Naghatag ug Maayong Pamatuod Diha sa Tunghaan

Tinampo sa magsusulat sa Pagmata! sa Mexico

SA DIHANG si Daniel, nga 17-anyos, nagsugod sa laing tuig sa pagtungha, determinado siya nga magpaila nga usa ka Saksi ni Jehova ngadto sa iyang bag-ong mga klasmet. Siya nakahigayon sa paghimo niini sa dihang ang klase gihangyo sa iyang maestro sa English sa pag-interbiyo ug usa ka langyaw kansang lumad nga pinulongan maoy Iningles. Ang asaynment mao ang pag-adto sa mga dapit nga ginahugopan sa mga turista sa Mexico City, sa pag-interbiyo, pag-video ug pagpasalida niini ngadto sa klase.

Si Daniel nakahukom sa pag-interbiyo ug usa ka misyonaryo nga Iningles ug sinultihan nga nagtrabaho sa hedkuwarter sa mga Saksi ni Jehova sa Mexico ug, sa samang higayon, sa pagkuhag video nga Iningles ang gigamit nga sinultihan samtang naglibot sa mga pasilidad. Dugang pa, siya nagpreparar ug eksibit sa lain-laing mga brosyur diha sa lumad nga mga pinulongan nga gipatik sa Mexico maingon man sa Ang Bantayanang Torre ug Pagmata! diha sa lain-laing ubang pinulongan. Dayon si Daniel nananghid sa iyang maestro sa English sa pagpresentar sa video ug sa eksibit ngadto sa klase.

Ang iyang mga klasmet ug maestro nahingangha sa buluhaton nga ginahimo sa mga Saksi ni Jehova sa Mexico. Ang mamiminaw ni Daniel nakadayeg gayod sa mga paningkamot sa mga Saksi sa pagsangyaw ngadto sa lumad nga mga tawo sa Mexico.

Human sa 25-minutos nga presentasyon, nga tungod niana nakakuha siya ug kinatas-ang grado, si Daniel nagtanyag ug mga kopya sa Ang Bantayanang Torre ug Pagmata! sa tanan, maingon man sa librong Mga Pangutanang Gisukna sa mga Batan-on​—Mga Tubag nga Mosaler. Daghan ang midawat sa literatura, ug kini nagbukas sa dalan alang sa dugang panaghisgot bahin sa Bibliya. Si Daniel nag-ingon: “Nagpasalamat ako kang Jehova nga akong napasidunggan ang iyang ngalan pinaagi sa simpleng asaynment sa tunghaan.”