Duna ba Gayoy Kolor Pink nga Lanaw?

Tinampo sa magsusulat sa Pagmata! sa Senegal

DUNA ba gayoy kolor pink nga lanaw? Ang Lake Retba gitawag ug Pink Lake, ug kay 30 kilometros lang kini gikan sa among balay sa Dakar, sa Senegal, sa Kasadpang Aprika, kami midesisyon sa pag-adto didto aron sa pagsusi kon tinuod ba gayod nga kolor pink kini. Sa dihang miabot kami, nakita namo ang tubig nga migilak-gilak nga nadan-agan sa adlaw. Tinuod man, matahom nga pagka-pink ang kolor niini. Gisaysay sa among giya nga ang sidlak sa adlaw dunay epekto sa mga mikroorganismo sa tubig nga tungod niini mopatungha kini ug talagsaong bulok nga pink. Apan, daghan pa ang makita dinhi nga makaikag kay sa kolor lamang sa lanaw.

Ilalom sa mabaw nga katubigan sa lanaw mao ang salog-salog nga nagbanig ang asin. Ang tubig niini parat kaayo ug dili makapaunlod nga tungod niini among namatikdan nga pahimuslan gayod sa mga bisita ang higayon sa paglangoy-langoy dinhi.

Ang Pink Lake nakahatag ug panginabuhian sa mga tawo (1). Diha sa tampi, ang mga trabahante nagkarga ug mga asin diha sa mga trak. Mihunong kami makadiyot aron sa pagtan-aw sa mga tawo nga nanguhag asin gikan sa lanaw. Nakita namo ang mga lalaki nga nagtindog sa tubig nga kutob sa dughan, nga nagbungkag sa asin pinaagi sa taas nga puthawng mga igdudugkal. Kini ilang gipala ug gisulod diha sa mga basket ug gikarga sa mga sakayan. Gisultihan kami sa usa ka trabahante nga tulo ka oras ang abton sa pagkuhag usa ka toneladang asin. Ang mga sakayan puno kaayo sa karga nga halos dili na kini makalutaw (2). Pag-abot sa mga sakayan diha sa daplin, mga babaye nay mitiwas sa trabaho, nga naglukdo sa mga laton nga may asin (3). Sila nagtrabaho nga sama ka episyente sa dakong makina.

Ang among biyahe makaikag kaayo. Kining kolor pink nga lanaw maoy usa sa daghang katingalahan sa kinaiyahan nga naghimo sa atong yuta nga usa ka bililhong gasa gikan ni Jehova.​—Salmo 115:16.

[Picture Credit Line sa panid 18]

Photo by Jacques CLEMENT, Clichy, FRANCE at http://community.webshots.com/user/pfjc