Gikan sa Among mga Magbabasa
Gikan sa Among mga Magbabasa
Mga Higala Sukad namatay ang akong inahan mga upat ka tuig na ang milabay, ako nakakitag mga higala nga nasuod nako pag-ayo. Ang serye nga “Kon Unsaon sa Pagbaton ug Tinuod nga mga Higala” (Disyembre 8, 2004) nakapahunahuna kanako nga bulahan kaayo ako nga nahigala nako sila!
O. B., Tinipong Bansa
Ako 11 anyos, ug morag maglisod ako sa pagpakighigala. Sa nabasa nako kini nga serye, ang kahimtang miarang-arang. Akong gihatagan ug magasin ang usa ka klasmet nga hilig mosultig daotan batok sa uban. Sukad nga iyang nabasa ang artikulo, siya naningkamot sa paghunong sa pagsultig daotan batok sa uban.
J. K., Polandia
Sa nagbasa niini nga mga artikulo, akong napamatud-an nga kinahanglan nga ako mahimong maayong higala kon buot nako nga makabaton ug mga higala—nga kinahanglang gahinan nako sila ug panahon, sumala sa gidasig sa Buhat 20:35. Kamo nakahatag ug mapuslanon kaayong tambag.
A. K., Polandia
Maglisod gayod ako sa pagpakighigala, bisan diha sa Kristohanong kongregasyon. Karon akong nasabtan nga kinahanglang sinsero ako, mouna sa pagpakighigala, ug dili magdahom ug kahingpitan sa uban. Si Jehova motubag gayod kanato sa hustong panahon!
L. Z., Rusya
Tungod sa daghang suliran sa panglawas, nalisdan ako sa pagpakig-uban sa uban. Ako nakadesisyon sa pagpadapat sa impormasyon niini nga serye. Natabangan ako sa tambag nga magmasinsero ug hinay-hinay nga ipadayag ang imong tinuod nga mga hunahuna ug mga pagbati.
N. M., Japan
Akong gisaysay ngadto sa akong mga eskolmet kini nga serye sa panahon nga maniudto ako. Tungod niini nga magasin, sila nasinati sa Pulong sa Diyos. Palihog padayona ang pagpatik ug mga artikulo nga nagpasiugda sa pagkamapuslanon sa Bibliya alang sa tanang tawo.
M. N., Japan
Ako maikagon kaayong nagbasa sa tubag sa pangutana sa kahon nga “Mahimo Bang ang mga Lalaki ug Babaye ‘Managhigala Lang’?” Walay laing magasin o libro nga nakatagana ug ingon niana ka yano ug tin-aw nga tubag.
R. K., Alemanya
Ang inyong mga artikulo dako kaayog tabang. Kini nagpalig-on kanamo sa among tumong sa paghimog dugang alang kang Jehova ug sa paghimo kaniya nga atong higala. Daghang salamat sa pagdasig!
R.V.H., Alemanya
Kini nga serye mao gayoy akong gikinahanglan. Ako 15 anyos, ug ako nalisdan sa pagpakighigala. Ang tambag nga inyong gihatag makatabang kanako sa pagpalambo ug pagpatunhay sa panaghigalaay. Kini maoy tubag sa akong pag-ampo kon unsaon pagsulti ngadto sa uban sa akong gibati!
B. E., Pransiya
Ikasubo, ang uban nakong mga higala dili pa dugay nakapahigawad kanako, ug ako nasakitan gayod, kay akong gibati nga ako nag-inusara. Ako nadasig sa pagkasayod nga si Jehova dili gayod mobiya kanato. Makapalipay usab ang pagbasa ug pagpadapat sa praktikal nga tambag kon unsaon pagkaplag ug tinuod nga mga higala.
C. C., Italya
Gusto nako nga ang akong anak nga babaye mouswag sa espirituwal. Kini nga magasin nagpasiugda nga mahimo nimong higala ang mga tawo sa tanang pangedaron. Ako nahibalo nga kini nga serye makatabang kaniya. Kini nakatabang kanako.
A. L., Tinipong Bansa
Karon akong nasayran nga kinahanglan gayod akong magpakitag interes sa uban ug magbag-o sa akong personalidad aron mahimong usa ka tinuod nga higala. Ako nakaseguro nga si Jehova motabang kanako.
M. Y., Canada