Gikan sa Among mga Magbabasa

Mga Batan-on Nangutana Salamat sa maanindot nga artikulo nga “Mga Batan-on Nangutana . . . Sa Unsang Paagi Masagubang Nako ang Kapakyasan?” (Nobyembre 22, 2004) Sama kang Ana, gibati nako nga akong napasuko ang Diyos ug dili na niya ako mapasaylo. Apan sumala sa gipatin-aw sa maong artikulo, gipasaylo ni Jehova si David ug padayong gipalig-on siya bisan pa sa iyang mga kahuyangan. Makapadasig gayod ang pagkahibalo nga bisag makasala kita, si Jehova andam sa pagpasaylo kanato!

G. C., Italya

Ang nakatabang gayod nako mao ang Galacia 6:4. Akong naamgohan nga kanunay nakong itandi ang akong kaugalingon sa kinahaworang mga estudyante sa akong klase. Tungod niining artikuloha akong nasabtan nga gidaot ra nako ang akong kaugalingon.

C. C., Pransiya

Pag-atake sa mga Terorista Ang artikulong “Pagsagubang sa Mapait nga Kasinatian Gumikan sa Pag-atake sa mga Terorista” nakatandog gayod sa akong kasingkasing. (Nobyembre 8, 2004) Makapadasig gayod ang gilakip nga mga kasinatian. Nakat-onan nako nga mapalig-on kita pinaagi sa paghinumdom ug mga teksto ug sa paghupot sa seguradong paglaom sa Paraiso. Mahinungdanon nga daghang teksto ang matisok sa atong kasingkasing kutob sa mahimo.

I. A., Japan

Nakadayeg gayod ako nga bisan pag nangaangol sila, ang gihunahuna sa mga igsoon mao ang Bibliya ug ang paglaom nga gihatag kanato ni Jehova. Gusto kong moadto sa Espanya sa umaabot ug sultihan ang mga igsoon nga napalig-on gayod ako.

L. G., Tinipong Bansa

Mga Ginikanan Salamat sa tambag nga gihatag diha sa serye nga “Unsay Gikinahanglan Aron Mahimong Usa ka Maayong Amahan?” (Agosto 22, 2004) Nahibaloan na namo karon kon unsaon paggiya ang kasingkasing sa among gamayng anak bahin sa espirituwal nga mga butang aron masilsil ang mga prinsipyo ni Jehova diha kaniya sukad sa pagkamasuso. Ang maong mga artikulo morag gisulat para gayod kanamo. Gitagbaw kanunay niini ang among espirituwal nga mga panginahanglan sa hustong panahon.

K. ug M. P., Polandia

Pagmabdos sa mga Tin-edyer Salamat sa serye nga “Pagmabdos sa mga Tin-edyer​—Usa ka Trahedya sa Tibuok Kalibotan.” (Oktubre 8, 2004) Nanglugmaw na ang mga luha sa akong mga mata bisan sa wala pa nako mahumag basa kini. Kining artikuloha tukmang naghubit sa naagoman sa akong magulang nga babaye. Nalipay ako nga gihatag ni Jehova kining nunot-sa-panahong serye aron mas masabtan nako ang iyang pagbati.

M. S., Indonesia

Mabatyagan gayod sa usa ang gugma ug simpatiya sa mga ansiyano nga gipakita sa ilustrasyon sa panid 10. Gibayaw gayod sa maong hulagway ang dili-hitupngang gugma ug kaluoy ni Jehova! Salamat sa pagtudlo kanamo kon unsaon pagsundog ang Diyos diha sa among pagtratar sa uban nga nakahimog grabeng sala apan mahinulsolon.

T. K., Ukraine

Pagsangyaw Diha sa Eskuylahan Nakadayeg gayod ako sa artikulong “Mga Batan-on nga Maisogong Nagpahayag sa Ilang Pagtuo.” (Septiyembre 8, 2004) Ang mga kasinatian nila ni Holly, Jessica, ug Melissa nakatabang kanako sa pagpaambit sa akong pagtuo ngadto sa akong mga eskolmet o sa mga magtutudlo diha sa eskuylahan. Sa sinugdan, maulaw akong mosangyaw. Apan karon maikagon na kong makigsulti niadtong akong mahimamat sa eskuylahan.

G. O., Nigeria

Vitiligo Ang usa ka artikulo nga nakatandog sa akong kasingkasing mao ang “Unsa may Vitiligo?” (Septiyembre 22, 2004) Aduna akoy vitiligo sukad pa sa nag-edad akog nuybe anyos. Kapin na sa 30 anyos ang akong edad karon. Human sa daghang pagtambal nga wala magmalamposon, gidawat na nako ang kamatuoran nga kinahanglang maghulat na lang ako sa bag-ong kalibotan sa Diyos aron mamaayo. Bisan pa niana, magantihon gihapon ang akong kinabuhi! Posible gayod nga magmatagbawon ug magmalipayon ang kinabuhi bisan pag aduna niining matanga sa sakit sa panit!

M. S., Mozambique