Dali, Pamati sa Pakigpulong Publiko “Kinsa ba ang Angay Natong Sugton?”

Ang kadaghanan dili moangay sa ideya nga magmasinugtanon ngadto sa ubang tawo. ‘Buot kong himoon kon unsay akong gusto’ maoy kasagarang tinamdan. Apan, ang tinuod gipabilhan natong tanan ang pagkamasinugtanon diha sa atong adlaw-adlaw nga pagkinabuhi. Matag higayon nga ikaw mosunod sa pasidaan diha sa usa ka karatula o sa mga instruksiyon, ikaw nagpakita ug pagkamasinugtanon. Ug kinsay makapangulipas nga ang pagsugot sa mga balaod sa sekular nga mga awtoridad gikinahanglan aron mahuptan ang kahusay ug kalinaw sa tawhanong katilingban? Aw, hunahunaa lang kon unsay mahitabo kon ang tanang tawo modumili sa pagsunod sa mga balaod sa trapiko!

Apan, sa dihang ang mga tawo magmando sa ubang mga tawo, ang mga resulta dili kanunayng maayo. Dugay na kanhi, ang Bibliya nag-ingon nga “ang tawo nagmando sa tawo alang sa iyang kadaotan.” (Ecclesiastes 8:9) Duna bay usa ka magmamando nga takos sa atong pagsalig ug pagkamasinugtanon? Kon mao, sa unsang paagi nato siya mailhan? Ug unsay atong madahom ubos sa iyang pagmando? Kini nga mga pangutana pagatubagon sa makapapukaw nga pakigpulong publiko nga “Kinsa ba ang Angay Natong Sugton?” Kini nga pakigpulong ipahayag diha sa distritong mga kombensiyon sa mga Saksi ni Jehova sugod sa sunod bulan. Gatosan sa ingon nianang mga kombensiyon ang gipahigayon sa tibuok kalibotan. Aron mahibaloan ang lokasyon sa kombensiyon nga duol kanimo, kontaka ang mga Saksi ni Jehova sa imong dapit o pagsulat sa Watch Tower, P.O. Box  2044, 1060 Manila.