Rehabilitasyon Diha sa mga Bilanggoan sa Mexico
Rehabilitasyon Diha sa mga Bilanggoan sa Mexico
Tinampo sa magsusulat sa Pagmata! sa Mexico
ANG rehabilitasyon usahay mao ang hinungdan kon nganong bilanggoon ang mga kriminal. Bisan pa niana, ang pagbilanggo lamang dili makareporma sa usa ka piniriso. Ang panukmod sa pagbag-o kinahanglang magsumikad sa hunahuna ug kasingkasing sa tawo, nga sundan sa tim-os nga paghinulsol sa nangaging kasaypanan ug sa tinguha nga mausab ang iyang panggawi. Diha sa daghang bilanggoan sa tibuok kalibotan, ang malamposong rehabilitasyon nakab-ot pinaagi sa edukasyon sa Bibliya nga gihimo sa mga Saksi ni Jehova. Atong susihon ang ilang programa sa Mexico.
Ginaduaw sa mga Saksi ni Jehova ang 150 ka bilanggoan sa Mexico, nga nagtanyag ug programa sa pagbasa, pag-edukar bahin sa moralidad ug sa mga doktrina sa Bibliya. Pananglitan, diha sa bilanggoan sa Ciudad Juárez, Chihuahua, ang mga ministro sa mga Saksi ni Jehova regular nga nagsangyaw sa mga 1,200 ka binilanggo. Ang mga binilanggo dakog pagtahod kanila ug nanalipod pa gani kanila gikan sa peligrosong mga kahimtang. Kas-a, sa dihang miulbo ang rayot sa maong bilanggoan, ang pipila sa labing mabangis nga mga piniriso nagpahunong sa magubtanong panon aron ang mga Saksi makabiya nga luwas.
Ang Mayo 8, 2001, nga gula sa Pagmata! nga may serye nga artikulong “Posible ba Gayod nga ang mga Binilanggo Mareporma?” nakadani sa mga binilanggo ug sa mga awtoridad sa bilanggoan. Sa bilanggoan sa San Luis Río Colorado, Sonora, 12 ka Saksi ang nakapahimutang ug 2,149 ka kopya sa maong magasin.
Sa dihang makakaplag silag interesado sa Bibliya, ang mga Saksi ni Jehova mobalik kada semana aron sa pagdumalag mga pagtuon sa Bibliya ug pagpahigayon ug relihiyosong mga panagkatigom. Sa unsang sukod nagmalamposon kini nga programa sa edukasyon bahin sa Bibliya sa pagbag-o sa mga kinabuhi sa mga binilanggo?
Mga Binilanggo Nahimong Kristohanong mga Ministro
Si Jorge nahimong kriminal sa wala pa siya mag-20 anyos. Human siya makasilbi ug 13 ka tuig diha sa bilanggoan sa Islas Marías, siya gibuhian. Apan wala madugay, mibalik siya sa iyang kriminal nga trabaho sa pagpayuhot ug droga. Ingong usa ka propesyonal nga tigpatay, nakakat-on siya sa pagsunod sa mga sugo sa pagpatay ug sa ngadtongadto nakapatay siyag 32 ka tawo. Kay nabilanggo pag-usab, giingnan siya sa iyang mga abogado nga ang iyang mga amo kanhi andam mobayad ug dakong salapi aron makagawas siya. Gusto siyang pagawson sa mga utok sa krimen aron ilang sugoon siya sa pagpatay ug usa pa ka tawo. Apan niadtong higayona si Jorge nagtuon na sa Bibliya uban sa mga Saksi ni Jehova. Miuswag na siya sa espirituwal ug nabawtismohan ug nahimong bug-os-panahong magsasangyaw, o payunir, diha sa bilanggoan. Dawaton kaha niya ang kagawasan ug makig-uban pag-usab sa mga utok sa krimen o magpabilin sa bilanggoan ug moalagad kang Jehova? “Gipalabi nako ang pagpabilin sa bilanggoan ug pagbayad sa daotang mga butang nga akong nahimo,” mitubag si Jorge. “Karon nag-alagad na ako kang Jehova nga Diyos, ang Juan 8:32.
Soberanong Ginoo.” Nagpabiling matinumanon si Jorge ngadto sa Diyos ug namatay nga may paglaom sa pagkabanhaw. Ang iyang mga kaubang estudyante sa Bibliya nag-ingon bahin kaniya, “Siya ‘nahibalo sa kamatuoran, ug ang kamatuoran nagpagawas kaniya.’”—Si David, nga gisentensiyahag 110 ka tuig nga pagkabilanggo tungod sa pagpatay, pagpangidnap, ug pagpangawat, nagtingkagol diha sa usa ka guwardiyado-kaayong selda alang sa peligrosong mga kriminal. Apan tungod sa talagsaong kausaban sa iyang panggawi sukad nga nagtuon siya sa Bibliya uban sa mga Saksi ni Jehova, nakadawat siyag espesyal nga pagtugot nga motambong sa usa ka tigom sa gawas sa maong selda nga giubanag usa ka guwardiya. Nabag-o ang iyang kinabuhi sumala sa mga sukdanan sa Bibliya, mao nga nakigbahin na siya karon sa buluhatong pagsangyaw ug nagdumalag walo ka pagtuon sa Bibliya sa ubang mga binilanggo sa iyang selda. Nakadayeg pag-ayo ang iyang pamilya sa iyang mga kausaban mao nga ilang adtoon siya aron magpatudlo sa Bibliya. Si David miingon, “Dili gayod ako makahunong sa pagpasalamat kang Jehova sa paghatag kanakog espirituwal nga kagawasan.”
Tungod sa programa sa edukasyon bahin sa Bibliya nga gihimo sa mga Saksi ni Jehova, 175 ka narepormang mga binilanggo diha sa 79 ka bilanggoan sa Mexico ang naaprobahan nga mahimo nang mosangyaw, ug 80 kanila mga bawtismado na. Nagdumala silag total nga 703 ka pagtuon sa Bibliya sa ubang mga binilanggo. Dugang pa, mga 900 ka binilanggo ang nagtambongan sa Kristohanong mga tigom nga gihimo diha sa mga bilanggoan.
Pagdayeg Gikan sa mga Awtoridad
Giila sa mga awtoridad sa bilanggoan ang gihimo sa mga Saksi ni Jehova. Pananglitan, ang mga opisyales sa bilanggoan sa Tekax, Yucatán, naghatag kanilag sertipiko isip pag-ila sa ilang “mapuslanon, dili-hinakog ug makitawhanong pagpaluyo” sa mga binilanggo sulod sa tuig 2002.
Sa dihang gisugdan sa mga Saksi ang programa sa edukasyon bahin sa Bibliya dinhi sa maong bilanggoan, ang ilang mga panagkatigom gibantayan pag-ayo sa daghang guwardiya. Apan, paglabay sa panahon, samtang inanayng nabag-o ang personalidad sa mga binilanggo, gitahod na sila sa mga guwardiya, hangtod nga usa na lay nagbantay kanila.
Ang bilanggoan sa Ciudad Juárez adunay kaugalingong Kingdom Hall. Gitugotan sila sa pagkuhag mga materyales sa konstruksiyon aron bag-ohon ang usa ka giabandonar nga metal nga estruktura aron himoong dapit sa pagsimba. Ang 13 ka bawtismadong mga binilanggo ug ang ilang mga estudyante sa Bibliya diha sa bilanggoan maoy nagtrabaho sa tibuok konstruksiyon. Kini adunay sound system, kasilyas, mga lingkoranan nga sama sa sinehan, ug kalingkoran kinig 100 ka tawo. Mga 50 ka tawo ang regular nga tigtambongan sa lima ka senemanang mga tigom.
Oo, posible ang rehabilitasyon pinaagi sa edukasyon sa Bibliya. Sama kang Manases diha sa Bibliya—ang hari sa Juda nga nakahimog dakong pagkadaotan ug nabilanggo sa Babilonya—naghinulsol ug nag-ampo alang sa kapasayloan, ang mga binilanggo karon makabag-o sa ilang personalidad ug mahimong mahinadlokon sa Diyos nga mga tawo.—2 Cronicas 33:12, 13.
[Hulagway sa panid 20, 21]
Pagbawtismo sa sulod sa bilanggoan
[Hulagway sa panid 20, 21]
Bug-os-panahong mga ministro ug ilang mga instruktor diha sa Tunghaan sa Payunir nga Pag-alagad sulod sa bilanggoan