Paglingkawas Gikan sa Pag-abuso sa Alkoholikong Ilimnon

“Ang akong amahan maoy usa ka alkoholiko, ug akong gisundog ang iyang binuhatan. Sa 12 anyos pa ako, nagsige na kog inom. Sa naminyo na ko, kada adlaw kong mahubog. Nahimo akong pintas; sagad moabot ang mga polis aron tabangan ang akong pamilya. Nagkaluya ang akong panglawas. Ang alkoholikong ilimnon nakapahinabog grabeng pagdugo sa akong tungol, mao nga diriyot na akong mamatay. Dayon nasakit akog cirrhosis ug anemya. Miapil ako sa mga grupo nga naghatag ug praktikal nga tambag sa pagpaningkamot nga makahunong, apan wala kadto mosaler. Gibati nako nga morag nabitik ako sa balay sa lawalawa nga dili na gayod makalingkawas.”​—VÍCTOR, * ARGENTINA.

NAGBALIKBALIK ang mga sugilanon nga sama niini nga giasoy sa mga tawong nalit-agan sa alkoholikong ilimnon. Sama kang Víctor, gibati nilang nabitik ug dili na makalingkawas. Mabuntog o malikayan ba ang mga suliran gumikan sa pag-abuso sa alkoholikong ilimnon? Kon mao, unsaon man?

Pag-ila sa Suliran

Una, mahinungdanong ilhon sa tawo nga nagiyan sa alkoholikong ilimnon ug niadtong mga suod kaniya nga siya aduna gayoy problema. Ang pagkagiyan sa alkoholikong ilimnon maoy gamayng bahin lamang sa mas dakong suliran. Maugmad kini sulod sa taastaas nga panahon nga tingali sa sinugdanan kasarangan lamang ang pag-inom. Makapatingala, ang kadaghanan sa mga aksidente, kapintasan, ug mga suliran diha sa katilingban tungod sa alkoholikong ilimnon wala ipahinabo sa mga tawong alkoholiko. Matikdi ang giingon sa World Health Organization (WHO): “Ang labing maayong paagi sa pagpamenos sa tanang suliran gumikan sa alkoholikong ilimnon diha sa katilingban mao ang pagsentro sa ilang mga pagpaningkamot nga mamenosan ang pag-inom sa mga kasarangang moinom imbes sa mga kusog moinom.” (Italiko amoa.) Ang imo bang pag-inom milapas na sa mga limitasyon nga gisugyot sa mga awtoridad sa panglawas? Moinom ka ba diha sa mga kahimtang nga nanginahanglan sa imong bug-os nga pagtagad ug abtik nga reaksiyon? Ang imo bang mga batasan sa pag-inom nagpahinabog mga suliran sa imong pamilya o sa imong trabaho? Ang pag-ila nga ang gidaghanon nga imong mahurot mahimong makadaot ug ang pagpamenos niana mao gayod ang “labing maayong paagi” sa paglikay sa seryosong mga suliran sa ulahi. Sa dihang ang usa ka tawo magiyan na sa alkoholikong ilimnon, lisod na kaayo ang paghimog mga kausaban.

Ang komon nga reaksiyon niadtong nag-abuso sa alkoholikong ilimnon mao ang pagpanghimakak niini. “Parehas ra man kog inimnan sa uban” o “Makahunong ra man ko bisag kanus-a nga gusto nako,” sila moingon. “Bisan pag hapit na kong mamatay tungod sa alkoholikong ilimnon, wala gyod ko magtuo nga ako nagiyan, mao nga wala ko maningkamot sa paghunong,”  matod pa ni Konstantin, sa Rusya. “Makadaghan na ako mosulay sa paghunong,” nahinumdom si Marek, sa Polandia, “apan wala gyod nako isipa ang akong kaugalingon nga usa ka alkoholiko. Gibalewala ra nako ang mga problema nga nalangkit sa alkoholikong ilimnon.”

Sa unsang paagi matabangan ang usa ka tawo sa pag-ila sa iyang suliran sa pag-inom ug dayon sa paglihok aron mabuntog ang iyang suliran? Una, angay niyang dawaton nga ang iyang mga problema maoy tungod sa pag-abuso sa alkoholikong ilimnon ug moarang-arang ang kalidad sa iyang kinabuhi kon dili na gayod siya moinom. Sumala sa giingon sa La Revue du Praticien​—Médecine Générale, ang iyang panghunahuna kinahanglang bag-ohon gikan sa “maghubog ko kay gibiyaan ko sa akong asawa ug gipotbol ko sa akong trabaho,” ngadto sa “gibiyaan ko sa akong asawa ug gipotbol ko sa akong trabaho kay ako palahubog.”

Kon buot kang motabang sa usa ka tawo nga nagiyan sa alkoholikong ilimnon nga makakab-ot niini nga kausaban sa iyang panghunahuna, mahimo nimong sundon kining mga sugyota: Paminaw ug maayo, gamita ang prangka nga mga pangutana aron siya libreng makapahayag sa iyang mga pagbati, ipakita ang mabinationg tinamdan nga makatabang niya sa pagbati nga siya imong nasabtan, dasiga siya bisan sa diyutayng kauswagan, likayi nga mahimong hinawayon o magbaton ug tinamdan nga makapugong kaniya sa pagpahayag sa iyang gibati ug sa pagpangayog tabang. Makatabang usab kon imo siyang pasulaton ug duha ka han-ay sa listahan nga gipasukad sa mga pangutanang Unsay mahitabo kon magsige kog inom? ug Unsay mahitabo kon ako mohunong?

Pagpangayog Tabang

Sa dihang ang usa mosugod sa pag-abuso sa pag-inom, siya aduna pay paglaom. Ang pipila nakahunong nga silasila ra. Apan ang mga indibiduwal nga nagiyan sa alkoholikong ilimnon magkinahanglan tingali ug propesyonal nga tabang aron makahunong. * Alang sa uban, ang pagpatambal nga dili magpaadmit sa ospital mosaler ra, apan kon grabe ang bation sa lawas tungod sa paghunong sa pag-inom, basin kinahanglang magpaospital. Sa dihang ang mga simtoma sa paghunong mawala na​—human sa duha ngadto sa lima ka adlaw​—mahimo siyang paimnog tambal aron dili na siya kaayo ganahang moinom ug ipadayon ang paghunong.

Sa laing bahin, ang mga programa nga detoxification o ang pagkuha sa makahilong substansiya, dili garantiya sa kalamposan. Ang pagtomar ug tambal maoy temporaryo lamang nga paagi, dili permanenteng makaayo. Si Alain, sa Pransiya, kadaghan na nagpa-detox. “Sa pagbiya pa lamang nako sa ospital, miinom na usab ako kay nakig-uban na man usab ako sa akong mga barkada sa inom. Sa laktod, wala koy hustong panukmod nga mohunong,” siya miingon.

Pagtagbaw sa Kahaw-ang

Sa pagkatinuod, daghan ang napakyas tungod kay ang paghunong sa pag-inom mopabati sa usa ug kahaw-ang, nga morag mawad-an siyag panag-ubanay sa usa ka suod nga higala. “Inom ray akong gihunahuna kanunay,” matod ni Vasiliy, sa Rusya. “Kon molabay ang usa ka adlaw nga di ko makainom, wa gyoy nada nang adlawa.” Alang sa usa nga nagiyan sa alkoholikong ilimnon, ang tanang ubang mga kalihokan maoy ikaduha lamang sa pagtagbaw niya sa iyang gana sa pag-inom. “Ang bugtong katuyoan sa akong kinabuhi mao ang pag-inom ug ang pagpangitag kuwarta aron makainom,” matod pa ni Jerzy, sa Polandia. Dayag nga mahinungdanon alang sa usa ka nagpahiuli nga alkoholiko ang pagpangitag bag-ong katuyoan sa kinabuhi kon buot niya nga dili na gayod moinom.

Usa ka giyang basahon sa WHO nga nagtambag alang niadtong buot magbag-o sa ilang mga batasan sa pag-inom nagpasiugda sa kahinungdanon sa mapuslanong mga kalihokan aron dili na makabalik sa pag-inom. Ang usa ka paagi nga gihatag ingong pananglitan mao ang pag-apil sa relihiyosong mga kalihokan.

Ang pagkapuliki sa espirituwal nga mga kalihokan makatabang sa usa ka tawo nga makalingkawas gikan sa alkoholikong ilimnon. Pananglitan, human sa iyang ikatulong pagkabilanggo tungod sa usa ka salaod nga nalangkit sa pag-inom, si Alain nagtuon sa Bibliya uban sa mga Saksi ni Jehova. Matod niya: “Ang pagtuon sa Bibliya naghatag  kanakog katuyoan sa kinabuhi ug nagpaarang nako sa pagpugong sa pag-inom. Ang akong panukmod dili lang ang paghunong sa pag-inom kondili ang pagpahimuot kang Jehova.”

Pagbuntog sa Agda sa Pag-inom Pag-usab

Ang mga magtatambag bahin sa pag-abuso sa pag-inom nagpunting sa kahinungdanon sa pagpaluyo ug pagdasig alang sa nagpahiuli nga alkoholiko. Daghan ang nawad-an sa ilang pamilya ug mga higala tungod sa ilang makaluluoy nga kahimtang. Ang ilang pagkanahilain mahimong mitultol sa depresyon ug paghikog pa gani. Ang giyang basahon nga gihisgotan sa ibabaw naghatag sa mosunod nga tambag alang niadtong nagtabang sa usa ka tawo nga may suliran sa pag-inom: “Paningkamoti nga dili sawayon ang tawo nga imong gitabangan, bisan pag naglagot ug nahigawad ka pa sa iyang panggawi. Hinumdomi nga ang pag-usab sa batasan dili gayod sayon. May mga semana nga ikaw molampos ug may mga semana nga ikaw mapakyas. Gikinahanglan niya ang imong pagdasig, pagpaluyo nga moinom na lag tinagidyot o dili na lang gayod moinom pa, ug ang imong mamugnaong mga ideya.”

“Ang nakatabang nako,” matod pa ni Hilario, nga nag-inom sulod na sa mga 30 ka tuig, “mao ang gugma ug pagtagad sa mga higala diha sa lokal nga kongregasyon sa mga Saksi ni Jehova. Makadaghan ako mobalik sa pag-inom, apan anaa sila kanunay sa paghatag kanako ug pagdasig ug nunot-sa-panahong tambag sa Bibliya.”

Kon ikaw naningkamot sa paghunong sa pag-inom, hinumdomi nga lagmit may mga panahon nga ikaw mobalik sa pag-inom ug angay nimong isipon kana nga bahin sa imong pagpakigbisog nga maulian. Ayaw pagpadaog! Susiha kon nganong mibalik ka sa pag-inom, ug gamita ang maong kahibalo aron dili ka na moinom pag-usab sa umaabot. Ilha ang espesipikong mga kahimtang nga nakapukaw sa imong gana sa pag-inom. Kana ba maoy kapuol, depresyon, kamingaw, mga panaglalis, kapit-os, o mga okasyon o mga dapit nga dunay nanag-inom? Nan likayi kanang tanan! “Nakakat-on ako sa pagsabot ug pag-ila sa pagbati nga motultol sa pag-inom,” matod ni Jerzy, nga duha ka tuig nang wala moinom. “Gilikayan na nako karon ang mga kahimtang nga makaaghat kanako sa pag-inom. Mopalayo ko sa mga dapit nga naay mga tawong nanag-inom. Dili ko mokaon ug bisan unsa nga may sambog nga alkoholikong ilimnon, ug naglikay pa gani kog mga produkto sa pagpanghinlo sa lawas o mga tambal nga gama sa alkohol. Dili usab ako motan-aw sa bisan unsang panganunsiyo bahin sa alkoholikong ilimnon.” Nakaplagan sa daghan nga ang pag-ampo sa Diyos alang sa “gahom nga labaw sa kasarangan” maoy pangunang paagi sa pagbuntog sa ilang gana sa pag-inom.​—2 Corinto 4:7; Filipos 4:​6, 7.

Kagawasan!

Bisan tuod usa kini ka nagpadayong pakigbisog, posible ang paglingkawas gikan sa pagkagiyan sa alkoholikong ilimnon. Ang tanang indibiduwal nga gihisgotan niining artikuloha milampos. Sila mas himsog na karon ug nakaanig mga kaayohan diha sa pamilya ug sa ilang trabaho. Matod pa ni Alain, “Nakalingkawas na ako gikan sa lit-ag sa pag-inom.” Si Konstantin miingon: “Ang pagkaila kang Jehova nakaluwas sa akong pamilya. May katuyoan na ang akong kinabuhi karon. Ang akong kalipay wala na magdepende sa alkoholikong ilimnon.” Si Victor miingon: “Gibati nako nga ako usa na ka gawasnong tawo. Nabatonan ko pag-usab ang akong dignidad ug nahibalo na ko kon unsay katuyoan sa akong kinabuhi.”

Ang usa ka tawo makahimog mga kausaban bisan pag siya nameligro nga maaksidente gumikan sa dili-maayong batasan sa pag-inom, nag-antos sa mga suliran tungod sa pag-abuso sa alkoholikong ilimnon, o nagiyan niana. Kon ang imong pag-inom nagpameligro sa imong kahimsog, ayaw pagpanuko sa paghimog mga kausaban. Alang kini sa imong kaayohan ug kaayohan usab sa mga tawong nagmahal kanimo.

[Mga footnote]

[Hulagway sa panid 10]

Ang pag-admitir sa problema mao ang unang tikang

[Hulagway sa panid 11]

Daghan ang nagkinahanglag propesyonal nga tabang aron makahunong sa pag-inom

[Hulagway sa panid 12]

Ang pag-ampo makatabang

[Hulagway sa panid 12]

Magmadeterminado sa pagbalibad!