Ang Papel sa Pagtinabangay Diha sa Kinaiyahan

Diha sa kinaiyahan, “ang pagpabiling buhi, padayong pagtubo ug pagsanay nag-agad gayod sa pagpakigduyog sa ubang mga linalang.”​—“Liaisons of Life.”

LINAW ang dagat. Ang nakapatugaw lamang mao ang hilabihan ka daghang langgam sa dagat. Ang ilang kasamok nagpaila nga dunay nagakahitabo sa ilalom sa dagat. Kalit lang, dihay mitunghang mga bulabula, ug inanay nga naporma ang usa ka puting lingin diha sa dagat. Mga gutlo sa ulahi, dihay duha ka dagko, itom ug dagway nga mga mananap nga migimaw diha sa kinataliwad-an sa lingin diha sa tin-aw nga dagat. Kini ang duha ka humpback nga mga balyenang mitunga gikan sa ilalom sa dagat nga nagbuka sa ilang dagkong mga baba nga dunay samag mga lagpad nga mga ngipon-ngipon nga gitawag ug baleen. Diha sa ibabaw, ilang gitak-om ang ilang dagkong mga baba, gibuga ang tubig, ug misalom aron buhaton pag-usab ang ilang gihimo.

Nagtinabangay kining duha ka balyena aron ilang masikop ug makaon ang daghan kaayong uyap. Nga samag nagsayaw ug ballet sa ilalom sa dagat, kining 40-toneladang sus-an nga mga mananap mosalom ilalom sa mga uyap ug molikos niini samtang magbuga ug hangin gikan sa mga buho ibabaw sa ilang ulo. Kining inantigong pamaagi makaporma ug samag pukot nga mga bulabula palibot sa mga uyap. Dayon ang mga balyena mosulpot sa tunga sa naglikos nga bulabula ug mosubad sa ilang mga tukbonon.

Didto sa kapatagan sa Aprika, ang mga unggoy ug mga impala (samag osa) sagad magtinabangay sa usag usa. “Kining duha ka mananap magpahibalo sa usag usa kon dunay kapeligrohan,” nag-ingon ang mantalaang Scientific American. Tungod sa maayong  panimaho sa mga impala ug hait nga panan-aw sa mga unggoy, mamatikdan dayon kon dunay moduol nga mga manunukob. Ang susamang pagtinabangay makita usab diha sa mga ostrik nga may hait ug panan-aw, ug sa mga sebra nga may maayong igdulungog.

Pipila lamang kini sa daghan kaayong mga pananglitan sa pagtinabangay sa mga linalang diha sa kinaiyahan sa atong palibot. Sa pagkatinuod, ang pagtinabangay makita diha sa tanang matang sa kinabuhi, gikan sa mga mikrobyo ngadto sa tawo ug sa managsama ug dili-managsamang mga espisye. Libolibo ka tuig kanhi, si Haring Solomon, kinsa nagtuon sa kinaiyahan, nakamatikod sa ubos nga mga hulmigas. Siya misulat: “Adtoa ang hulmigas, ikaw nga tapolan; tan-awa ang iyang mga dalan ug magmaalamon. Bisan kon kini walay komandante, opisyal o magmamando, kini nagaandam sa iyang pagkaon sa ting-init; kini nagtigom sa iyang taganang kalan-on sa ting-ani.”​—Proverbio 6:6-8.

Ang mga hulmigas maayo kaayong panig-ingnan sa pagtinabangay, kakugi, ug kaharmonya, nga kasagarang magtinabangay sa pagdalag mga butang nga mas dagko kay kanila. Ang ubang mga hulmigas motabang pa gani sa nasamdan ug gikapoy pag-ayong mga membro sa ilang kolonya nga makabalik sa ilang balay. Tungod niining mga kinaiyaha, dili ikatingala nga gipili ni Solomon ang mga hulmigas ingong usa ka panig-ingnan nga atong sundogon.

Sa mosunod nga mga artikulo, atong makita kon unsa ka hinungdanon ang pagtinabangay aron padayong maglungtad ang tanang matang sa kinabuhi diha sa kinaiyahan, lakip na sa mga tawo. Makat-onan usab nato ang sukwahi nga papel sa mga tawo sa pagdaot, paghugaw, ug pagpuo sa mga linalang diha sa kinaiyahan. Tugotan kaha sa Maglalalang kining mga buhata nga magpadayon hangtod sa hangtod?

[Hulagway sa panid 3]

Ibabaw: Ang mga unggoy ug mga impala magpahibalo sa usag usa kon dunay kapeligrohan

[Hulagway sa panid 4]

Ang mga hulmigas maoy maayong panig-ingnan sa pagtinabangay

[Hulagway sa panid 4]

Ang pagtinabangay makita usab diha sa mga ostrik nga may hait ug panan-aw, ug sa mga sebra nga may maayong igdulungog