Ang Hunahuna sa Bibliya

Angay Ka Bang Moampo Kang Birhen Maria?

SI Maria maoy pamilyar nga tawo sa kadaghanan nga dunay kahibalo bahin sa Kristiyanidad. Ang Kasulatan nag-asoy nga gipanalanginan mismo sa Labing Gamhanang Diyos kining batan-ong babaye pinaagi sa pagpili kaniya nga mahimong inahan ni Jesus. Ang pagkahimugso ni Jesus talagsaon tungod kay ulay si Maria sa dihang iyang gisamkon si Jesus. Ang pipila ka relihiyon sa Kakristiyanohan dugay na nga naghatag ug linaing debosyon kang Maria. Sa 431 K.P., ang Konseho sa Efeso nagproklamar kaniya ingong “Inahan sa Diyos,” ug karon daghang tawo ang gitudloan sa pag-ampo kaniya. *

Ang sinserong mga magsisimba nahibalo nga kinahanglang mag-ampo sila ngadto sa tukmang persona. Unsay gitudlo sa Bibliya bahin niini? Angay bang moampo ang mga Kristohanon kang Birhen Maria?

“Tudloi Kami Kon Unsaon sa Pag-ampo”

Ang Ebanghelyo ni Lucas nag-asoy nga usa sa mga tinun-an ni Jesus mihangyo kaniya: “Ginoo, tudloi kami kon unsaon sa pag-ampo.” Agig tubag, si Jesus miingon: “Sa dihang mag-ampo kamo, ingnon ninyo, ‘Amahan, balaana ang imong ngalan.’” Sa iyang Wali sa Bukid, gitudloan usab ni Jesus ang iyang mga sumusunod sa pag-ampo: “Amahan namo nga anaa sa mga langit, pagabalaanon unta ang imong ngalan.”​—Lucas 11:​1, 2; Mateo 6:9.

Busa, ang unang butang nga atong makat-onan mao nga ang pag-ampo, o masimbahong mga pulong, kinahanglang ipatumong ngadto sa Amahan ni Jesus nga si Jehova. Wala kitay mabasa sa Bibliya nga nagtugot kanato sa pag-ampo ngadto sa lain pang persona. Angay kini tungod kay, sama sa gisulti  ngadto kang Moises sa dihang nadawat niya ang Napulo ka Sugo, si Jehova maoy “Diyos nga nagapangayo ug bug-os nga pagkamahinalaron.”​—Exodo 20:5.

Komosta ang Paggamit ug Rosaryo?

Daghang nag-ampo kang Maria gitudloan nga ang mga bendisyon mabatonan pinaagi sa pagsumay-sumay ug espesipikong mga pangadyion​—sama sa Maghimaya ka Maria, Amahan Namo, ug uban pa. Alang sa mga Katoliko, “ang labing kaylap nga matang sa debosyon kang Maria mao gayod ang pagrosaryo,” matod sa librong Symbols of Catholicism. Ang pagrosaryo maoy usa ka relihiyosong buhat sa pagpasidungog kang Birhen Maria. Ang rosaryohan maoy kulentas nga may mga lobitos nga gamiton sa pag-ihap sa mga pag-ampo. “Ang matag usa sa lima ka seksiyon sa mga lobitos gilangkoban ug napulo ka lobitos, ug ang matag seksiyon gisal-otan ug usa ka lahi nga lobitos,” matod sa maong libro, “nga naghawas sa singkuwenta ka pangadyion nga ‘Maghimaya Ka Maria’, lima ka ‘Amahan Namo’, ug lima ka ‘Himaya sa Diyos Amahan.’” Malipay bang mamati ang Diyos sa sinserong pagrosaryo?

Sa makausa pa, ang mga instruksiyon nga gihatag ni Jesus sa iyang mga tinun-an naghatag kanato ug tukma nga tubag. “Sa dihang mag-ampo, ayaw balikbalika pagsulti ang samang mga butang, ingon sa ginahimo sa katawhan sa mga nasod,” matod niya, “kay sila naghunahuna nga sila pagadunggon tungod sa ilang paggamit sa daghang pulong.” (Mateo 6:7) Busa espesipikong gisultihan ni Jesus ang iyang mga sumusunod nga dili sila magsumay-sumay sa pagpangadyi.

‘Apan dili ba gitudloan man ni Jesus ang iyang mga tinun-an sa pagsumaysumay sa Amahan Namo, nga usa ka bahin sa pagrosaryo?’ tingali dunay mangutana. Tinuod nga si Jesus nagtudlo ug usa ka sulondang pag-ampo, nga nailhan sa ulahi ingong Amahan Namo, o Pag-ampo sa Ginoo. Apan, angay natong matikdan nga gitudlo niya kini human dayon sa iyang pagpasidaan batok sa ‘balikbalik nga pagsulti sa samang mga butang.’ Klaro usab nga dili buot ni Jesus nga sag-ulohon ug sumaysumayon ang sulondang pag-ampo tungod kay siya migamit ug lahi nga mga pulong sa duha ka higayong gitudloan niya ang iyang mga tinun-an sa pag-ampo. (Mateo 6:9-15; Lucas 11:2-4) Ang mga ideya nga gipahayag ni Jesus niining mga higayona parehas, apan ang mga pulong nga iyang gigamit lahi. Busa makahinapos kita nga si Jesus igo lang naghatag ug mga sulondan o panig-ingnan kon sa unsang paagi mag-ampo ang iyang mga sumusunod ug kon unsay haom nilang iampo. Labaw sa tanan, gipakita diha sa iyang mga pulong kon kinsay kinahanglang ampoan.

Pagtahod Kang Maria

Bisan tuod ang Kasulatan wala magtudlo sa mga Kristohanon sa pag-ampo kang Maria, kini wala magkahulogan nga dili na lang usab nato tahoron ang iyang papel sa katumanan sa mga katuyoan sa Diyos. Ang mga panalangin nga mabatonan pinaagi sa iyang Anak maoy alang sa dumalayong kaayohan sa tanang matinumanong mga tawo. “Ang tanang kaliwatan magapahayag kanako nga malipayon,” matod ni Maria. Ug ang iyang ig-agaw nga si Elisabet nag-ingon nga si Maria “bulahan . . . sa mga kababayen-an.” Sa pagkatinuod, bulahan siya. Talagsaon kaayo ang pribilehiyo ni Maria tungod kay siya ang gipili nga maoy magsabak sa Mesiyas.​—Lucas 1:​42, 48, 49.

Apan, dili lang si Maria ang babaye nga gitawag ug bulahan diha sa Kasulatan. Tungod sa maayong gihimo ni Jael alang sa karaang nasod sa Israel, siya usab giingong “labing bulahan sa mga babaye.” (Maghuhukom 5:24) Ang matinumanong si Jael, Maria, ug daghan pang uban nga diyosnong mga babayeng gihisgotan sa Bibliya takos gayod natong sundogon​—apan dili nato angayng simbahon.

Si Maria maoy usa ka matinumanong sumusunod ni Jesus. Presente siya sa lainlaing mga okasyon panahon sa ministeryo ni Jesus sa yuta ug niadtong panahon usab nga namatay si Jesus. Human mabanhaw si Jesus, si Maria “nagpadayon sa pag-ampo” uban sa mga igsoon ni Jesus. Tungod niini may katarongan kita sa pagtuo nga gidihogan usab siya sa balaang espiritu sa Pentekostes 33 K.P. ug busa may paglaom nga mahimong bahin sa pangasaw-onong matang nga magmando sa langit uban ni Kristo.​—Mateo 19:28; Buhat 1:14; 2:1-4; Pinadayag 21:​2, 9.

Apan, kining tanan dili katarongan nga kita mag-ampo na kang Maria. Ang kinasingkasing nga pag-ampo maoy hinungdanong bahin sa pagsimba, ug ang mga Kristohanon gidasig sa ‘paglahutay sa pag-ampo.’ (Roma 12:12) Hinunoa, ang tanang pag-ampo kinahanglang ipadangat ngadto lang kang Jehova, pinaagi kang Jesu-Kristo.​—Mateo 4:10; 1 Timoteo 2:5.

[Footnote]