tinapay ang crepe. Apan, karon lang mga tuiga nainteres sa crepe ang ubang mamugnaong mga kosinero nga taga-Brazil, kinsa nakahunahuna sa pagpresentar niini ingong popular nga pagkaon diha sa menu sa ilang restawran.

Kay gustong matagbaw ang mga tawong himili ug pagkaon, ang mga kosinero nakaimbentog bag-ong mga bersiyon sa crepe, ug naghimog espesyal nga mga crepe. Karon ang tapioca crepe popular na kaayo, nga nakahatag ug tagsaong kalidad sa pagkaon sa Brazil. Daghang iladong mga restawran napopular tungod sa ilang crepe.

Nganong dili ka mosulay sa paghimog crepe? Seguradong lamian gayod niini ang imong pamilya ug mga higala.

[Kahon/Hulagway sa panid 24]

Paagi sa Paghimog Tapioca Crepe

Mga sambog alang sa walo ka crepe:

3 ka tasang polvilho doce, 1 1⁄2 ka tasang tubig, ug gamayng asin.

Pagpreparar: Diha sa igo-igong gidak-ong panaksan, wisik-wisikig tubig ug buliborig asin ang polvilho doce, ug ahoga kini sa imong mga tudlo. Anam-anam nga dugangig tubig nga sa samang higayon iligis-ligis kini sa imong duha ka palad hangtod magtibugol-tibugol ug maporma nimong bola-bola nga dili mamilit sa imong kamot. Dayon iduot ang bola-bola diha sa salaan. Kini andam na nga himoong crepe.

Painita ang otso-pulgadang gibag-ong nonstick nga karahay sa igo-igo lang nga kainiton. Ibutang ang ikawalong bahin sa sinagol diha sa karahay, ug kataga kini pinaagi sa likod sa kutsara. Lutoa kini sa duha o upat ka minutos, o hangtod magtapot ug mapormang morag putos sa lumpia, ug maukang ang kilid-kilid niini nga namilit sa karahay. Baliha, ug lutoa ang pikas bahin sulod sa usa ka minutos. Sublia kining paagiha hangtod mahurot ang sinagol. Ipatong-patong ang naluto nang mga crepe.

Ang mga tapioca crepe ikadalit nga lainlain ug dagway pinaagi sa pagdugang ug lainlaing mga palami. Sa pamahaw, pahiri kinig mantekilya samtang init pa, ug dayon butangig duha ka kutsarang kinudkod nga lubi. O mahimong imong butangag gatas kondensada ang ibabaw sa crepe, dugangi ug kinagod nga lubi, piloa ang crepe, ug idalit.

[Hulagway sa panid 24]

Kamoteng kahoy

[Hulagway sa panid 24]

Tapioca crepe nga linubihan ug binutangag gatas kondensada