Gikan sa Among mga Magbabasa

Katahom Ako 11 anyos, ug nalingaw gayod ako sa seryeng “Unsang Matanga sa Katahom ang Labing Hinungdanon?” (Disyembre 22, 2004) Usahay ako mabalaka kaayo sa akong panagway. Kini nga artikulo nakatabang kanako sa pagkaamgo nga ang pangsulod nga pagkatawo maoy tan-awon sa mga tawo.

A. L., Tinipong Bansa

Wala gayod ako ganahi sa akong panagway. Apan nanghinaot ako nga ang akong pangsulod nga katahom dalawaton kang Jehova ug nga siya nahimuot kanako ug sa paagi sa akong pagkinabuhi. Ang maong mga artikulo dili lamang makapaikag kondili makapalig-on usab.

M. G., Alemanya

Mga Batan-on Nangutana Salamat sa pagpatik sa “Mga Batan-on Nangutana . . . Komosta Kon Mobalibad Siya?” (Disyembre 22, 2004) Sama niadtong gikutlo sa artikulo, ako nakagusto sa usa ka Kristohanong lalaki apan ang akong gugma wala basli. Ako naguol pag-ayo. Sa tabang niini nga artikulo, ako nag-ampo gayod kang Jehova sa pagtabang kanako nga mapuliki sa espirituwal nga mga butang. Gusto ko nga mabuntog ang akong gibati tungod sa akong gugma nga wala basli.

I. Y., Japan

Dili ikapahayag sa mga pulong ang akong gibati human mabasa ang artikulo. Kini miabot sa hustong panahon, ug kini naghubit gayod sa akong gibati! Dili sayon ang pagdawat nga ikaw balibaran, apan ang artikulo mitabang kanako nga kalimtan ang nahitabo.

M. P., Italya

Bisan tuod lisod ipadapat ang pipila ka punto, nagtuo ako nga kining artikuloha nakatabang gayod kanako nga maulian. Naglaom ako nga kini makatabang sa daghan pang uban sa pagkaamgo nga sila bililhon sa mga mata ni Jehova ug magsugod na usab sa ilang kinabuhi!

J. E., Tinipong Bansa

Kini nga artikulo naghatag kanako ug kalig-on aron dili madaog sa pagbati sa kahigawad. Bisan tuod gibati gihapon nako ang pagkasinalikway, ang artikulo nakatabang sa pagpagaan sa akong kahimtang. Makapahupay gayod ang pagkasayod nga si Jehova nagatagad sa matag usa kanato.

M. L., Tinipong Bansa

Sa pagkadawat nako niining isyuha sa Pagmata!, nadawat usab nako ang usa ka sulat gikan sa usa ka Kristohanong lalaki nga malulotong nagsalikway kanako. Sulod sa daghang adlaw, dili ako makakaon o makatulog, apan kini nga artikulo nakatabang kanako sa pagbaton ug realistikanhong panglantaw ug sa paghupot sa akong pagtahod sa kaugalingon.

M. I., Japan

Human sa dugayng panahon nga pag-antos tungod kay ako ray nakagusto, ako nakaamgo nga ang labing maayo nga mahimo nako mao ang pagdawat sa kamatuoran. Karon ako nahibalo nga dili lamang diay ako ang nag-antos sa pagkasinalikway. Daghan kaayong salamat.

L.A.C., Brazil

Ako nahigawad ug nasakit sa dihang ang tawong akong nagustohan wala diay makagusto kanako. Nakahilak ako human mabasa ang artikulo tungod kay pinaagi niini, si Jehova mitabang kanako. Karon ako nahibalo nga buot niya akong luwason gikan sa tumang kasakit. Mas labi pa akong nahigugma kang Jehova.

D. O., Austria

Ang giingon sa artikulong “Mga Batan-on Nangutana” nga gibutang ni Jehova diha sa tawo ang tinguha nga mahigugma ug nga siya nasayod kon sa unsang paagi atong makontrolar ang maong gugma maoy bag-o ug nakapahupay kanako. Sama sa giingon sa panghapin nga serye niini nga gula, gusto nako nga mahimong matahom sa panan-aw ni Jehova.

H. W., Japan